2ਅਕਤੂਬਰ 2023 (ਬਲਜੀਤ ਮਰਵਾਹਾ) ਅਥਲੈਟਿਕਸ ਦੇ ਟਰੈਕ ਤੇ ਫੀਲਡ ਈਵੈਂਟਾਂ ਵਿੱਚ ਅੱਜ ਭਾਰਤ ਨੇ 3 ਚਾਂਦੀ ਅਤੇ 1 ਕਾਂਸੀ ਦਾ ਤਮਗ਼ਾ ਜਿੱਤਿਆ। ਭਾਰਤ ਨੇ ਹੁਣ ਤੱਕ ਅਥਲੈਟਿਕਸ ਵਿੱਚ 2 ਸੋਨੇ, 8 ਚਾਂਦੀ ਤੇ 6 ਕਾਂਸੀ ਦੇ ਤਮਗ਼ਿਆਂ ਸਣੇ ਕੁੱਲ 14 ਤਮਗ਼ੇ ਜਿੱਤੇ ਹਨ ਜਦੋਂਕਿ ਨੀਰਜ ਚੋਪੜਾ ਦੇ ਜੈਵਲਿਨ ਥਰੋਅ, ਪੁਰਸ਼ਾਂ ਦੀ 4X400 ਮੀਟਰ ਰਿਲੇਅ ਦੌੜ ਸਣੇ ਕਈ ਈਵੈਂਟ ਹਾਲੇ ਹੋਣੇ ਹਨ ਜਿਨ੍ਹਾਂ ਵਿੱਚ ਭਾਰਤ ਦਾ ਦਾਅਵਾ ਮਜ਼ਬੂਤ ਹੈ।
ਪੁਰਸ਼ਾਂ ਦੀ 3000 ਮੀਟਰ ਸਟੀਪਲਚੇਜ ਵਿੱਚ ਕੱਲ੍ਹ ਅਬਿਨਾਸ਼ ਸਾਬਲੇ ਦੇ ਸੋਨ ਤਮਗ਼ੇ ਤੋਂ ਬਾਅਦ ਅੱਜ ਮਹਿਲਾਵਾਂ ਦੀ 3000 ਮੀਟਰ ਸਟੀਪਲਚੇਜ ਵਿੱਚ ਭਾਰਤ ਦੀ ਪਾਰੁਲ ਚੌਧਰੀ ਨੇ ਚਾਂਦੀ ਅਤੇ ਭਾਰਤ ਦੀ ਹੀ ਪ੍ਰੀਤੀ ਲਾਂਬਾ ਨੇ ਕਾਂਸੀ ਦਾ ਤਮਗ਼ਾ ਜਿੱਤਦਿਆਂ ਭਾਰਤ ਦੀ ਝੋਲੀ ਇੱਕੋ ਈਵੈਂਟ ਵਿੱਚ ਦੋ ਤਮਗ਼ੇ ਪਏ।ਦੋਵਾਂ ਨੇ ਕ੍ਰਮਵਾਰ 9.27.63 ਅਤੇ 9.43.32 ਦਾ ਸਮਾਂ ਕੱਢ ਕੇ ਆਪਣਾ ਪਰਸਨਲ ਬੈਸਟ ਸਮਾਂ ਕੱਢਿਆ।
ਔਰਤਾਂ ਦੀ ਲੰਬੀ ਛਾਲ ਵਿੱਚ ਐਨਸੀ ਸੋਜਨ ਨੇ 6.63 ਮੀਟਰ ਦੀ ਛਾਲ ਨਾਲ ਚਾਂਦੀ ਦਾ ਤਮਗ਼ਾ ਜਿੱਤਿਆ। ਇਸੇ ਈਵੈਂਟ ਵਿੱਚ ਭਾਰਤ ਦੀ ਇੱਕ ਹੋਰ ਅਥਲੀਟ ਸ਼ੈਲੀ ਸਿੰਘ 6.48 ਮੀਟਰ ਦੀ ਛਾਲ ਨਾਲ ਪੰਜਵੇਂ ਸਥਾਨ ਉਤੇ ਰਹੀ
4X400 ਮੀਟਰ ਮਿਕਸਡ ਰਿਲੇਅ ਦੌੜ ਵਿੱਚ ਮੁਹੰਮਦ ਅਜਮਲ, ਰਾਜੇਸ਼ ਰਮੇਸ਼, ਵਿਥਿਆ ਰਾਮਰਾਜ ਤੇ ਸੁਭਾ ਵੈਂਕਟੇਸਨ ਦੀ ਚੌਕੜੀ ਨੇ 3.14.34 ਦੇ ਸਮੇਂ ਨਾਲ ਚਾਂਦੀ ਦਾ ਤਮਗ਼ਾ ਜਿੱਤਿਆ। ਮਿਕਸਡ ਰਿਲੇਅ ਮੁਕਾਬਲੇ ਵਿੱਚ ਭਾਰਤੀ ਟੀਮ ਤੀਜੇ ਸਥਾਨ ਉਤੇ ਆਈ ਸੀ ਪਰ ਦੂਜੇ ਨੰਬਰ ਉੱਤੇ ਆਈ ਸ੍ਰੀਲੰਕਾ ਟੀਮ ਦੇ ਡਿਸਕੁਆਲੀਫਾਈ ਹੋਣ ਕਰਕੇ ਭਾਰਤ ਨੇ ਚਾਂਦੀ ਖੱਟ ਲਈ
ਮਹਿਲਾਵਾਂ ਦੀ ਪੋਲ ਵਾਲਟ ਵਿੱਚ ਭਾਰਤ ਦੀ ਪਵਿੱਥਰਾ ਵੈਂਕਟੇਸ਼ 4 ਮੀਟਰ ਦੀ ਛਾਲ ਨਾਲ ਛੇਵੇਂ ਸਥਾਨ ਉੱਤੇ ਰਹਿ ਗਈ। ਇਸੇ ਤਰ੍ਹਾਂ ਪੁਰਸ਼ਾਂ ਦੀ 200 ਮੀਟਰ ਫਾਈਨਲ ਦੌੜ ਵਿੱਚ ਭਾਰਤ ਦਾ ਅਮਲਨ ਬੋਰਗੋਹੇਨ 20.98 ਸਕਿੰਟ ਦੇ ਸਮੇਂ ਨਾਲ ਛੇਵੇਂ ਸਥਾਨ ਉਤੇ ਰਹਿ ਗਿਆ।
