ਲੁਧਿਆਣਾ ‘ਚ ਦੇਰ ਰਾਤ ਗਿੱਲ ਨਹਿਰ ‘ਚੋਂ 2 ਸਾਲਾ ਬੱਚੇ ਦੀ ਲਾਸ਼ ਮਿਲੀ ਹੈ। ਬੱਚੇ ਦੀ ਪਛਾਣ ਤਨਿਸ਼ਕ ਵਜੋਂ ਹੋਈ ਹੈ। ਤਨਿਸ਼ਕ ਅਤੇ ਉਸ ਦਾ ਪਿਤਾ ਗੌਰਵ ਇਕ ਦਿਨ ਤੋਂ ਲਾਪਤਾ ਸਨ। ਤਨਿਸ਼ਕ ਦੇ ਦਾਦਾ ਰਾਜਵੀਰ ਨੇ ਦੋਰਾਹਾ ਥਾਣੇ ਵਿੱਚ ਗੁੰਮਸ਼ੁਦਗੀ ਦੀ ਸ਼ਿਕਾਇਤ ਦਰਜ ਕਰਵਾਈ ਸੀ। ਪੁੱਤਰ ਗੌਰਵ ਦੀ ਭਾਲ ਕੀਤੀ ਜਾ ਰਹੀ ਹੈ।
ਤਨਿਸ਼ਕ ਦੇ ਦਾਦਾ ਰਾਜਵੀਰ ਦਾ ਕਹਿਣਾ ਹੈ ਕਿ ਉਹ ਜਵੱਦੀ ਦਾ ਰਹਿਣ ਵਾਲਾ ਹੈ। ਜਦਕਿ ਉਸਦਾ ਲੜਕਾ ਹੈਬੋਵਾਲ ਇਲਾਕੇ ਵਿੱਚ ਉਸ ਤੋਂ ਵੱਖ ਰਹਿੰਦਾ ਸੀ। ਰਾਜਵੀਰ ਨੇ ਦੱਸਿਆ ਕਿ ਇਕ ਦਿਨ ਪਹਿਲਾਂ ਬੇਟਾ ਗੌਰਵ ਅਤੇ ਪੋਤਾ ਤਨਿਸ਼ਕ ਅਚਾਨਕ ਲਾਪਤਾ ਹੋ ਗਏ ਸਨ। ਤਲਾਸ਼ੀ ਦੌਰਾਨ ਪੁੱਤਰ ਗੌਰਵ ਦਾ ਮੋਟਰਸਾਈਕਲ ਨਹਿਰ ਕਿਨਾਰੇ ਮਿਲਿਆ। ਜਾਂਚ ਕਰਨ ‘ਤੇ ਪੋਤੇ ਦੀ ਲਾਸ਼ ਨਹਿਰ ਦੇ ਅੰਦਰ ਗਰਿੱਲ ‘ਚ ਫਸੀ ਹੋਈ ਮਿਲੀ। ਪਰ ਗੌਰਵ ਬਾਰੇ ਅਜੇ ਤਕ ਵੀ ਕੁਝ ਵੀ ਪਤਾ ਨਹੀਂ ਲੱਗਾ ਹੈ।
ਰਾਜਵੀਰ ਨੇ ਦੱਸਿਆ ਕਿ ਉਨ੍ਹਾਂ ਦਾ ਜਵਾਈ ਰਮਨ ਨਾਲ ਝਗੜਾ ਚੱਲ ਰਿਹਾ ਹੈ। ਜਵਾਈ ਰਮਨ ਚੰਡੀਗੜ੍ਹ ਰਹਿੰਦਾ ਹੈ। ਉਹ ਅਕਸਰ ਉਨ੍ਹਾਂ ਦੀ ਧੀ ਨੂੰ ਕੁੱਟਦਾ-ਮਾਰਦਾ ਰਹਿੰਦਾ ਸੀ। ਬੇਟਾ ਗੌਰਵ ਕੁਝ ਦਿਨ ਪਹਿਲਾਂ ਉਸ ਨੂੰ ਸਮਝਾਉਣ ਗਿਆ ਸੀ ਪਰ ਰਮਨ ਨੇ ਗੌਰਵ ਨੂੰ ਕਿਹਾ ਸੀ ਕਿ ਉਹ ਉਸ ਨੂੰ ਮ੍ਰਿਤਕਾਂ ਦੀ ਸੂਚੀ ‘ਚ ਪਾ ਦੇਵੇਗਾ। ਰਾਜਵੀਰ ਦਾ ਇਲਜ਼ਾਮ ਹੈ ਕਿ ਰਮਨ ਇੱਕ ਤਾਂਤਰਿਕ ਕੋਲ ਜਾਂਦਾ ਹੈ। ਰਾਜਵੀਰ ਨੇ ਦੋਸ਼ ਲਾਇਆ ਕਿ ਉਸ ਦੇ ਲੜਕੇ ਅਤੇ ਪੋਤੇ ਦੇ ਲਾਪਤਾ ਹੋਣ ਪਿੱਛੇ ਜਵਾਈ ਦੀ ਸਾਜ਼ਿਸ਼ ਹੈ।