ਅੱਜ ਤੋਂ ਕ੍ਰਿਕਟ ਦੇ ਮਹਾਂਮੁਕਾਬਲੇ ​​ਯਾਨੀ IPL ਦੇ 15 ਵੇਂ ਸੀਜ਼ਨ ਦੀ ਸ਼ੁਰੂਆਤ ਹੋਣ ਜਾ ਰਹੀ ਹੈ। ਪਹਿਲਾ ਮੈਚ ਪਿਛਲੇ ਸਾਲ ਦੀ ਚੈਂਪੀਅਨ ਚੇਨਈ ਸੁਪਰ ਕਿੰਗਜ਼ ਅਤੇ ਕੋਲਕਾਤਾ ਨਾਈਟ ਰਾਈਡਰਜ਼ ਵਿਚਾਲੇ ਸ਼ਾਮ 7:30 ਵਜੇ ਤੋਂ ਵਾਨਖੇੜੇ ਸਟੇਡੀਅਮ ‘ਚ ਖੇਡਿਆ ਜਾਵੇਗਾ। 14 ਸਾਲਾਂ ਤੋਂ ਚੇਨਈ ਟੀਮ ਦੀ ਕਪਤਾਨੀ ਕਰ ਰਹੇ ਮਹਿੰਦਰ ਸਿੰਘ ਧੋਨੀ ਹੁਣ ਕਪਤਾਨ ਨਹੀਂ ਰਹਿਣਗੇ। ਧੋਨੀ ਨੇ ਉਨ੍ਹਾਂ ਦੀ ਜਗ੍ਹਾ ਆਲਰਾਊਂਡਰ ਰਵਿੰਦਰ ਜਡੇਜਾ ਨੂੰ ਕਪਤਾਨੀ ਸੌਂਪੀ ਹੈ। 26 ਅਪ੍ਰੈਲ 2019 ਤੋਂ ਬਾਅਦ ਇਹ ਪਹਿਲਾ ਮੌਕਾ ਹੋਵੇਗਾ ਜਦੋਂ ਚੇਨਈ ਦੀ ਟੀਮ ਧੋਨੀ ਦੀ ਕਪਤਾਨੀ ਤੋਂ ਬਿਨਾਂ ਮੈਦਾਨ ‘ਤੇ ਉਤਰੇਗੀ।
ਜ਼ਿਕਰਯੋਗ ਹੈ ਕਿ ਚੇਨਈ ਨੇ ਹੁਣ ਤੱਕ 12 ਵਾਰ ਆਈਪੀਐਲ ਦਾ ਪਹਿਲਾ ਮੈਚ ਖੇਡਿਆ ਹੈ ਜਿਸ ਵਿੱਚ 6 ਵਾਰ ਜਿੱਤ ਅਤੇ 6 ਵਾਰ ਹਾਰ ਦਾ ਸਾਹਮਣਾ ਕਰਨਾ ਪਿਆ ਹੈ। ਦੂਜੇ ਪਾਸੇ ਕੇਕੇਆਰ ਨੇ ਆਪਣੇ 14 ਮੈਚਾਂ ‘ਚੋਂ 10 ਸ਼ੁਰੂਆਤੀ ਮੈਚ ਜਿੱਤੇ ਹਨ। ਆਈਪੀਐਲ ਦੇ ਪਹਿਲੇ ਮੈਚ ਵਿੱਚ ਚੇਨਈ ਟੀਮ ਦੇ ਦੋ ਵੱਡੇ ਖਿਡਾਰੀ ਦੀਪਕ ਚਾਹਰ ਅਤੇ ਮੋਇਨ ਅਲੀ ਖੇਡਦੇ ਨਜ਼ਰ ਨਹੀਂ ਆਉਣਗੇ। ਜੇਕਰ ਕੋਲਕਾਤਾ ਦੀ ਗੱਲ ਕਰੀਏ ਤਾਂ ਪਹਿਲੇ ਮੈਚ ‘ਚ ਅਜਿੰਕਿਆ ਰਹਾਣੇ ਅਤੇ ਵੈਂਕਟੇਸ਼ ਅਈਅਰ ਬੱਲੇਬਾਜ਼ੀ ਕਰਦੇ ਨਜ਼ਰ ਆਉਣਗੇ।