ਵਨਡੇ ਵਿਸ਼ਵ ਕੱਪ 2023 ਦਾ ਸਮਾਪਤੀ ਸਮਾਰੋਹ ਫਾਈਨਲ ਮੈਚ ਦੇ ਦਿਨ ਐਤਵਾਰ ਨੂੰ ਹੀ ਹੋਵੇਗਾ। ਸਮਾਗਮ ਦੇ ਪ੍ਰੋਗਰਾਮ ਚਾਰ ਪੜਾਵਾਂ ਵਿੱਚ ਹੋਣਗੇ। ਜੋ ਕਿ ਪ੍ਰੀ-ਮੈਚ ‘ਚ ਹੋਵੇਗਾ, ਪਹਿਲੀ ਪਾਰੀ ਦਾ ਡ੍ਰਿੰਕਸ ਬ੍ਰੇਕ, ਪਾਰੀ ਦਾ ਬ੍ਰੇਕ ਅਤੇ ਦੂਜੀ ਪਾਰੀ ਦਾ ਡ੍ਰਿੰਕਸ ਬ੍ਰੇਕ। ਬਾਲੀਵੁੱਡ ਸੰਗੀਤਕਾਰ-ਗਾਇਕ ਪ੍ਰੀਤਮ, ਅਮਿਤ ਮਿਸ਼ਰਾ ਸਮੇਤ ਕਈ ਕਲਾਕਾਰ ਇਸ ‘ਚ ਪਰਫਾਰਮ ਕਰਨਗੇ। ਜਾਣਕਾਰੀ ਮੁਤਾਬਿਕ ਅਮਿਤਾਭ ਬੱਚਨ, ਰਜਨੀਕਾਂਤ, ਕਮਲ ਹਾਸਨ, ਮੋਹਨ ਲਾਲ, ਵੈਂਕਟੇਸ਼, ਨਾਗਾਰਜੁਨ ਅਤੇ ਰਾਮ ਚਰਨ ਤੇਜਾ ਫਾਈਨਲ ਮੈਚ ਦੇਖਣ ਲਈ ਐਤਵਾਰ ਨੂੰ ਨਰਿੰਦਰ ਮੋਦੀ ਸਟੇਡੀਅਮ ਪਹੁੰਚਣਗੇ।
ਵਿਸ਼ਵ ਕੱਪ 2023 ਦਾ ਫਾਈਨਲ ਮੈਚ ਮੇਜ਼ਬਾਨ ਭਾਰਤ ਅਤੇ ਆਸਟ੍ਰੇਲੀਆ ਵਿਚਾਲੇ 19 ਨਵੰਬਰ ਨੂੰ ਖੇਡਿਆ ਜਾਵੇਗਾ। ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (ਬੀ.ਸੀ.ਸੀ.ਆਈ.) ਨੇ ਵਿਸ਼ਵ ਕੱਪ ਫਾਈਨਲ ਦੇ ਦਿਨ ਹੋਣ ਵਾਲੇ ਸਾਰੇ ਪ੍ਰੋਗਰਾਮਾਂ ਬਾਰੇ ਆਪਣੇ ਅਧਿਕਾਰਤ ਐਕਸ (ਟਵਿੱਟਰ) ਅਕਾਊਂਟ ਤੋਂ ਇੱਕ ਪੋਸਟ ਸਾਂਝੀ ਕੀਤੀ ਹੈ।
ਮੈਚ ਦੀ ਪਹਿਲੀ ਪਾਰੀ ਦੇ ਡਰਿੰਕਸ ਬ੍ਰੇਕ ਦੌਰਾਨ ਆਦਿਤਿਆ ਗੜਵੀ ਪਰਫਾਰਮ ਕਰਨਗੇ। ਆਦਿਤਿਆ ਦਾ ਇੱਕ ਗੀਤ (ਖਲਾਸੀ) ਹਾਲ ਹੀ ਵਿੱਚ ਕਾਫੀ ਮਸ਼ਹੂਰ ਹੋਇਆ ਹੈ। ਇੰਸਟਾਗ੍ਰਾਮ ਰੀਲਸ ‘ਚ ਵੀ ਇਸ ਦੀ ਕਾਫੀ ਵਰਤੋਂ ਕੀਤੀ ਜਾ ਰਹੀ ਹੈ।
ਸੰਗੀਤ ਨਿਰਦੇਸ਼ਕ ਪ੍ਰੀਤਮ ਚੱਕਰਵਰਤੀ ਮੈਚ ਵਿੱਚ ਪਾਰੀ ਦੇ ਬ੍ਰੇਕ ਦੌਰਾਨ ਇੱਕ ਸੰਗੀਤ ਸ਼ੋਅ ਵਿੱਚ ਆਪਣੀ ਟੀਮ ਦੀ ਅਗਵਾਈ ਕਰਨਗੇ। ਇਸ ਦੌਰਾਨ ਜੋਨੀਤਾ ਗਾਂਧੀ, ਨਕਸ਼ ਅਜ਼ੀਜ਼, ਅਮਿਤ ਮਿਸ਼ਰਾ, ਅਕਾਸਾ ਸਿੰਘ ਅਤੇ ਤੁਸ਼ਾਰ ਜੋਸ਼ੀ ਵੀ ਲੋਕਾਂ ਦਾ ਮਨੋਰੰਜਨ ਕਰਨਗੇ।
ਦੂਜੀ ਪਾਰੀ ਦੇ ਡਰਿੰਕਸ ਬ੍ਰੇਕ ਦੌਰਾਨ ਲੇਜ਼ਰ ਅਤੇ ਲਾਈਟ ਸ਼ੋਅ ਹੋਵੇਗਾ। ਇਸ ਪੂਰੇ ਵਿਸ਼ਵ ਕੱਪ ਦੌਰਾਨ ਦੂਜੀ ਪਾਰੀ ਵਿੱਚ ਡ੍ਰਿੰਕਸ ਬ੍ਰੇਕ ਦੌਰਾਨ ਲੇਜ਼ਰ ਸ਼ੋਅ ਦਾ ਆਯੋਜਨ ਕੀਤਾ ਗਿਆ ਹੈ, ਫਾਈਨਲ ਵਿੱਚ ਵੀ ਅਜਿਹਾ ਹੀ ਹੋਵੇਗਾ।