ਬਾਲੀਵੁੱਡ ਇੰਡਸਟਰੀ ਦੇ ਮੰਨੇ-ਪ੍ਰਮੰਨੇ ਅਭਿਨੇਤਾ ਨਸੀਰੂਦੀਨ ਸ਼ਾਹ ਅਕਸਰ ਆਪਣੇ ਬਿਆਨਾਂ ਨੂੰ ਲੈ ਕੇ ਚਰਚਾ ‘ਚ ਰਹਿੰਦੇ ਹਨ। ਉਹ ਕਈ ਵਾਰ ਧਾਰਮਿਕ ਮੁੱਦਿਆਂ ‘ਤੇ ਆਪਣੀ ਰਾਏ ਪੇਸ਼ ਕਰ ਚੁੱਕੇ ਹਨ ਅਤੇ ਹੁਣ ਉਨ੍ਹਾਂ ਨੇ ਮੁਸਲਮਾਨਾਂ ‘ਤੇ ਅਜਿਹਾ ਬਿਆਨ ਦਿੱਤਾ ਹੈ, ਜੋ ਚਰਚਾ ‘ਚ ਆ ਗਿਆ ਹੈ। ਇੰਟਰਵਿਊ ‘ਚ ਉਨ੍ਹਾਂ ਕਿਹਾ, ‘ਮੁਸਲਮਾਨਾਂ ‘ਚ ਡਰ ਪੈਦਾ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ ਪਰ ਮੁਸਲਮਾਨ ਹਾਰ ਨਹੀਂ ਮੰਨਣਗੇ।
ਮੁਸਲਮਾਨ ਇਸ ਦਾ ਸਾਹਮਣਾ ਕਰਨਗੇ ਕਿਉਂਕਿ ਅਸੀਂ ਆਪਣਾ ਘਰ ਬਚਾਉਣਾ ਹੈ, ਅਸੀਂ ਆਪਣੀ ਮਾਤ ਭੂਮੀ ਨੂੰ ਬਚਾਉਣਾ ਹੈ, ਅਸੀਂ ਆਪਣੇ ਪਰਿਵਾਰ ਨੂੰ ਬਚਾਉਣਾ ਹੈ, ਅਸੀਂ ਆਪਣੇ ਬੱਚਿਆਂ ਨੂੰ ਬਚਾਉਣਾ ਹੈ। ਨਸੀਰੂਦੀਨ ਸ਼ਾਹ ਨੇ ਇਸ ਨਿੱਜੀ ਚੈਨਲ ਨੂੰ ਦਿੱਤੇ ਬਿਆਨ ‘ਚ ਕਿਹਾ ਕਿ ‘ਸਮੇਂ-ਸਮੇਂ ‘ਤੇ ਮੁਗਲਾਂ ਦੇ ਕਥਿਤ ਜ਼ੁਲਮਾਂ ਨੂੰ ਉਜਾਗਰ ਕੀਤਾ ਜਾਂਦਾ ਹੈ। ਨਸੀਰੂਦੀਨ ਸ਼ਾਹ ਨੇ ਧਰਮ ਸੰਸਦ ‘ਤੇ ਇਸ ਇੰਟਰਵਿਊ ‘ਚ ਕਿਹਾ ਕਿ ਹੁਣ ਜੋ ਕੁਝ ਹੋ ਰਿਹਾ ਹੈ, ਉਸ ਨੂੰ ਦੇਖ ਕੇ ਮੈਂ ਬਹੁਤ ਹੈਰਾਨ ਹਾਂ। ਸ਼ਾਇਦ ਉਨ੍ਹਾਂ ਨੂੰ ਇਹ ਵੀ ਨਹੀਂ ਪਤਾ ਕਿ ਉਹ ਕਿਸ ਬਾਰੇ ਗੱਲ ਕਰ ਰਹੇ ਹਨ ਅਤੇ ਕਿਸ ਨੂੰ ਬੁਲਾ ਰਹੇ ਹਨ। ਇਹ ਇੱਕ ਤਰ੍ਹਾਂ ਨਾਲ ਘਰੇਲੂ ਯੁੱਧ ਵਾਂਗ ਹੋਵੇਗਾ। ਅੱਗੇ ਨਸੀਰੂਦੀਨ ਸ਼ਾਹ ਨੇ ਕਿਹਾ, ‘ਅਸੀਂ 20 ਕਰੋੜ ਲੋਕਾਂ ਨਾਲ ਲੜਾਂਗੇ। ਇਹ ਸਥਾਨ ਸਾਡੇ 20 ਕਰੋੜ ਲੋਕਾਂ ਲਈ ਮਾਤ ਭੂਮੀ ਹੈ।
ਅਸੀਂ ਇੱਥੋਂ ਦੇ ਹੀ 20 ਕਰੋੜ ਲੋਕ ਹਾਂ। ਅਸੀਂ ਇੱਥੇ ਪੈਦਾ ਹੋਏ ਸੀ। ਸਾਡੇ ਪਰਿਵਾਰ ਅਤੇ ਕਈ ਪੀੜ੍ਹੀਆਂ ਇੱਥੇ ਹੀ ਵਸੀਆਂ ਹਨ ਅਤੇ ਸਾਡੇ ਲੋਕ ਵੀ ਇਸ ਮਿੱਟੀ ਵਿੱਚ ਮਿਲ ਗਏ ਹਨ। ਇਹ ਉਹ ਲੋਕ ਹਨ ਜਿਨ੍ਹਾਂ ਨੇ ਦੇਸ਼ ਵਿੱਚ ਸਥਾਈ ਸਮਾਰਕ ਬਣਾਏ ਹਨ, ਜਿਨ੍ਹਾਂ ਦੇ ਸੱਭਿਆਚਾਰ ਵਿੱਚ ਨਾਚ, ਗੀਤ, ਚਿੱਤਰਕਾਰੀ, ਸਾਹਿਤ ਹੈ। ਮੁਗਲ ਇਸ ਨੂੰ ਆਪਣਾ ਵਤਨ ਬਣਾਉਣ ਲਈ ਇੱਥੇ ਆਏ ਸਨ। ਮੁਗਲ, ਤੁਸੀਂ ਚਾਹੋ ਤਾਂ ਉਨ੍ਹਾਂ ਨੂੰ ਸ਼ਰਨਾਰਥੀ ਕਹਿ ਸਕਦੇ ਹੋ। ਨਸੀਰੂਦੀਨ ਸ਼ਾਹ ਦੇ ਇਸ ਬਿਆਨ ‘ਤੇ ਕਈ ਲੋਕ ਉਨ੍ਹਾਂ ਨੂੰ ਘੇਰ ਰਹੇ ਹਨ ਅਤੇ ਜੰਮ ਕੇ ਉਨ੍ਹਾਂ ਦੀ ਆਲੋਚਨਾ ਕਰ ਰਹੇ ਹਨ ।
