ਚੰਡੀਗੜ੍ਹ, 1 ਜਨਵਰੀ 2022 – ਬੀ ਐੱਡ/ਈਟੀਟੀ ਅਤੇ ਟੈੱਟ ਪੇਪਰ ਪਾਸ ਕਰਨ ਮਗਰੋਂ, ਪੂਰਾ ਇਕ ਸਾਲ ਪੱਕੇ ਧਰਨੇ ਲਗਾਉਣ ਅਤੇ ਪੁਲਿਸ ਦਾ ਜ਼ਬਰ ਝੱਲਣ ਮਗਰੋਂ ਵੀ ਬੇਰੁਜ਼ਗਾਰ ਅਧਿਆਪਕਾਂ ਨੂੰ ਅਜੇ ਰੁਜ਼ਗਾਰ ਨਹੀਂ ਮਿਲਿਆ, ਉਹਨਾਂ ਦੇ ਹਾਲਾਤ ਨਹੀਂ ਬਦਲੇ। ਉਂਝ ਭਾਵੇਂ ਸਿੱਖਿਆ ਮੰਤਰੀ ਬਦਲ ਚੁੱਕੇ ਹਨ, ਧਰਨੇ ਦੀ ਜਗ੍ਹਾ ਸੰਗਰੂਰ ਅਤੇ ਪਟਿਆਲੇ ਤੋ ਬਦਲ ਕੇ ਖਰੜ, ਮੋਰਿੰਡਾ ਅਤੇ ਜਲੰਧਰ ਹੋ ਚੁੱਕੀ ਹੈ, ਇਕ ਹੋਰ ਕੈਲੰਡਰ ਬਦਲ ਚੁੱਕਾ ਹੈ, ਪ੍ਰੰਤੂ ਬੇਰੁਜ਼ਗਾਰਾਂ ਦੇ ਹਾਲਾਤ ਨਹੀਂ ਬਦਲੇ।
ਸਥਾਨਕ ਕੈਬਨਿਟ ਮੰਤਰੀ ਸ੍ਰੀ ਵਿਜੈ ਇੰਦਰ ਸਿੰਗਲਾ ਦੀ ਕੋਠੀ ਦੇ ਗੇਟ ਉੱਤੇ ਪਿਛਲੇ ਸਾਲ 31 ਦਸੰਬਰ ਦੀ ਸਵੇਰੇ ਬੇਰੁਜ਼ਗਾਰਾਂ ਦੀਆਂ ਪੰਜ ਬੇਰੁਜ਼ਗਾਰ ਜਥੇਬੰਦੀਆਂ ਉੱਤੇ ਆਧਾਰਿਤ “ਬੇਰੁਜ਼ਗਾਰ ਸਾਂਝੇ ਮੋਰਚੇ” ਨੇ ਅਚਾਨਕ ਧਾਵਾ ਬੋਲ ਕੇ ਪੱਕਾ ਮੋਰਚਾ ਲਗਾ ਦਿੱਤਾ ਸੀ। ਉਸ ਵੇਲੇ ਦੇ ਸਿੱਖਿਆ ਸਿੰਗਲਾ ਨੂੰ ਕਰੀਬ 9 ਮਹੀਨੇ ਆਪਣੀ ਕੋਠੀ ਤੋ ਦੂਰ ਰਹਿਣਾ ਪਿਆ, ਕਿਉਕਿ ਕੋਠੀ ਦੇ ਗੇਟ ਉੱਤੇ ਮੋਰਚਾ ਜਾਰੀ ਸੀ। ਇਸ ਤੋਂ ਇਲਾਵਾ ਜੇਕਰ ਕਦੇ ਕਦਾਈਂ ਸਿੱਖਿਆ ਮੰਤਰੀ ਸਥਾਨਕ ਸ਼ਹਿਰ ਵਿੱਚ, ਰੈਸਟ ਹਾਊਸ ਵਿਚ ਜਾ ਕਿਸੇ ਨੇੜਲੇ ਪਿੰਡ ਆਉਂਦੇ ਤਾਂ ਉਥੇ ਜਾ ਕੇ ਵੀ ਬੇਰੁਜ਼ਗਾਰਾਂ ਵੱਲੋੋਂ ਘਿਰਾਓ ਕੀਤਾ ਜਾਂਦਾ ਰਿਹਾ।
ਇਸੇ ਤਰ੍ਹਾਂ ਬੇਰੁਜ਼ਗਾਰ ਈਟੀਟੀ ਟੈੱਟ ਪਾਸ ਅਧਿਆਪਕਾਂ ਨੇ ਪਹਿਲਾਂ ਬਹੁਤ ਸਮਾਂ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੇ ਸ਼ਹਿਰ ਪਟਿਆਲਾ ਵਿਖੇ ਪੱਕੇ ਮੋਰਚੇ ਅਤੇ ਧਰਨੇ ਜਾਰੀ ਰੱਖੇ, ਮੋਤੀ ਮਹਿਲ, ਸਿਸਵਾਂ ਫ਼ਾਰਮ ਦੇ ਘਿਰਾਓ ਕੀਤੇ, ਉਥੇ ਹੁਣ ਇਹ ਬੇਰੁਜ਼ਗਾਰ ਅਧਿਆਪਕ ਖਰੜ ਵਿਖੇ ਟੈਂਕੀ ਤੇ ਚੜ੍ਹੇ ਹੋਏ ਹਨ ਅਤੇ ਪੱਕਾ ਮੋਰਚਾ ਜਾਰੀ ਹੈ।
ਸਿੰਗਲਾ ਦੀ ਬਜਾਏ ਪ੍ਰਗਟ ਸਿੰਘ ਦੇ ਸਿੱਖਿਆ ਮੰਤਰੀ ਬਣਨ ਮਗਰੋਂ ਬੇਰੁਜ਼ਗਾਰ ਬੀ ਐੱਡ ਟੈੱਟ ਪਾਸ ਅਧਿਆਪਕਾਂ ਨੇ 28 ਅਕਤੂਬਰ ਤੋਂ ਆਉਣਾ ਰੁੱਖ ਜਲੰਧਰ ਵੱਲ ਕੀਤਾ। ਹੁਣ 28 ਅਕਤੂਬਰ ਤੋਂ ਬੱਸ ਸਟੈਂਡ ਜਲੰਧਰ ਦੀ ਪਾਣੀ ਵਾਲੀ ਟੈਂਕੀ ਉੱਤੇ ਦੋ ਬੇਰੁਜ਼ਗਾਰ ਬੀ ਐੱਡ ਅਧਿਆਪਕ ਮੁਨੀਸ਼ ਕੁਮਾਰ ਅਤੇ ਜਸਵੰਤ ਘੁਬਾਇਆ (ਦੋਵੇਂ ਜ਼ਿਲ੍ਹਾ ਫਾਜ਼ਿਲਕਾ) ਬੈਠੇ ਹੋਏ ਹਨ, ਜਿਨ੍ਹਾਂ ਨੂੰ ਕਰੀਬ ਸਵਾ ਦੋ ਮਹੀਨੇ ਹੋ ਚੁੱਕੇ ਹਨ।
ਪਹਿਲਾਂ ਬੇਰੁਜ਼ਗਾਰ ਅਨੇਕਾਂ ਵਾਰ ਮੋਤੀ ਮਹਿਲ ਅੱਗੇ ਪਟਿਆਲਾ ਵਿਖੇ, ਹੁਣ ਵਾਰ ਵਾਰ ਮੋਰਿੰਡਾ ਜਾ ਰਹੇ ਹਨ।
ਭਾਵੇਂ ਸਾਲ ਬਦਲ ਚੁੱਕਾ ਹੈ, ਸਿੱਖਿਆ ਮੰਤਰੀ ਅਤੇ ਮੁੱਖ ਮੰਤਰੀ ਵੀ ਬਦਲ ਚੁੱਕੇ ਹਨ। ਸਥਾਨਕ ਸਿਵਲ ਹਸਪਤਾਲ ਦੀ ਪਾਣੀ ਵਾਲੀ ਟੈਂਕੀ ਤੋ 28 ਅਕਤੂਬਰ ਨੂੰ ਬਦਲ ਕੇ ਮੁਨੀਸ਼ ਜਲੰਧਰ ਜਾ ਚੁੱਕਾ ਹੈ, ਪ੍ਰੰਤੂ ਅਜੇ ਤੱਕ ਬੇਰੁਜ਼ਗਾਰਾਂ ਦੀ ਗੱਲ ਨਹੀਂ ਸੁਣੀ ਗਈ। ਉਨ੍ਹਾਂ ਦੇ ਹਾਲਾਤ ਨਹੀਂ ਬਦਲੇ।
ਬੇਰੁਜ਼ਗਾਰ ਬੀ ਐੱਡ ਟੈੱਟ ਪਾਸ ਅਧਿਆਪਕ ਯੂਨੀਅਨ ਦੇ ਸੂਬਾ ਪ੍ਰਧਾਨ ਸੁਖਵਿੰਦਰ ਸਿੰਘ ਢਿੱਲਵਾਂ ਦਾ ਕਹਿਣਾ ਹੈ ਕਿ ਆਜ਼ਾਦੀ ਦੇ 75 ਸਾਲਾਂ ਮਗਰੋਂ ਵੀ ਰੁਜ਼ਗਾਰ ਵਾਲੀ ਮੁੱਢਲੀ ਮੰਗ ਵੀ ਅਜੇ ਤੱਕ ਪੂਰੀ ਨਹੀਂ ਹੋਈ ਸਗੋਂ ਸਰਕਾਰਾਂ ਦੀਆਂ ਮਾਰੂ ਨੀਤੀਆਂ ਕਾਰਨ ਨੌਜਵਾਨੀ ਹਿਜ਼ਰਤ ਕਰ ਰਹੀ ਹੈ।
ਈਟੀਟੀ ਟੈੱਟ ਪਾਸ ਬੇਰੁਜ਼ਗਾਰ ਅਧਿਆਪਕ ਯੂਨੀਅਨ ਦੇ ਸੂਬਾ ਪ੍ਰਧਾਨ ਦੀਪਕ ਕੰਬੋਜ਼ ਨੇ ਕਿਹਾ ਕਿ ਕਾਂਗਰਸ ਨੇ ਘਰ-ਘਰ ਰੁਜ਼ਗਾਰ ਦਾ ਚੋਣ ਵਾਅਦਾ ਕਰਕੇ ਵੀ ਬੇਰੁਜ਼ਗਾਰਾਂ ਨੂੰ ਰੁਜ਼ਗਾਰ ਦੀ ਬਜਾਏ ਪਰਚਿਆਂ ਅਤੇ ਡਾਂਗਾ ਨਾਲ ਨਿਵਾਜਿਆ ਹੈ। ਉਨ੍ਹਾਂ ਆਉਂਦੇ ਸਾਲ ਵੀ ਜ਼ੋਰਦਾਰ ਸੰਘਰਸ਼ ਦਾ ਐਲਾਨ ਕੀਤਾ।
