ਉੱਤਰ ਪ੍ਰਦੇਸ਼ ‘ਚ ਬਹਿਰਾਇਚ-ਲਖਨਊ ਹਾਈਵੇਅ ‘ਤੇ ਇਕ ਟੈਂਪੂ ਦੇ ਸਾਹਮਣੇ ਤੋਂ ਆ ਰਹੇ ਡੰਪਰ (ਵੱਡੇ ਟਰੱਕ) ਨਾਲ ਟਕਰਾ ਜਾਣ ਕਾਰਨ 5 ਲੋਕਾਂ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ, ਜਦਕਿ 10 ਹੋਰ ਜ਼ਖਮੀ ਹੋ ਗਏ। ਪੁਲਸ ਸੂਤਰਾਂ ਨੇ ਸ਼ੁੱਕਰਵਾਰ ਨੂੰ ਇਹ ਜਾਣਕਾਰੀ ਦਿੱਤੀ।
ਉਨ੍ਹਾਂ ਦੱਸਿਆ ਕਿ ਹਾਦਸੇ ਵਿੱਚ ਮਾਰੇ ਗਏ ਪੰਜੇ ਵਿਅਕਤੀ ਇੱਕ ਹੀ ਪਰਿਵਾਰ ਨਾਲ ਸਬੰਧਤ ਸਨ ਅਤੇ ਉਹ ਇੱਕ ਵਿਆਹ ਸਮਾਗਮ ਵਿੱਚ ਸ਼ਾਮਲ ਹੋ ਕੇ ਘਰ ਪਰਤ ਰਹੇ ਸਨ। ਪੁਲਸ ਸੂਤਰਾਂ ਮੁਤਾਬਕ ਹਜ਼ੂਰਪੁਰ ਥਾਣਾ ਖੇਤਰ ਦੇ ਅਹਿਰਨਪੁਰਵਾ ਦੇ 15 ਨਿਵਾਸੀ ਕੈਸਰਗੰਜ ਥਾਣਾ ਖੇਤਰ ਦੇ ਰੁਕਨਪੁਰ ਪਿੰਡ ‘ਚ ਵੀਰਵਾਰ ਦੇਰ ਰਾਤ ਟੈਂਪੂ ਰਾਹੀਂ ਘਰ ਪਰਤ ਰਹੇ ਸਨ।
ਉਨ੍ਹਾਂ ਨੇ ਦੱਸਿਆ ਕਿ ਰਾਤ ਕਰੀਬ 12 ਵਜੇ ਉਨ੍ਹਾਂ ਦਾ ਟੈਂਪੂ ਮਦਨੀ ​​ਹਸਪਤਾਲ ਨੇੜੇ ਪਹੁੰਚਿਆ ਤਾਂ ਸਾਹਮਣੇ ਤੋਂ ਆ ਰਹੇ ਡੰਪਰ ਚਾਲਕ ਨੇ ਟੈਂਪੂ ਨੂੰ ਟੱਕਰ ਮਾਰ ਦਿੱਤੀ ਅਤੇ ਮੌਕੇ ਤੋਂ ਫ਼ਰਾਰ ਹੋ ਗਿਆ। ਸੂਤਰਾਂ ਅਨੁਸਾਰ ਹਾਦਸੇ ‘ਚ ਭਗਵਾਨ ਪ੍ਰਸਾਦ (40), ਅਨਿਲ (15), ਖੁਸ਼ਬੂ (35), ਹਰੀਸ਼ (45) ਅਤੇ ਜੈਕਰਨ (40) ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ, ਜਦੋਂ ਕਿ ਨੰਨੇ, ਸੁਨੀਤਾ ਦੇਵੀ, ਚੰਦਨ, ਸਤਿਅਮ, ਰਜਿਤਰਾਮ, ਮੰਗਲ, ਕੈਲਾਸ਼, ਰਾਮਦੀਨ, ਨੰਦਲਾਲ ਅਤੇ ਪ੍ਰਦੀਪ ਗੰਭੀਰ ਜ਼ਖਮੀ ਹੋ ਗਏ। ਫਰਾਰ ਹੋਏ ਡੰਪਰ ਚਾਲਕ ਦੀ ਭਾਲ ਜਾਰੀ ਹੈ ਅਤੇ ਪੁਲਿਸ ਵੱਲੋਂ ਘਟਨਾ ਦੀ ਜਾਂਚ ਕਰਕੇ ਕਾਨੂੰਨੀ ਕਾਰਵਾਈ ਕੀਤੀ ਜਾ ਰਹੀ ਹੈ।