ਮਨੋਰੰਜਨ ਜਗਤ ਤੋਂ ਇੱਕ ਮੰਦਭਾਗੀ ਖ਼ਬਰ ਸਾਹਮਣੇ ਆਈ ਹੈ। ਅਦਾਕਾਰਾ ਮਹਿਮਾ ਚੌਧਰੀ ਦੀ ਮਾਂ ਨੇ ਦੁਨੀਆ ਨੂੰ ਅਲਵਿਦਾ ਕਹਿ ਦਿੱਤਾ ਹੈ। ਈ ਟਾਈਮਜ਼ ਦੀ ਰਿਪੋਰਟ ਮੁਤਾਬਕ ਮਹਿਮਾ ਦੀ ਮਾਂ ਕੁਝ ਮਹੀਨਿਆਂ ਤੋਂ ਬੀਮਾਰ ਸੀ। ਇਸ ਦੌਰਾਨ ਅਚਾਨਕ ਮਹਿਮਾ ਦੀ ਮਾਂ ਨੂੰ ਸਾਹ ਸੰਬੰਧੀ ਦਿੱਕਤ ਆਈ ਅਤੇ ਉਨ੍ਹਾਂ ਨੇ ਦੁਨੀਆ ਨੂੰ ਅਲਵਿਦਾ ਕਹਿ ਦਿੱਤਾ। ਮਹਿਮਾ ਅਤੇ ਉਸਦੀ ਧੀ ਅਰਿਆਨਾ ਦੋਵੇਂ ਇਸ ਸਮੇਂ ਕਾਫੀ ਦੁਖੀ ਹਨ। ਅਦਾਕਾਰਾ ਅਤੇ ਚੌਧਰੀ ਪਰਿਵਾਰ ਦੇ ਅਧਿਕਾਰਤ ਬਿਆਨ ਦਾ ਅਜੇ ਇੰਤਜ਼ਾਰ ਹੈ।
ਦੱਸ ਦਈਏ ਕਿ ਮਹਿਮਾ ਦੀ ਆਪਣੀ ਮਾਂ ਨਾਲ ਇਕ ਖਾਸ ਸਾਂਝ ਸੀ। ਉਹ ਅਕਸਰ ਆਪਣੇ ਸੋਸ਼ਲ ਮੀਡੀਆ ‘ਤੇ ਥ੍ਰੋਬੈਕ ਪਰਿਵਾਰਕ ਤਸਵੀਰਾਂ ਸ਼ੇਅਰ ਕਰਦੀ ਰਹਿੰਦੀ ਹੈ। ਇਸ ਤੋਂ ਪਹਿਲਾਂ ਮਹਿਮਾ ਦੇ ਕੈਂਸਰ ਬਾਰੇ ਵੀ ਜਾਣਕਾਰੀ ਸਾਹਮਣੇ ਆਈ ਸੀ। ਮਹਿਮਾ ਚੌਧਰੀ ਦੇ ਕੈਂਸਰ ਦਾ ਖੁਲਾਸਾ ਅਨੁਪਮ ਖੇਰ ਨੇ 9 ਜੂਨ 2022 ਨੂੰ ਕੀਤਾ ਸੀ। ਫਿਲਮ ‘ਸਿਗਨੇਚਰ’ ਦੌਰਾਨ ਮਹਿਮਾ ਚੌਧਰੀ ਨੇ ਅਨੁਪਮ ਖੇਰ ਨਾਲ ਆਪਣਾ ਦਰਦ ਸਾਂਝਾ ਕੀਤਾ ਅਤੇ ਦੱਸਿਆ ਕਿ ਉਹ ਬ੍ਰੈਸਟ ਕੈਂਸਰ ਵਰਗੀ ਸਮੱਸਿਆ ਤੋਂ ਪੀੜਤ ਹੈ। ਅਦਾਕਾਰਾ ਨੇ ਇਹ ਵੀ ਦੱਸਿਆ ਸੀ ਕਿ ਉਸ ਦਾ ਇਲਾਜ ਚੱਲ ਰਿਹਾ ਹੈ। ਕੈਂਸਰ ਵਰਗੀ ਵੱਡੀ ਸਮੱਸਿਆ ਨਾਲ ਜੂਝਦਿਆਂ ਮਹਿਮਾ ਵੱਲੋਂ ਦਿਖਾਈ ਗਈ ਹਿੰਮਤ ਸ਼ਲਾਘਾਯੋਗ ਹੈ।