ਮਿਲਾਨ ਇਟਲੀ (ਨਿਰਮਲ ਸਿੰਘ ਕਪੂਰਥਲਾ ) – ਦੁਨੀਆਂ ਦੇ ਹਰ ਖੇਤਰ ਵਿਚ ਮੱਲਾਂ ਮਾਰਨ ਵਾਲੇ ਪੰਜਾਬੀਆਂ ਦੇ ਸੁਨਿਹਰੀ ਇਤਿਹਾਸ ਨੂੰ ਦੁਹਰਾਉਦਿਆਂ ਇਟਲੀ ‘ਚ 9 ਸਾਲਾ ਨਿੱਕੇ ਸਰਦਾਰ ਪ੍ਰਭਏਕ ਸਿੰਘ ਨੇ ਵੱਡਾ ਜ਼ੋਰ ਵਿਖਾਉਦਿਆਂ ਸਭ ਨੂੰ ਹੈਰਾਨ ਕਰ ਦਿੱਤਾ। ਪ੍ਰਭਏਕ ਸਿੰਘ ਨੇ ਆਪਣੇ ਲੱਕ ਨਾਲ ਰੱਸਾ ਬੰਨ ਕੇ ਕਾਰ ਖਿੱਚਣ ਦਾ ਕਾਰਨਾਮਾ ਕਰ ਕੇ ਵਿਖਾਇਆ ਹੈ।
ਜਾਣਕਾਰੀ ਅਨੁਸਾਰ ਇਟਲੀ ਦਾ ਵਸਨੀਕ ਪ੍ਰਭਏਕ ਸਿੰਘ ਨੇ ਬੁਲੰਦ ਹੌਸਲੇ ਅਤੇ ਦ੍ਰਿੜ ਇਰਾਦੇ ਨਾਲ ਗੱਡੀ ਨੂੰ ਖਿੱਚ ਕੇ ਲੋਕਾਂ ਦੇ ਦਿਲ ਜਿੱਤ ਲਏ ਹਨ।ਦਸ ਦਈਏ ਕਿ ਪੰਜਾਬ ਦੇ ਜ਼ਿਲਾ ਅੰਮ੍ਰਿਤਸਰ ਦੇ ਪਿੰਡ ਸਠਿਆਲਾ ਦੇ ਜੰਮਪਲ ਅਮਨਦੀਪ ਸਿੰਘ ਦਾ ਹੋਣਹਾਰ ਫਰਜ਼ੰਦ ਪ੍ਰਭਏਕ ਸਿੰਘ ਜਿਸਦੀ ਉਮਰ ਮਹਿਜ਼ 9 ਸਾਲ ਹੈ, ਉਹ ਰੱਸੀ ਨੂੰ ਆਪਣੇ ਪੇਟ ਨਾਲ ਬੰਨ ਕੇ ਗੱਡੀ ਖਿੱਚ ਲੈਂਦਾ ਹੈ।ਜਿਸਨੂੰ ਦੇਖਕੇ ਆਸ–ਪਾਸ ਦੇ ਲੋਕ ਹੈਰਾਨ ਹਨ।
ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਬੱਚੇ ਦੇ ਪਿਤਾ ਨੇ ਦੱਸਿਆਂ ਕਿ ਉਨਾਂ ਦਾ ਬੇਟਾ ਪ੍ਰਭਏਕ ਸਿੰਘ ਪੜਾਈ ਦੇ ਨਾਲ –ਨਾਲ ਖੇਡਾਂ ਵਿਚ ਵੀ ਧਿਆਨ ਦੇ ਰਿਹਾ ਹੈ। ਉਹ ਹਰ ਰੋਜ਼ ਡੰਡ ਬੈਠਕਾਂ ਮਾਰਦਾ ਹੈ ਅਤੇ ਪਿਛਲੇ ਕਾਫੀ ਸਮੇਂ ਤੋਂ ਉਨਾਂ ਦਾ ਬੇਟਾ ਗੱਡੀ ਨੂੰ ਰੱਸੇ ਨਾਲ ਖਿੱਚ ਕੇ ਕਾਫੀ ਅੱਗੇ ਤੱਕ ਰੋੜ ਕੇ ਲੈ ਜਾਂਦਾ ਹੈ, ਉਨਾਂ ਦਾ ਕਹਿਣਾ ਹੈ ਕਿ ਉਹ ਆਪਣੇ ਬੇਟੇ ਨੂੰ ਇਕ ਖਿਡਾਰੀ ਬਣਦਾ ਦੇਖਣਾ ਚਾਹੁੰਦੇ ਹਨ, ਉਨਾਂ ਦੱਸਿਆ ਕਿ ਉਨਾਂ ਦਾ ਬੇਟਾ ਫੁੱਟਬਾਲ ਵੀ ਖੇਡ ਲੈਂਦਾ ਹੈ ਅਤੇ ਹੋਰ ਵੀ ਖੇਡਾਂ ਵਿਚ ਰੁੱਚੀ ਰੱਖਦਾ ਹੈ। ਉਨਾਂ ਦੱਸਿਆ ਕਿ ਜੇਕਰ ਕੋਈ ਕਲੱਬ ਉਨਾਂ ਨਾਲ ਸੰਪਰਕ ਕਰਦਾ ਹੈ ਤਾਂ ਉਹ ਅੱਗੇ ਹੋਰ ਵੀ ਮੁਕਾਬਲਿਆਂ ਲਈ ਆਪਣੇ ਬੱਚੇ ਨੂੰ ਤਿਆਰ ਕਰਨਗੇ, ਇਥੇ ਇਹ ਵੀ ਦੱਸਣਯੋਗ ਹੈ ਕਿ ਪਿਛਲੇ ਸਾਲ ਲੇਨੋ (ਇਟਲੀ) ਵਿਖੇ ਹੋਏ ਵਾਲੀਬਾਲ ਦੇ ਮੁਕਾਬਲਿਆਂ ਵਿਚ ਇਸ 9 ਸਾਲਾਂ ਬੱਚੇ ਨੇ 125 ਡੰਡ ਬੈਠਕਾਂ ਮਾਰ ਸਾਰੇ ਦਰਸ਼ਕਾਂ ਦਾ ਧਿਆਨ ਆਪਣੇ ਵੱਲ ਖਿੱਚ ਲਿਆ ਸੀ।