ਭਾਰਤ ਦੇ ਦੂਜੇ ਸਭ ਤੋਂ ਅਮੀਰ ਵਿਅਕਤੀ ਅਤੇ ਰਿਲਾਇੰਸ ਇੰਡਸਟਰੀਜ਼ ਦੇ ਮਾਲਕ ਮੁਕੇਸ਼ ਅੰਬਾਨੀ ਜਲਦ ਹੀ ਇੰਗਲਿਸ਼ ਪ੍ਰੀਮੀਅਰ ਲੀਗ ਦੀ ਮਹਾਨ ਫੁੱਟਬਾਲ ਟੀਮ ਨੂੰ ਖਰੀਦ ਸਕਦੇ ਹਨ। ਫੇਨਵੇ ਸਪੋਰਟਸ ਗਰੁੱਪ (FSG) ਲਿਵਰਪੂਲ ਐੱਫ.ਸੀ ਨੂੰ ਵੇਚਣ ਲਈ ਤਿਆਰ ਹੈ। ਕਲੱਬ ਦੇ ਮੌਜੂਦਾ ਮਾਲਕਾਂ ਨੇ ਵਿਕਰੀ ਲਈ ਬੋਲੀਆਂ ਦਾ ਸੱਦਾ ਦਿੱਤਾ ਹੈ। FSG ਲਿਵਰਪੂਲ ਨੂੰ ਘੱਟੋ-ਘੱਟ 38,000 ਕਰੋੜ ਰੁਪਏ ਵਿੱਚ ਵੇਚਣਾ ਚਾਹੁੰਦਾ ਹੈ। ਮੀਡੀਆ ਰਿਪੋਰਟਾਂ ਮੁਤਾਬਕ ਅੰਬਾਨੀ ਇਸ ਕਲੱਬ ਨੂੰ ਖਰੀਦਣ ਦੇ ਚਾਹਵਾਨ ਹਨ।
ਰਿਪੋਰਟਸ ਵਿੱਚ ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਮੁਕੇਸ਼ ਅੰਬਾਨੀ ਨੇ ਲਿਵਰਪੂਲ ਕਲੱਬ ਨੂੰ ਖਰੀਦਣ ਵਿੱਚ ਦਿਲਚਸਪੀ ਦਿਖਾਈ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਇੰਗਲੈਂਡ ਦੀ ਮਸ਼ਹੂਰ ਫੁੱਟਬਾਲ ਟੀਮ ਲਿਵਰਪੂਲ ਨੂੰ ਹਾਸਲ ਕਰਨ ਲਈ ਅੰਬਾਨੀ ਨੂੰ ਮੱਧ ਪੂਰਬ ਅਤੇ ਅਮਰੀਕਾ ਦੀਆਂ ਕਈ ਪਾਰਟੀਆਂ ਤੋਂ ਦੌੜ ਜਿੱਤਣੀ ਹੋਵੇਗੀ। ਦੱਸ ਦਈਏ ਕਿ ਅੰਬਾਨੀ ਇਸ ਤੋਂ ਪਹਿਲਾਂ ਅਕਤੂਬਰ 2010 ਵਿੱਚ ਵੀ ਲਿਵਰਪੂਲ ਨੂੰ ਖਰੀਦਣ ਦੀ ਦੌੜ ਵਿੱਚ ਸ਼ਾਮਲ ਹੋਏ ਸਨ, ਪਰ ਗੱਲ ਨਹੀਂ ਬਣੀ। ਫੇਨਵੇ ਸਪੋਰਟਸ ਗਰੁੱਪ ਨੇ ਬਾਜ਼ੀ ਮਾਰੀ ਅਤੇ ਕਲੱਬ, ਲਿਵਰਪੂਲ ‘ਤੇ ਕਬਜ਼ਾ ਕਰ ਲਿਆ।