ਏਲਨਾਬਾਦ ਤੋਂ ਇਨੈਲੋ ਵਿਧਾਇਕ ਅਭੈ ਸਿੰਘ ਚੌਟਾਲਾ ਨੇ ਮੰਗਲਵਾਰ ਨੂੰ ਵਿਧਾਨ ਸਭਾ ਸੈਸ਼ਨ ਦੇ ਤੀਜੇ ਦਿਨ ਸਿਫਰ ਕਾਲ ਦੌਰਾਨ ਖੇਤੀਬਾੜੀ ਮੰਤਰੀ ਦੇ ਸਦਨ ‘ਚ ਦਿੱਤੇ ਗਏ ਜਵਾਬ ‘ਤੇ ਬੋਲਦਿਆਂ ਕਿਹਾ ਕਿ ਖੇਤੀਬਾੜੀ ਮੰਤਰੀ ਵੱਲੋਂ ਦਿੱਤਾ ਗਿਆ ਬਿਆਨ ਇਸ ਤਰ੍ਹਾਂ ਹੈ ਜਿਵੇਂ ਕਿ ਸੂਬੇ ਵਿੱਚ ਡੀਏਪੀ ਅਤੇ ਯੂਰੀਆ ਦੀ ਘਾਟ ਹੈ ਹੀ ਨਹੀਂ ਜਦੋਂ ਕਿ ਇਹ ਸਭ ਨੂੰ ਪਤਾ ਹੈ ਕਿ ਸਰ੍ਹੋਂ ਦੀ ਬਿਜਾਈ ਤੋਂ ਲੈ ਕੇ ਹੁਣ ਤੱਕ ਪੂਰੇ ਸੂਬੇ ਦੇ ਕਿਸਾਨ ਹਰ ਜ਼ਿਲ੍ਹੇ ਵਿੱਚ ਖਾਦ ਲੈਣ ਲਈ ਲਾਈਨਾਂ ਵਿੱਚ ਖੜ੍ਹੇ ਹਨ, ਜਿਸ ਦੀਆਂ ਖ਼ਬਰਾਂ ਸਾਰੇ ਅਖਬਾਰਾਂ ਵਿੱਚ ਪ੍ਰਮੁੱਖਤਾ ਨਾਲ ਪ੍ਰਕਾਸ਼ਿਤ ਹੋ ਚੁੱਕੀਆਂ ਹਨ, ਸਰਕਾਰ ਇਸ ਤੋਂ ਇਨਕਾਰ ਨਹੀਂ ਕਰ ਸਕਦੀ। ਉਨ੍ਹਾਂ ਖੇਤੀਬਾੜੀ ਮੰਤਰੀ ਦੇ ਹਲਕੇ ਲੋਹਾਰੂ ਵਿੱਚ ਖਾਦ ਲੈਣ ਲਈ ਲਾਈਨ ਵਿੱਚ ਖੜ੍ਹੇ ਹਜ਼ਾਰਾਂ ਕਿਸਾਨਾਂ ਦੀ ਵੀਡੀਓ ਦਾ ਹਵਾਲਾ ਦਿੰਦਿਆਂ ਕਿਹਾ ਕਿ ਇਥੇ ਵੀ ਖਾਦ ਉਪਲੱਬਧ ਨਹੀਂ ਹੈ।
ਅਭੈ ਸਿੰਘ ਚੌਟਾਲਾ ਨੇ ਕਿਹਾ ਕਿ ਜਿਨ੍ਹਾਂ ਕਿਸਾਨਾਂ ਨੂੰ ਸੁਸਾਇਟੀਆਂ ਵਿੱਚ ਖਾਦ ਮਿਲਣੀ ਚਾਹੀਦੀ ਸੀ, ਉਹ ਮੰਡੀ ਵਿੱਚ 100-300 ਰੁਪਏ ਪ੍ਰਤੀ ਥੈਲਾ ਵੱਧ ਦੇ ਕੇ ਖਾਦ ਬਲੈਕ ਵਿੱਚ ਖਰੀਦਣ ਲਈ ਮਜਬੂਰ ਹਨ। ਇਸ ਤੋਂ ਇਲਾਵਾ ਜਿੱਥੇ ਕਿਸਾਨ ਨੂੰ ਦਸ ਥੈਲਿਆਂ ਦੀ ਲੋੜ ਹੈ, ਉਸ ਨੂੰ ਸਿਰਫ਼ ਇੱਕ ਥੈਲਾ ਹੀ ਮਿਲ ਰਿਹਾ ਹੈ, ਨਾਲ ਹੀ ਉਸ ਕਿਸਾਨ ਨੂੰ ਨਦੀਨਾਂ ਦੀ ਦਵਾਈ ਵੀ ਜ਼ਬਰਦਸਤੀ ਦਿੱਤੀ ਜਾ ਰਹੀ ਹੈ। ਇਸ ਦਾ ਫੈਸਲਾ ਸਰਕਾਰ ਨਹੀਂ ਕਰੇਗੀ, ਸਗੋਂ ਕਿਸਾਨ ਨੇ ਫੈਸਲਾ ਕਰਨਾ ਹੈ ਕਿ ਉਸ ਨੇ ਕਿਹੜੀ ਖਾਦ ਖੇਤ ਵਿੱਚ ਪਾਉਣੀ ਹੈ ਅਤੇ ਕਿਹੜੀ ਸਪਰੇਅ ਕਰਨੀ ਹੈ। ਆਪਣੇ ਜਵਾਬ ਵਿੱਚ ਖੇਤੀਬਾੜੀ ਮੰਤਰੀ ਨੇ ਖੁਦ ਮੰਨਿਆ ਹੈ ਕਿ ਪਹਿਲਾਂ 15 ਲੱਖ ਏਕੜ ਵਿੱਚ ਸਰ੍ਹੋਂ ਦੀ ਬਿਜਾਈ ਹੁੰਦੀ ਸੀ ਹੁਣ 19 ਲੱਖ ਏਕੜ ਵਿੱਚ ਬੀਜੀ ਜਾ ਚੁੱਕੀ ਹੈ। ਦੂਜੇ ਪਾਸੇ ਕਣਕ ਦੀ ਬਿਜਾਈ ਜੋ ਪਹਿਲਾਂ 58 ਲੱਖ ਏਕੜ ਰਕਬੇ ਵਿੱਚ ਹੁੰਦੀ ਸੀ, ਉਹ ਹੁਣ 57 ਲੱਖ ਏਕੜ ਵਿੱਚ ਹੋਈ ਹੈ, ਜਦੋਂ ਕਿ ਸਰਕਾਰ ਵੱਲੋਂ ਦਰਸਾਏ ਗਏ ਖਾਦ ਦੀ ਉਪਲਬਧਤਾ ਪਿਛਲੇ ਕੋਟੇ ਨਾਲੋਂ ਘੱਟ ਹੈ। ਅਜਿਹੇ ਵਿੱਚ ਸਰਕਾਰ ਵੱਲੋਂ ਲੋੜੀਂਦੀ ਮਾਤਰਾ ਵਿੱਚ ਖਾਦ ਉਪਲਬਧ ਹੋਣ ਦੇ ਦਾਅਵੇ ਖੋਖਲੇ ਸਾਬਤ ਹੋਏ ਹਨ।
ਕਿਸਾਨਾਂ ਨੂੰ ਕਣਕ ਦੀ ਬਿਜਾਈ ਲਈ ਦਿੱਤੀ ਜਾਣ ਵਾਲੀ ਡੀ.ਏ.ਪੀ ਖਾਦ ਵਿੱਚ ਨਾਈਟ੍ਰੋਜਨ ਦੀ ਮਾਤਰਾ ਸਿਰਫ਼ 9 ਫ਼ੀਸਦੀ ਹੈ, ਜਦੋਂ ਕਿ ਕਣਕ ਦੀ ਫ਼ਸਲ ਲਈ ਲੋੜੀਂਦੀ ਨਾਈਟ੍ਰੋਜਨ ਦੀ ਮਾਤਰਾ 50 ਫ਼ੀਸਦੀ ਹੈ। 41 ਫੀਸਦੀ ਦੀ ਕਮੀ ਯੂਰੀਆ ਨਾਲ ਪੂਰੀ ਹੁੰਦੀ ਹੈ। ਅੱਜ ਹਾਲਤ ਇਹ ਹੈ ਕਿ ਕਣਕ ਦੀ ਫ਼ਸਲ ਖਾਦ ਦੀ ਘਾਟ ਕਾਰਨ ਪੀਲੀ ਪੈ ਗਈ ਹੈ। ਜਿਹੜੀ ਫ਼ਸਲ 60-70 ਮਣ ਪ੍ਰਤੀ ਏਕੜ ਹੋਣੀ ਚਾਹੀਦੀ ਸੀ, ਉਹ ਹੁਣ ਘਟ ਕੇ 40 ਮਣ ਪ੍ਰਤੀ ਏਕੜ ਰਹਿ ਜਾਵੇਗੀ, ਜਿਸ ਦਾ ਸਿੱਧਾ ਅਸਰ ਕਿਸਾਨ ਦੀ ਆਮਦਨ ‘ਤੇ ਪਵੇਗਾ। ਖਾਦ ਦਾ ਥੈਲਾ ਪਹਿਲਾਂ 50 ਕਿਲੋ ਹੁੰਦਾ ਸੀ, ਹੁਣ ਭਾਜਪਾ ਸਰਕਾਰ ਵੇਲੇ ਇਸ ਨੂੰ 45 ਕਿਲੋ ਕਰ ਦਿੱਤਾ ਗਿਆ ਹੈ ਅਤੇ ਕੀਮਤ ਵਧਾ ਦਿੱਤੀ ਗਈ ਹੈ, ਜਿਸ ਕਾਰਨ ਕਿਸਾਨ ਨੂੰ ਦੋਹਰੀ ਮਾਰ ਝੱਲਣੀ ਪੈ ਰਹੀ ਹੈ। ਭਾਜਪਾ ਸਰਕਾਰ ‘ਤੇ ਕਾਲਾਬਾਜ਼ਾਰੀ ਕਰਨ ਵਾਲਿਆਂ ਨੂੰ ਸੁਰੱਖਿਆ ਦੇਣ ਦਾ ਦੋਸ਼ ਲਗਾਉਂਦੇ ਹੋਏ ਉਨ੍ਹਾਂ ਕਿਹਾ ਕਿ ਕੈਥਲ ਜ਼ਿਲ੍ਹੇ ਦੇ ਕਿਸਾਨਾਂ ਨੇ ਪੁਲਿਸ ਨੂੰ ਕਾਲਾਬਾਜ਼ਾਰੀ ਦੀ ਸ਼ਿਕਾਇਤ ਕੀਤੀ ਹੈ। ਪੁਲੀਸ ਨੇ ਛਾਪਾ ਮਾਰ ਕੇ ਖਾਦ ਫੜੀ ਅਤੇ ਵੰਡ ਦਿੱਤੀ। ਪਰ ਜਿਸ ਵਿਅਕਤੀ ਕੋਲੋਂ ਖਾਦ ਮਿਲੀ ਸੀ, ਉਸ ਵਿਰੁੱਧ ਨਾ ਤਾਂ ਐਫਆਈਆਰ ਦਰਜ ਕੀਤੀ ਗਈ ਅਤੇ ਨਾ ਹੀ ਕੋਈ ਕਾਨੂੰਨੀ ਕਾਰਵਾਈ ਕੀਤੀ ਗਈ। ਉਨ੍ਹਾਂ ਕਿਹਾ ਕਿ ਅਜਿਹੇ ਲੋਕਾਂ ਖ਼ਿਲਾਫ਼ ਤੁਰੰਤ ਐਫਆਈਆਰ ਦਰਜ ਕਰਕੇ ਕਾਰਵਾਈ ਕੀਤੀ ਜਾਵੇ।
