ਕੋਟਕ ਮਹਿੰਦਰਾ ਬੈਂਕ ਨੇ ਅਸ਼ੋਕ ਵਾਸਵਾਨੀ ਨੂੰ ਆਪਣਾ ਨਵਾਂ ਪ੍ਰਬੰਧ ਨਿਰਦੇਸ਼ਕ (MD) ਅਤੇ ਮੁੱਖ ਕਾਰਜਕਾਰੀ ਅਧਿਕਾਰੀ (CEO) ਨਿਯੁਕਤ ਕੀਤਾ ਹੈ। ਬੈਂਕ ਦੇ ਸੰਸਥਾਪਕ ਉਦੈ ਕੋਟਕ ਦੀ ਥਾਂ ਅਸ਼ੋਕ ਵਾਸਵਾਨੀ ਨੂੰ ਇਹ ਕਮਾਨ ਸੌਂਪੀ ਗਈ ਹੈ। ਉਹ 1 ਜਨਵਰੀ, 2024 ਤੋਂ ਬੈਂਕ ਦੇ ਨਵੇਂ ਐਮਡੀ ਅਤੇ ਸੀਈਓ ਦੀ ਜ਼ਿੰਮੇਵਾਰੀ ਸੰਭਾਲਣਗੇ।
ਦੱਸ ਦਈਏ ਕਿ ਉਦੈ ਕੋਟਕ ਨੇ ਪਿਛਲੇ ਮਹੀਨੇ 1 ਸਤੰਬਰ ਨੂੰ ਬੈਂਕ ਦੇ ਐਮਡੀ ਅਤੇ ਸੀਈਓ ਦੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ ਸੀ। ਉਨ੍ਹਾਂ ਦੇ ਅਸਤੀਫੇ ਤੋਂ ਬਾਅਦ ਅੰਤਰਿਮ ਵਿਵਸਥਾ ਦੇ ਤਹਿਤ ਕੋਟਕ ਮਹਿੰਦਰਾ ਬੈਂਕ ਦੇ ਜੁਆਇੰਟ ਮੈਨੇਜਿੰਗ ਡਾਇਰੈਕਟਰ ਦੀਪਕ ਗੁਪਤਾ ਨੂੰ ਐਮਡੀ ਅਤੇ ਸੀਈਓ ਦੇ ਅਹੁਦੇ ਦੀ ਜ਼ਿੰਮੇਵਾਰੀ ਦਿੱਤੀ ਗਈ ਸੀ। ਉਹ 31 ਦਸੰਬਰ 2023 ਤੱਕ ਇਸ ਅਹੁਦੇ ਦੀ ਕਮਾਨ ਸੰਭਾਲਣਗੇ। ਉਦੈ ਕੋਟਕ ਬੈਂਕ ਦੇ ਗੈਰ-ਕਾਰਜਕਾਰੀ ਨਿਰਦੇਸ਼ਕ ਅਤੇ ਸ਼ੇਅਰਧਾਰਕ ਵਜੋਂ ਬੈਂਕ ਨਾਲ ਜੁੜੇ ਰਹਿਣਗੇ।
ਜ਼ਿਕਰਯੋਗ ਹੈ ਕਿ ਅਸ਼ੋਕ ਵਾਸਵਾਨੀ ਇਸ ਸਮੇਂ ਅਮਰੀਕੀ-ਇਜ਼ਰਾਈਲੀ ਵਿੱਤੀ ਤਕਨਾਲੋਜੀ ਕੰਪਨੀ ਪਗਾਯਾ ਟੈਕਨੋਲੋਜੀਜ਼ ਦੇ ਪ੍ਰਧਾਨ ਹਨ। ਉਨ੍ਹਾਂ ਨੇ ਸਿਟੀਗਰੁੱਪ ਅਤੇ ਬਾਰਕਲੇਜ਼ ਸਮੇਤ ਕਈ ਗਲੋਬਲ ਬੈਂਕਾਂ ਵਿੱਚ ਵੀ ਸੇਵਾ ਨਿਭਾਈ ਹੈ। ਬੈਂਕ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਆਰਬੀਆਈ ਨੇ ਵਾਸਵਾਨੀ ਦੀ 3 ਸਾਲ ਲਈ ਨਿਯੁਕਤੀ ਨੂੰ ਵੀ ਮਨਜ਼ੂਰੀ ਦੇ ਦਿੱਤੀ ਹੈ।