ਐਪਲ ਨੇ ਅਗਲੇ ਮਹੀਨੇ ਆਈਫੋਨ 14 ਸੀਰੀਜ਼ ਲਈ ਲਾਂਚ ਦੀ ਤਾਰੀਖ ਦਾ ਐਲਾਨ ਕਰ ਦਿੱਤਾ ਹੈ। ਐਪਲ ਦਾ ਈਵੈਂਟ ਆਮ ਤੌਰ ‘ਤੇ 12-15 ਸਤੰਬਰ ਦੇ ਵਿਚਕਾਰ ਹੁੰਦਾ ਸੀ ਪਰ ਇਸ ਵਾਰ ਕੰਪਨੀ ਨੇ ਇਸ ਈਵੈਂਟ ਨੂੰ ਪਹਿਲਾਂ ਆਯੋਜਿਤ ਕਰਨ ਦਾ ਫੈਸਲਾ ਕੀਤਾ ਹੈ। ਐਪਲ ਦਾ ਈਵੈਂਟ 7 ਸਤੰਬਰ 2022 ਨੂੰ ਹੋਣ ਜਾ ਰਿਹਾ ਹੈ। ਕੰਪਨੀ ਨੇ ਮੀਡੀਆ ਇਨਵਾਈਟ ਰਾਹੀਂ ਇਸ ਗੱਲ ਦੀ ਪੁਸ਼ਟੀ ਕੀਤੀ ਹੈ। 7 ਸਤੰਬਰ ਨੂੰ ਹੋਣ ਵਾਲੇ ਇਸ ਈਵੈਂਟ ‘ਚ iPhone 14 ਸੀਰੀਜ਼ ਨੂੰ ਲਾਂਚ ਕੀਤਾ ਜਾਵੇਗਾ।
ਇਸ ਤੋਂ ਇਲਾਵਾ ਇਸ ਈਵੈਂਟ ‘ਚ ਨਵੀਂ ਸਮਾਰਟਵਾਚ ਅਤੇ ਨਵੇਂ ਆਈਪੈਡ ਦੀ ਵੀ ਉਮੀਦ ਹੈ। ਐਪਲ ਨੇ ਆਈਫੋਨ 14 ਲਾਂਚ ਈਵੈਂਟ ਲਈ ਮੀਡੀਆ ਇਨਵਾਈਟ ਦੇ ਨਾਲ ‘ਫਾਰ ਆਊਟ’ ਟੈਗਲਾਈਨ ਦੀ ਵਰਤੋਂ ਕੀਤੀ ਹੈ। ਆਈਫੋਨ 14 ਲਾਂਚ ਈਵੈਂਟ 7 ਸਤੰਬਰ ਨੂੰ ਰਾਤ 10.30 ਵਜੇ ਸ਼ੁਰੂ ਹੋਵੇਗਾ। ਸਮਾਗਮ ਦਾ ਆਯੋਜਨ ਆਨਲਾਈਨ ਕੀਤਾ ਜਾ ਰਿਹਾ ਹੈ। ਆਈਫੋਨ 14 ਸੀਰੀਜ਼ ਦੇ ਨਾਲ, ਐਪਲ ਚਾਰ ਮਾਡਲ ਆਈਫੋਨ 14, ਆਈਫੋਨ 14 ਮੈਕਸ, ਆਈਫੋਨ ਪ੍ਰੋ ਅਤੇ ਆਈਫੋਨ 14 ਪ੍ਰੋ ਮੈਕਸ ਲਾਂਚ ਹੋਣ ਦੀ ਉਮੀਦ ਹੈ। ਖਬਰਾਂ ਅਨੁਸਾਰ, ਇਸ ਸਾਲ ਸਿਰਫ ਆਈਫੋਨ 14 ਪ੍ਰੋ ਅਤੇ ਆਈਫੋਨ 14 ਪ੍ਰੋ ਮੈਕਸ ਨੂੰ ਨਵੀਂ ਐਪਲ ਏ16 ਬਾਇਓਨਿਕ ਚਿੱਪ ਮਿਲੇਗੀ।
ਐਪਲ ਦੇ ਇਸ ਈਵੈਂਟ ‘ਚ ਐਪਲ ਵਾਚ ਸੀਰੀਜ਼ 8 ਦੀ ਲਾਂਚਿੰਗ ਵੀ ਹੋਣ ਵਾਲੀ ਹੈ। ਕਿਹਾ ਜਾ ਰਿਹਾ ਹੈ ਕਿ ਨਵੀਂ ਘੜੀ ਔਰਤਾਂ ਦੀ ਸਿਹਤ ਨਾਲ ਜੁੜੇ ਫੀਚਰਸ ਦੇ ਨਾਲ ਆ ਸਕਦੀ ਹੈ। ਇਸ ਤੋਂ ਇਲਾਵਾ ਨਵੀਂ ਘੜੀ ‘ਚ ਸਰੀਰ ਦਾ ਤਾਪਮਾਨ ਮਾਪਣ ਦਾ ਫੀਚਰ ਵੀ ਹੋਵੇਗਾ। Apple Watch SE ਦਾ ਨਵਾਂ ਮਾਡਲ ਵੀ ਲਾਂਚ ਕੀਤਾ ਜਾ ਸਕਦਾ ਹੈ।