ਮੁੰਬਈ ਏਅਰਪੋਰਟ ‘ਤੇ ਜਹਾਜ਼ ਦੀ ਲੈਂਡਿੰਗ ਦੌਰਾਨ ਫਲੇਮਿੰਗੋ ਪੰਛੀਆਂ ਦਾ ਝੁੰਡ ਜਹਾਜ਼ ਨਾਲ ਟਕਰਾ ਗਿਆ। ਜਿਸ ਦੌਰਾਨ 29 ਪੰਛੀਆਂ ਦੀ ਮੌਤ ਹੋ ਗਈ। ਜਾਣਕਾਰੀ ਮੁਤਾਬਕ ਮੁੰਬਈ ਏਅਰਪੋਰਟ ‘ਤੇ ਅਮੀਰਾਤ ਦੀ ਫਲਾਈਟ ਨੰਬਰ EK 508 ਦੀ ਲੈਂਡਿੰਗ ਦੌਰਾਨ ਇਹ ਹਾਦਸਾ ਵਾਪਰਿਆ। ਦੱਸਿਆ ਗਿਆ ਕਿ ਪੰਛੀਆਂ ਦੀ ਟੱਕਰ ਕਾਰਨ ਲੈਂਡਿੰਗ ‘ਤੇ ਕੋਈ ਅਸਰ ਨਹੀਂ ਪਿਆ।
ਜੰਗਲਾਤ ਵਿਭਾਗ ਦੇ ਅਨੁਸਾਰ, ਸੋਮਵਾਰ, 20 ਮਈ ਦੀ ਰਾਤ ਨੂੰ ਘਾਟਕੋਪਰ ਦੇ ਪੰਤਨਗਰ ਦੇ ਲਕਸ਼ਮੀ ਨਗਰ ਖੇਤਰ ਵਿੱਚ ਫਲੇਮਿੰਗੋ ਦਾ ਝੁੰਡ ਅਮੀਰਾਤ ਦੀ ਇੱਕ ਉਡਾਣ ਨਾਲ ਟਕਰਾ ਗਿਆ। ਮੈਂਗਰੋਵ ਪ੍ਰੋਟੈਕਸ਼ਨ ਸੈੱਲ ਦੇ ਦੀਪਕ ਖਾੜੇ ਨੇ ਦੱਸਿਆ ਕਿ ਏਅਰਪੋਰਟ ਅਥਾਰਟੀ ਨੇ ਪੰਛੀਆਂ ਦੀ ਮੌਤ ਦੀ ਪੁਸ਼ਟੀ ਕੀਤੀ ਹੈ।
ਨੇਚਰ ਕਨੈਕਟ ਫਾਊਂਡੇਸ਼ਨ ਦੇ ਡਾਇਰੈਕਟਰ ਬੀ ਐਨ ਕੁਮਾਰ ਨੇ ਕਿਹਾ ਕਿ ਜੰਗਲਾਤ ਵਿਭਾਗ ਨੂੰ ਸੂਚਿਤ ਕੀਤਾ ਗਿਆ ਅਤੇ ਉਨ੍ਹਾਂ ਨੇ ਰਾਤ ਨੂੰ ਮਰੇ ਹੋਏ ਪੰਛੀਆਂ ਨੂੰ ਇਕੱਠਾ ਕੀਤਾ। ਉਨ੍ਹਾਂ ਨੇ ਕਿਹਾ, ‘ਇਹ ਪੂਰੀ ਤਰ੍ਹਾਂ ਹੈਰਾਨ ਕਰਨ ਵਾਲਾ ਹੈ ਕਿਉਂਕਿ ਮੁੰਬਈ ‘ਚ ਪਹਿਲਾਂ ਕਦੇ ਇਸ ਪੈਮਾਨੇ ‘ਤੇ ਪੰਛੀ ਦੁਰਘਟਨਾ ਨਹੀਂ ਹੋਈ। ਅਟਲ ਸੇਤੂ ਵਰਗੇ ਵੱਡੇ ਨਿਰਮਾਣ ਪ੍ਰੋਜੈਕਟਾਂ ਕਾਰਨ ਫਲੇਮਿੰਗੋ ਆਪਣੇ ਉਡਾਣ ਦੇ ਰਸਤੇ ਬਦਲਦੇ ਹੋਏ ਦੇਖੇ ਗਏ ਹਨ। ਇਸ ਹਾਦਸੇ ਦੀ ਡੂੰਘਾਈ ਨਾਲ ਜਾਂਚ ਦੀ ਲੋੜ ਹੈ।