ਫਰੀਦਾਬਾਦ ਵਿਚ 200 ਫੁੱਟ ਡੂੰਘੇ ਬੋਰਵੈੱਲ ਵਿਚ ਡਿੱਗੀ 3 ਸਾਲਾ ਨੇਹਾ ਨੂੰ 10 ਘੰਟੇ ਚੱਲੇ ਰੈਸਕਿਊ ਆਪ੍ਰੇਸ਼ਨ ਮਗਰੋਂ ਸੋਮਵਾਰ ਸਵੇਰੇ 4 ਵਜੇ ਬਾਹਰ ਕੱਢਿਆ ਗਿਆ। ਬੱਚੀ ਦੇ ਸਰੀਰ ਵਿਚ ਕੋਈ ਹਲਚਲ ਨਹੀਂ ਸੀ। ਉਸ ਨੂੰ ਤੁਰੰਤ ਨਿੱਜੀ ਹਸਪਤਾਲ ਲਿਜਾਇਆ ਗਿਆ ਜਿਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਬੱਚੀ ਦੀ ਲਾਸ਼ ਦਾ ਪੋਸਟਮਾਰਟਮ ਕਰਵਾਇਆ ਜਾਵੇਗਾ। ਇਸ ਨਾਲ ਉਸ ਦੇ ਮੌਤ ਦੇ ਸਹੀ ਕਾਰਨਾਂ ਦਾ ਪਤਾ ਲੱਗੇਗਾ।
ਘਟਨਾ ਸੀਹੀ ਪਿੰਡ ਵਿਚ ਐਤਵਾਰ ਸ਼ਾਮ 7 ਵਜੇ ਵਾਪਰੀ। ਬੱਚੀ ਬੋਰਵੈੱਲ ਕੋਲ ਖੜ੍ਹੇ ਇਕ ਟਰੈਕਟਰ ‘ਤੇ ਚੜ੍ਹ ਕੇ ਖੇਡ ਰਹੀ ਸੀ। ਇਸ ਦੌਰਾਨ ਉਸ ਦਾ ਪੈਰ ਫਿਸਲ ਗਿਆ। ਬੋਰਵੈੱਲ ਨਗਰ ਨਿਗਮ ਦਾ ਸੀ ਤੇ ਲਗਭਗ 10 ਸਾਲਾਂ ਤੋਂ ਬੰਦ ਸੀ। ਕੁਝ ਦਿਨ ਪਹਿਲਾਂ ਹੀ ਉਸ ਦਾ ਢੱਕਣ ਹਟ ਗਿਆ ਸੀ।
ਹਾਦਸੇ ਦੀ ਸੂਚਨਾ ਮਿਲਦੇ ਹੀ NDRF ਤੇ SDRF ਨੇ ਰਾਹਤ ਤੇ ਬਚਾਅ ਕਾਰਜ ਸ਼ੁਰੂ ਕਰ ਦਿੱਤਾ ਸੀ। ਹਨ੍ਹੇਰਾ ਵੱਧ ਹੋਣ ਦੀ ਵਜ੍ਹਾ ਤੋਂ ਬੋਰਵੈੱਲ ਦੇ ਆਸ-ਪਾਸ ਲਾਈਟਾਂ ਲਗਾਈਆਂ ਗਈਆਂ। ਟੀਮ ਨੇ ਬੋਰਵੈੱਲ ਦੇ ਅੰਦਰ ਇਕ ਕੈਮਰਾ ਵੀ ਪਾਇਆ। ਵੀਡੀਓ ਅੰਦਰ ਪੱਥਰ ਦਿਖਾਈ ਦੇ ਰਹੇ ਸਨ ਤੇ ਬੱਚੀ ਦੇ ਰੋਣ ਦੀ ਵੀ ਆਵਾਜ਼ ਸੁਣਾਈ ਦਿੱਤੀ।
