ਚੰਡੀਗੜ੍ਹ ਪੁਲੀਸ ਨੇ ਸਹਾਇਕ ਸਬ-ਇੰਸਪੈਕਟਰ (ਏਐਸਆਈ) ਭਰਤੀ ਘੁਟਾਲੇ ਵਿੱਚ ਆਪਣੇ ਹੀ ਵਿਭਾਗ ਦੇ ਇੱਕ ਕਾਂਸਟੇਬਲ ਸਮੇਤ 3 ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਫੜੇ ਗਏ ਮੁਲਜ਼ਮਾਂ ਵਿੱਚ ਹਰਿਆਣਾ ਦੇ ਜੀਂਦ ਦਾ ਰਹਿਣ ਵਾਲਾ ਨਰੇਸ਼ (33) ਜੋ ਸੈਕਟਰ 42ਸੀ ਵਿੱਚ ਰਹਿੰਦਾ ਸੀ। ਦੂਜਾ ਮੁਲਜ਼ਮ ਹਰਦੀਪ (32) ਵੀ ਜੀਂਦ ਦਾ ਰਹਿਣ ਵਾਲਾ ਹੈ ਅਤੇ ਸੈਕਟਰ 41ਬੀ ਵਿੱਚ ਰਹਿ ਰਿਹਾ ਸੀ। ਤੀਜਾ ਮੁਲਜ਼ਮ ਚੰਦਰ ਕਾਂਤ (29) ਮਨੀ ਮਾਜਰਾ ਦਾ ਰਹਿਣ ਵਾਲਾ ਹੈ। ਪੁਲੀਸ ਅਨੁਸਾਰ ਗ੍ਰਿਫ਼ਤਾਰ ਮੁਲਜ਼ਮਾਂ ਵਿੱਚ ਕਾਂਸਟੇਬਲ ਨਰੇਸ਼ ਚੰਡੀਗੜ੍ਹ ਪੁਲੀਸ ਵਿੱਚ ਹੀ ਕਾਂਸਟੇਬਲ ਹੈ।
ਜਦਕਿ ਮੁਲਜ਼ਮ ਹਰਦੀਪ ਸੈਕਟਰ 17 ਸਥਿਤ ਏ.ਜੀ.ਪੰਜਾਬ ਦਫ਼ਤਰ ਵਿੱਚ ਕੰਮ ਕਰਦਾ ਹੈ। ਦੋਵਾਂ ਨੇ ਸਾਈਬਰ ਕੈਫੇ ਚਲਾਉਣ ਵਾਲੇ ਚੰਦਰ ਕਾਂਤ ਦੀ ਮਿਲੀਭੁਗਤ ਨਾਲ ਜਾਅਲੀ ਅਰਜ਼ੀ ਫਾਰਮ ਜਮ੍ਹਾ ਕਰਵਾਏ ਸਨ। ਇਨ੍ਹਾਂ ਤਿੰਨਾਂ ਮੁਲਜ਼ਮਾਂ ਨੂੰ ਅਦਾਲਤ ਵਿੱਚ ਪੇਸ਼ ਕਰਕੇ ਪੁਲੀਸ ਇਨ੍ਹਾਂ ਦਾ ਰਿਮਾਂਡ ਹਾਸਲ ਕਰੇਗੀ। 30 ਨਵੰਬਰ ਨੂੰ ਸੈਕਟਰ 11 ਥਾਣੇ ਦੀ ਪੁਲੀਸ ਨੇ ਇਨ੍ਹਾਂ ਖ਼ਿਲਾਫ਼ ਧੋਖਾਧੜੀ, ਜਾਅਲਸਾਜ਼ੀ, ਅਪਰਾਧਿਕ ਸਾਜ਼ਿਸ਼ ਅਤੇ ਹੋਰ ਧਾਰਾਵਾਂ ਤਹਿਤ ਕੇਸ ਦਰਜ ਕੀਤਾ ਸੀ।
ਪੁਲਿਸ ਨੇ ਕਿਹਾ ਹੈ ਕਿ ਇਹ ਮੁਲਜ਼ਮ ਏਐਸਆਈ ਭਰਤੀ ਪ੍ਰੀਖਿਆ ਵਿੱਚ ਧੋਖਾਧੜੀ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਸਨ। ਸਬੰਧਤ ਪ੍ਰੀਖਿਆ ਨਾਲ ਸਬੰਧਤ ਕੁਝ ਸ਼ੱਕੀ ਅਰਜ਼ੀ ਫਾਰਮ ਅਪਰਾਧ ਸ਼ਾਖਾ ਕੋਲ ਜਾਂਚ ਲਈ ਆਏ ਸਨ। ਉਨ੍ਹਾਂ ਦੀ ਜਾਂਚ ਤੋਂ ਬਾਅਦ ਸੈਕਟਰ 11 ਥਾਣੇ ਦੀ ਪੁਲੀਸ ਨੇ ਆਈਪੀਸੀ ਦੀ ਧਾਰਾ 419, 420, 511, 467, 468, 471 ਅਤੇ 120ਬੀ ਤਹਿਤ ਕੇਸ ਦਰਜ ਕੀਤਾ ਹੈ।
ਮਨੋਜ ਕੁਮਾਰ ਮੀਨਾ ਐਸ.ਪੀ., ਚੰਡੀਗੜ੍ਹ ਪੁਲਿਸ ਨੇ ਦੱਸਿਆ ਕਿ 49 ਏ.ਐਸ.ਆਈ ਪੁਲਿਸ ਦੀ ਭਰਤੀ ਲਈ ਫਾਰਮ ਭਰਨ ਦੀ ਤਰੀਕ ਕੱਢੀ ਗਈ ਸੀ ਅਤੇ ਕਈ ਫਾਰਮ ਸਾਡੇ ਕੋਲ ਪਹੁੰਚੇ, ਅਸੀਂ ਦਰਖਾਸਤ ਦੀ ਵੈਰੀਫਿਕੇਸ਼ਨ ਲਈ ਕ੍ਰਾਈਮ ਬ੍ਰਾਂਚ ਨੂੰ ਦੇ ਦਿੱਤੇ, ਇਸ ਦੌਰਾਨ ਸਾਨੂੰ ਪਤਾ ਲੱਗਾ ਕਿ ਇੱਕ ਬਿਨੈਕਾਰ ਨਰੇਸ਼, ਜਿਸ ਨੇ ਦੋ ਦਰਖਾਸਤ ਫਾਰਮ ਭਰੇ ਸਨ, ਨੇ ਹਰਦੀਪ ਨਾਮ ਦੇ ਵਿਅਕਤੀ ਦੀ ਫੋਟੋ ਲਗਾਈ ਸੀ, ਦੂਜਾ ਬਿਨੈ ਪੱਤਰ ਭਰਨ ਦਾ ਕੀ ਮਕਸਦ ਹੈ, ਜਦੋਂ ਦੋਵਾਂ ਨੂੰ ਬੁਲਾਇਆ ਗਿਆ ਅਤੇ ਪੁਲਿਸ ਵੱਲੋਂ ਜਾਂਚ ਕੀਤੀ ਗਈ ਤਾਂ ਇਹ ਸੀ ਪਤਾ ਲੱਗਾ ਕਿ ਨਰੇਸ਼ ਖੁਦ ਇਮਤਿਹਾਨ ਦੇਣਾ ਚਾਹੁੰਦਾ ਸੀ। ਇਸ ਵਿੱਚ ਹਰਦੀਪ ਨਾਮ ਦੇ ਵਿਅਕਤੀ ਦੀ ਮਿਲੀਭੁਗਤ ਸੀ, ਹੁਣ ਇਹਨਾਂ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ।ਉਨ੍ਹਾਂ ਦੱਸਿਆ ਕਿ ਉਸ ਸਾਈਬਰ ਕੈਫੇ ਦੇ ਮਾਲਕ ਨੂੰ ਵੀ ਗ੍ਰਿਫਤਾਰ ਕੀਤਾ ਗਿਆ ਹੈ ਜਿਸ ਵਿਚ ਦੋਵਾਂ ਨੇ ਫਾਰਮ ਭਰੇ ਸਨ ਕਿਉਂਕਿ ਸਾਈਬਰ ਕੈਫੇ ਦੇ ਮਾਲਕ ਨੂੰ ਪਤਾ ਸੀ ਕਿ ਉਹ ਦੋਵੇਂ ਡੁਪਲੀਕੇਟ ਫਾਰਮ ਭਰ ਰਹੇ ਸਨ, ਦੋਵਾਂ ਵਿਚ ਪਿਤਾ ਦਾ ਨਾਮ ਇਕ ਹੀ ਸੀ ਪਰ ਫੋਟੋ ਅਲੱਗ ਅਲੱਗ ਸੀ। ਹੁਣ ਸਾਡੇ ਕੋਲ 122 ਫਾਰਮ ਹਨ ਜਿਨ੍ਹਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।