ਨਵੀਂ ਦਿੱਲੀ, 27 ਜੁਲਾਈ 2024 – ਪੈਰਿਸ ਓਲੰਪਿਕ-2024 ਦੇ ਉਦਘਾਟਨੀ ਸਮਾਰੋਹ ਨੂੰ ਬਿਆਨ ਕਰਨ ਲਈ ਸਿਰਫ ਸ਼ਬਦ ਕਾਫੀ ਨਹੀਂ ਹਨ। ਸੀਨ ਨਦੀ ਦੀਆਂ ਲਹਿਰਾਂ ‘ਤੇ ਕਿਸ਼ਤੀਆਂ ‘ਤੇ ਸਵਾਰ ਹੋ ਕੇ ਰਾਸ਼ਟਰਾਂ ਦੀ ਪਰੇਡ ਵਿਚ ਹਿੱਸਾ ਲੈਂਦੇ ਹੋਏ ਖਿਡਾਰੀ…ਕਨਾਰੇ ‘ਤੇ ਪ੍ਰਸ਼ੰਸਕ…ਪੌਪ ਸਟਾਰ ਲੇਡੀ ਗਾਗਾ, ਅਯਾ ਨਾਕਾਮੁਕਾ ਅਤੇ ਸੇਲਿਨ ਡੀਓਨ ਦੇ ਮਨਮੋਹਕ ਪ੍ਰਦਰਸ਼ਨ ਅਤੇ ਆਈਫਲ ਟਾਵਰ ‘ਤੇ ਸ਼ਾਨਦਾਰ ਲੇਜ਼ਰ ਲਾਈਟਾਂ ਨੇ ਸਮਾਗਮ ਨੂੰ ਯਾਦਗਾਰੀ ਬਣਾਇਆ। ਮੀਂਹ ਨੇ ਇਸ ਦੀ ਸ਼ਾਨ ਨੂੰ ਹੋਰ ਵੀ ਵਧਾ ਦਿੱਤਾ।
ਇੰਝ ਲੱਗ ਰਿਹਾ ਸੀ ਜਿਵੇਂ ‘ਸਿਟੀ ਆਫ ਲਵ’ ਵਜੋਂ ਜਾਣਿਆ ਜਾਂਦਾ ਪੈਰਿਸ 100 ਸਾਲਾਂ ਬਾਅਦ ਵਾਪਸੀ ਕਰ ਰਹੀਆਂ ਓਲੰਪਿਕ ਖੇਡਾਂ ਦਾ ਖੁੱਲ੍ਹੇਆਮ ਸਵਾਗਤ ਕਰ ਰਿਹਾ ਹੋਵੇ। ਓਲੰਪਿਕ ਖੇਡਾਂ ਦੇ ਇਤਿਹਾਸ ਵਿੱਚ ਪਹਿਲੀ ਵਾਰ ਕਿਸੇ ਸਟੇਡੀਅਮ ਦੇ ਬਾਹਰ ਉਦਘਾਟਨੀ ਸਮਾਰੋਹ ਕਰਵਾਇਆ ਗਿਆ। ਸਮਾਗਮ ਦੌਰਾਨ ਓਲੰਪਿਕ ਮਸ਼ਾਲ ਲੈ ਕੇ ਜਾ ਰਿਹਾ ਇੱਕ ਰਹੱਸਮਈ ਵਿਅਕਤੀ ਵੀ ਖਿੱਚ ਦਾ ਕੇਂਦਰ ਬਣਿਆ।
ਰਾਤ 2:25 ਵਜੇ ਖਿਡਾਰੀਆਂ ਦੀ ਸਹੁੰ ਚੁੱਕਣ ਤੋਂ ਬਾਅਦ ਫਰਾਂਸੀਸੀ ਸੱਭਿਆਚਾਰ ਦੇ ਪ੍ਰਤੀਕ ਆਈਫਲ ਟਾਵਰ ‘ਤੇ ਲੇਜ਼ਰ ਲਾਈਟ ਸ਼ੋਅ ਹੋਇਆ। ਓਲੰਪਿਕ ਮਸ਼ਾਲ ਫਰਾਂਸ ਦੇ ਮਹਾਨ ਖਿਡਾਰੀਆਂ, ਫੁੱਟਬਾਲ ਦੇ ਮਹਾਨ ਖਿਡਾਰੀ ਜ਼ਿਨੇਡੀਨ ਜ਼ਿਦਾਨੇ, ਟੈਨਿਸ ਦੇ ਮਹਾਨ ਖਿਡਾਰੀ ਰਾਫੇਲ ਨਡਾਲ, ਦੌੜਾਕ ਕਾਰਲ ਲੁਈਸ ਤੋਂ ਲੈ ਕੇ ਫਰਾਂਸ ਦੇ ਸਭ ਤੋਂ ਵੱਧ ਉਮਰ ਦੇ ਓਲੰਪਿਕ ਚੈਂਪੀਅਨ, 100 ਸਾਲਾ ਸਾਈਕਲਿਸਟ ਚਾਰਲਸ ਕੋਸਟ ਤੱਕ ਪਹੁੰਚੀ। ਫਿਰ ਸੇਲਿਨ ਡੀਓਨ ਦੀ ਸੁਰੀਲੀ ਆਵਾਜ਼ ਨਾਲ ਗਰਮ ਗੁਬਾਰੇ ਨੇ ਉਡਾਣ ਭਰੀ। ਇਸ ਸਮਾਰੋਹ ਦੇ ਨਾਲ, ਫਰਾਂਸ ਨੇ ਆਪਣੀ ਸੱਭਿਆਚਾਰਕ ਵਿਭਿੰਨਤਾ, ਕ੍ਰਾਂਤੀ ਦਾ ਇਤਿਹਾਸ ਅਤੇ ਸ਼ਾਨਦਾਰ ਭਵਨ ਨਿਰਮਾਣ ਵਿਰਾਸਤ ਨੂੰ ਦੁਨੀਆ ਦੇ ਸਾਹਮਣੇ ਪੇਸ਼ ਕੀਤਾ।
