ਚੰਡੀਗੜ੍ਹ: ਭਾਰਤ ‘ਚ ਸੋਮਵਾਰ ਤੋਂ 15-18 ਸਾਲ ਦੇ ਬੱਚਿਆਂ ਦਾ ਟੀਕਾਕਰਨ ਸ਼ੁਰੂ ਹੋ ਗਿਆ ਹੈ। ਜੇਕਰ ਗੱਲ ਕਰੀਏ ਚੰਡੀਗੜ੍ਹ ਦੀ ਤਾਂ ਇੱਥੇ ਵੀ ਵੈਕਸੀਨੇਸ਼ਨ ਮੁਹਿੰਮ ਜਾਰੀ ਹੈ। ਬੱਚਿਆਂ ‘ਚ ਭਾਰੀ ਉਤਸ਼ਾਹ ਦੇਖਣ ਨੂੰ ਮਿਲਿਆ ਤੇ ਮਾਂ-ਪਿਓ ਬੱਚਿਆਂ ਨੂੰ ਟੀਕਾਕਰਨ ਲਈ ਲੈ ਕੇ ਪਹੁੰਚ ਰਹੇ ਹਨ।
ਚੰਡੀਗੜ੍ਹ ‘ਚ ਬਣੇ 10 ਟੀਕਾਕਰਨ ਕੇਂਦਰ
ਚੰਡੀਗੜ੍ਹ ‘ਚ ਟੀਕਾਕਰਨ ਲਈ ਕੁੱਲ 10 ਕੇਂਦਰ ਬਣਾਏ ਗਏ ਹਨ, ਜਾਣਕਾਰੀ ਮੁਤਾਬਕ ਇਨ੍ਹਾਂ ‘ਤੇ ਰੋਜ਼ਾਨਾ ਘੱਟੋ-ਘੱਟ 200 ਬੱਚਿਆਂ ਦੀ ਵੈਕਸੀਨੇਸ਼ਨ ਦਾ ਟੀਚਾ ਮਿੱਥਿਆ ਗਿਆ ਹੈ। ਖਾਸ ਗੱਲ ਇਹ ਵੀ ਹੈ ਕਿ ਸ਼ਹਿਰ ‘ਚ ਸਿਰਫ਼ ਲੜਕੀਆਂ ਲਈ ਇਕ ਟੀਕਾਕਰਨ ਕੇਂਦਰ ਬਣਾਇਆ ਗਿਆ ਹੈ। ਚੰਡੀਗੜ੍ਹ ਦੀ ਸਿਹਤ ਸਕੱਤਰ ਡਾ: ਸੁਮਨ ਦਾ ਕਹਿਣਾ ਹੈ ਕਿ ਟੀਕਾਕਰਨ ਲਈ ਸਾਰਿਆਂ ਨੂੰ ਆਨਲਾਈਨ ਰਜਿਸਟ੍ਰੇਸ਼ਨ ਕਰਵਾਉਣੀ ਪਵੇਗੀ, ਜੇਕਰ ਕੋਈ ਬੱਚਾ ਬਿਨਾਂ ਰਜਿਸਟ੍ਰੇਸ਼ਨ ਤੋਂ ਆਉਂਦਾ ਹੈ ਤਾਂ ਉਸ ਦਾ ਵੀ ਟੀਕਾਕਰਨ ਕੀਤਾ ਜਾਵੇਗਾ|
Co-WIN App ‘ਤੇ ਹੋਵੇਗੀ ਰਜਿਸਟ੍ਰੇਸ਼ਨ
- ਰਜਿਸਟ੍ਰੇਸ਼ਨ ਲਈ ਐਪ ‘ਤੇ ਮੋਬਾਈਲ ਨੰਬਰ ਰਾਹੀਂ ਲੌਗਇਨ ਕਰੋ
- ਇੱਥੇ ਇੱਕ ਰਜਿਸਟ੍ਰੇਸ਼ਨ ਪੇਜ ਦਿਖਾਈ ਦੇਵੇਗਾ
- ਇੱਥੇ ਬੱਚੇ ਦੀ ਫੋਟੋ, ਆਈਡੀ ਟਾਈਪ ਤੇ ਪੂਰਾ ਨਾਂਅ ਦਰਜ ਕਰਨਾ ਹੋਵੇਗਾ
- ਇਸ ਤੋਂ ਬਾਅਦ ਤੁਸੀਂ ਸਲਾਟ ਬੁੱਕ ਕਰ ਸਕੋਗੇ
- 10ਵੀਂ ਦੇ ਆਈਡੀ ਕਾਰਡ ਨਾਲ ਵੀ ਹੋ ਸਕਦੀ ਰਜਿਸਟ੍ਰੇਸ਼ਨ
