ਹੁਸ਼ਿਆਰਪੁਰ ਦੇ ਪਿੰਡ ਟਾਂਡਾ ਦਾ ਸਤਨਾਮ ਸਿੰਘ ਜੱਜ ਬਣ ਗਿਆ ਹੈ। ਜੱਜ ਬਣਨ ਦੀ ਖ਼ਬਰ ਸੁਣਦਿਆਂ ਹੀ ਪਿੰਡ ਵਿੱਚ ਖੁਸ਼ੀ ਦੀ ਲਹਿਰ ਦੌੜ ਗਈ। ਜੱਜ ਸਤਨਾਮ ਸਿੰਘ ਦੇ ਘਰ ਵਧਾਈ ਦੇਣ ਲਈ ਕਤਾਰ ਲੱਗੀ ਹੋਈ ਸੀ। ਸਤਨਾਮ ਸਿੰਘ ਦੀ ਮਾਂ ਦੀਆਂ ਅੱਖਾਂ ਵਿੱਚ ਖੁਸ਼ੀ ਦੇ ਹੰਝੂ ਸਨ। ਉਹ ਆਪਣੇ ਜੱਜ ਪੁੱਤਰ ਨੂੰ ਦੇਖ ਕੇ ਭਾਵੁਕ ਹੋ ਗਈ। ਸਾਬਕਾ ਮੰਤਰੀ ਚੌਧਰੀ ਬਲਬੀਰ ਸਿੰਘ ਮਿਆਣੀ ਸਤਨਾਮ ਸਿੰਘ ਦੇ ਪਿੰਡ ਵਧਾਈ ਦੇਣ ਪੁੱਜੇ।
ਇਸ ਮੌਕੇ ਸਤਨਾਮ ਸਿੰਘ ਨੇ ਕਿਹਾ ਕਿ “ਮੇਰੇ ਜੱਜ ਬਣਨ ਦਾ ਸਾਰਾ ਸਿਹਰਾ ਮੇਰੇ ਪਰਿਵਾਰਕ ਮੈਂਬਰਾਂ ਅਤੇ ਵਕੀਲ ਗੁਰਿੰਦਰ ਪਾਲ ਸਿੰਘ ਨੂੰ ਜਾਂਦਾ ਹੈ। ਗੁਰਿੰਦਰ ਪਾਲ ਸਿੰਘ ਨੇ ਮੇਰੇ ਵਰਗੇ ਕਈ ਨੌਜਵਾਨਾਂ ਨੂੰ ਜੱਜ ਬਣਨ ਵਿਚ ਮਦਦ ਕੀਤੀ। ਜੇਕਰ ਮੈਂ ਅੱਜ ਜੱਜ ਬਣਿਆ ਹਾਂ ਤਾਂ ਇਹ ਸਭ ਉਨ੍ਹਾਂ ਦੀ ਬਦੌਲਤ ਹੈ।” ਉਨ੍ਹਾਂ ਅੱਗੇ ਕਿਹਾ ਕਿ ਸਾਡੇ ਵਰਗੇ ਗਰੀਬ ਲੋਕਾਂ ਦੇ ਮੁੰਡਿਆਂ ਦਾ ਇੱਕ ਵੱਡੀ ਕੁਰਸੀ ‘ਤੇ ਬੈਠਣ ਦਾ ਸੁਪਨਾ ਹੁੰਦਾ ਹੈ ਅਤੇ ਉਹ ਸੁਪਨਾ ਅੱਜ ਪੂਰਾ ਹੋ ਗਿਆ ਹੈ। ਮੈਂ ਇਸ ਕੁਰਸੀ ‘ਤੇ ਬੈਠ ਕੇ ਲੋਕਾਂ ਨੂੰ ਇਨਸਾਫ ਦਿਵਾਉਣ ਵਿਚ ਮਦਦ ਕਰਾਂਗਾ। ਮੈਂ ਕੋਈ ਕਸਰ ਬਾਕੀ ਨਹੀਂ ਛੱਡਾਂਗਾ। ਸਾਡੇ ਵਰਗੇ ਕਈ ਲੋਕ ਇਸ ਵਾਰ ਜੱਜ ਬਣੇ ਹਨ। ਜਿਨ੍ਹਾਂ ਚੋ ਜ਼ਿਆਦਾਤਰ ਨੇ ਆਪਣੀ ਪੜ੍ਹਾਈ ਸਰਕਾਰ ਵੱਲੋਂ ਦਿੱਤੇ ਵਜ਼ੀਫੇ ਨਾਲ ਕੀਤੀ ਹੈ।