ਚੰਡੀਗੜ੍ਹ ਜ਼ਿਲ੍ਹਾ ਖਪਤਕਾਰ ਕਮਿਸ਼ਨ ਨੇ ਇੱਕ ਮਾਮਲੇ ਵਿੱਚ ਫਲਿੱਪਕਾਰਟ ਇੰਟਰਨੈੱਟ ਪ੍ਰਾਈਵੇਟ ਲਿਮਟਿਡ, ਬੈਂਗਲੁਰੂ ਨੂੰ ਸੇਵਾ ਵਿੱਚ ਕਮੀ ਲਈ ਦੋਸ਼ੀ ਪਾਇਆ ਹੈ। ਹਰਜਾਨੇ ਵਜੋਂ 2500 ਰੁਪਏ ਅਦਾ ਕਰਨ ਦਾ ਹੁਕਮ ਦਿੱਤਾ ਗਿਆ ਹੈ। ਇਲਜ਼ਾਮ ਦੇ ਅਨੁਸਾਰ, ਫਲਿੱਪਕਾਰਟ ਸ਼ਿਕਾਇਤਕਰਤਾ ਨੂੰ ਵਿਕਰੀ ਪੇਸ਼ਕਸ਼ ਦੇ ਤਹਿਤ ਛੋਟ ਵਾਲੀ ਕੀਮਤ ‘ਤੇ ਸੰਬੰਧਿਤ ਉਤਪਾਦ ਪ੍ਰਦਾਨ ਕਰਨ ਵਿੱਚ ਅਸਫਲ ਰਿਹਾ। ਕਮਿਸ਼ਨ ਨੇ ਫਲਿੱਪਕਾਰਟ ਨੂੰ ਅਦਾਲਤੀ ਖਰਚੇ ਵਜੋਂ 1,500 ਰੁਪਏ ਅਦਾ ਕਰਨ ਲਈ ਵੀ ਕਿਹਾ ਹੈ।
ਦਰਅਸਲ,ਬਲਟਾਣਾ ਦੇ ਵਿਕਾਸ ਰਾਣਾ ਨੇ ਖਪਤਕਾਰ ਕਮਿਸ਼ਨ ਵਿੱਚ ਇਹ ਸ਼ਿਕਾਇਤ ਦਰਜ ਕਰਵਾਈ ਸੀ। ਉਨ੍ਹਾਂ ਨੇ ਫਲਿੱਪਕਾਰਟ ‘ਤੇ ਰਨਿੰਗ ਜੁੱਤੇ (running shoes ) ਬੁੱਕ ਕੀਤੇ ਸਨ, ਜਿਨ੍ਹਾਂ ਦੀ ਕੀਮਤ ਫਲਿੱਪਕਾਰਟ ਸੇਲ ‘ਚ 3,419 ਰੁਪਏ ਸੀ। 15 ਅਕਤੂਬਰ 2020 ਨੂੰ ਸ਼ਿਕਾਇਤਕਰਤਾ ਨੇ ਪੈਸੇ ਅਦਾ ਕਰ ਦਿੱਤੇ ਸਨ। ਜੁੱਤੀਆਂ ਦੀ ਡਿਲਿਵਰੀ 19 ਅਕਤੂਬਰ ਤੱਕ ਉਮੀਦ ਅਨੁਸਾਰ ਦਿਖਾਈ ਗਈ ਸੀ। ਇਸ ਤੋਂ ਬਾਅਦ ਡਿਲੀਵਰੀ ਦੀ ਸੰਭਾਵਿਤ ਮਿਤੀ 21 ਅਕਤੂਬਰ ਹੋ ਗਈ। ਜਦੋਂ ਸ਼ਿਕਾਇਤਕਰਤਾ ਨੂੰ ਉਤਪਾਦ ਪ੍ਰਾਪਤ ਨਹੀਂ ਹੋਇਆ, ਤਾਂ ਉਸਨੇ 21 ਅਕਤੂਬਰ, 2020 ਨੂੰ ਕਸਟਮਰ ਕੇਅਰ ਸੇਵਾ ਨੂੰ ਕਾਲ ਕੀਤੀ। ਉਸ ਨੂੰ ਕਿਹਾ ਗਿਆ ਕਿ ਉਹ 26 ਅਕਤੂਬਰ ਤੱਕ ਇੰਤਜ਼ਾਰ ਕਰੇ। ਇਸ ਦੇ ਨਾਲ ਹੀ ਸ਼ਿਕਾਇਤਕਰਤਾ ਨੇ ਈਮੇਲ ਰਾਹੀਂ ਵੀ ਸ਼ਿਕਾਇਤ ਦਰਜ ਕਰਵਾਈ ਸੀ। ਸ਼ਿਕਾਇਤਕਰਤਾ ਨੇ ਕਿਹਾ ਕਿ ਫਲਿੱਪਕਾਰਟ ਨੇ ਨਾ ਤਾਂ ਉਤਪਾਦ ਡਿਲੀਵਰ ਕੀਤਾ ਅਤੇ ਨਾ ਹੀ ਉਸ ਦੇ ਪੈਸੇ ਵਾਪਸ ਕੀਤੇ।
ਇਸ ਮਾਮਲੇ ‘ਚ ਕਮਿਸ਼ਨ ਨੇ ਦੇਖਿਆ ਕਿ ਪੇਸ਼ਕਸ਼ ਕੀਤੀ ਕੀਮਤ ‘ਤੇ ਸ਼ਿਕਾਇਤਕਰਤਾ ਨੂੰ ਉਤਪਾਦ ਪ੍ਰਦਾਨ ਕਰਨ ਵਿੱਚ ਅਸਫਲਤਾ ਅਤੇ ਵਾਅਦੇ ਦੇ ਬਾਵਜੂਦ ਰਿਫੰਡ ਸੇਵਾ ਅਤੇ ਅਨੈਤਿਕ ਵਪਾਰਕ ਅਭਿਆਸਾਂ ਵਿੱਚ ਕਮੀ ਹੈ। ਸ਼ਿਕਾਇਤਕਰਤਾ ਨੂੰ ਬੇਲੋੜੀ ਅਦਾਲਤੀ ਕਾਰਵਾਈ ਵਿੱਚੋਂ ਲੰਘਣਾ ਪਿਆ। ਦੱਸ ਦਈਏ ਕਿ ਕੇਸ ਦਰਜ ਹੋਣ ਤੋਂ ਬਾਅਦ ਉਸ ਦੇ ਪੈਸੇ ਵਾਪਸ ਕਰ ਦਿੱਤੇ ਗਏ।