ਪੰਜਾਬ ਵਿਧਾਨ ਸਭਾ ਚੋਣਾਂ ਲੜਨ ਵਾਲੇ 166 ਸਿਆਸੀ ਦਿੱਗਜਾਂ ਦੀ ਕਮਿਸ਼ਨ ਵੱਲੋਂ ਜ਼ਮਾਨਤ ਜ਼ਬਤ ਕਰ ਲਈ ਗਈ ਹੈ ਜਿਨ੍ਹਾਂ ਨੇ 16.7 ਫੀਸਦੀ ਤੋਂ ਘੱਟ ਵੋਟਾਂ ਹਾਸਲ ਕੀਤੀਆਂ ਸਨ। ਇਨ੍ਹਾਂ ਵਿੱਚੋਂ ਸਭ ਤੋਂ ਵੱਧ 54 ਉਮੀਦਵਾਰ ਭਾਜਪਾ ਦੇ ਹਨ ਅਤੇ ਸਭ ਤੋਂ ਘੱਟ ਉਮੀਦਵਾਰ ਆਮ ਆਦਮੀ ਪਾਰਟੀ ਦੇ ਸ਼ਾਮਿਲ ਹਨ ਜੋ ਕਿ ਸਿਰਫ਼ ਰਾਣਾ ਰਣਜੀਤ ਸਿੰਘ ਹਨ, ਰਾਣਾ ਰਣਜੀਤ ਸਿੰਘ ਨੂੰ ਪੰਜਾਬ ਵਿਧਾਨ ਸਭਾ ਚੋਣਾਂ ਦੌਰਾਨ 13612 ਵੋਟਾਂ ਮਿਲੀਆਂ ਸਨ ਅਤੇ ਉਹ ਭੁਲੱਥ ਤੋਂ ਚੋਣ ਮੈਦਾਨ ‘ਚ ਸਨ।
ਦੱਸ ਦਈਏ ਕਿ ਕੋਈ ਵੀ ਉਮੀਦਵਾਰ ਜੋ ਕੁੱਲ ਜਾਇਜ਼ ਵੋਟਾਂ ਦੇ 16.7 ਪ੍ਰਤੀਸ਼ਤ ਤੋਂ ਵੱਧ ਪ੍ਰਾਪਤ ਕਰਨ ਵਿੱਚ ਅਸਫਲ ਰਹਿੰਦਾ ਹੈ, ਉਸਦੀ ਜ਼ਮਾਨਤ ਜ਼ਬਤ ਹੋ ਜਾਂਦੀ ਹੈ। ਵਿਧਾਨ ਸਭਾ ਚੋਣਾਂ ਲਈ ਸੁਰੱਖਿਆ ਰਾਸ਼ੀ ਜਨਰਲ ਵਰਗ ਦੇ ਉਮੀਦਵਾਰਾਂ ਲਈ 10,000 ਰੁਪਏ ਅਤੇ SC/ST ਲਈ 5000 ਰੁਪਏ ਹੈ।
ਪੰਜਾਬ ‘ਚ 72 ਸੀਟਾਂ ‘ਤੇ ਚੋਣ ਲੜਨ ਵਾਲੀ ਭਾਜਪਾ ਨੂੰ ਕੁੱਲ 6.60 ਫੀਸਦੀ ਵੋਟਾਂ ਮਿਲੀਆਂ ਹਨ। ਪਾਰਟੀ ਨੂੰ ਕੁੱਲ 10,27,143 ਵੋਟਾਂ ਮਿਲੀਆਂ। ਪਾਰਟੀ ਦੇ ਦੋ ਉਮੀਦਵਾਰ ਆਪਣੇ ਹਲਕੇ ਦੀਆਂ 1 ਫੀਸਦੀ ਤੋਂ ਘੱਟ ਵੋਟਾਂ ਹਾਸਲ ਕਰ ਸਕੇ। ਕੁੱਲ 14 ਉਮੀਦਵਾਰ ਅਜਿਹੇ ਸਨ ਜਿਨ੍ਹਾਂ ਨੂੰ 20 ਫੀਸਦੀ ਤੋਂ ਵੱਧ ਵੋਟਾਂ ਮਿਲੀਆਂ। ਸਿਰਫ 15 ਉਮੀਦਵਾਰਾਂ ਨੂੰ 10 ਫੀਸਦੀ ਤੋਂ ਵੱਧ ਅਤੇ 20 ਫੀਸਦੀ ਤੋਂ ਘੱਟ ਵੋਟਾਂ ਮਿਲੀਆਂ। 1 ਫੀਸਦੀ ਤੋਂ ਵੱਧ ਅਤੇ 2 ਫੀਸਦੀ ਤੋਂ ਘੱਟ ਵੋਟ ਮਿਲਣ ਵਾਲਿਆਂ ‘ਚ 12 ਉਮੀਦਵਾਰ ਸਨ।
