ਪਾਕਿਸਤਾਨੀ ਫੌਜ ‘ਚ ਦੋ ਹਿੰਦੂ ਅਫਸਰਾਂ ਵੱਲੋਂ ਇਤਿਹਾਸ ਰਚਿਆ ਗਿਆ ਹੈ। ਅਜਿਹਾ ਪਹਿਲੀ ਵਾਰ ਹੋਇਆ ਹੈ ਜਦ ਦੋ ਹਿੰਦੂ ਅਫਸਰਾਂ ਨੂੰ ਲੈਫਟੀਨੈਂਟ ਕਰਨਲ ਦੇ ਅਹੁਦੇ ‘ਤੇ ਨਿਯੁਕਤ ਕੀਤਾ ਗਿਆ ਹੋਵੇ। ਮੇਜਰ ਡਾਕਟਰ ਕੈਲਾਸ਼ ਕੁਮਾਰ ਅਤੇ ਮੇਜਰ ਡਾਕਟਰ ਅਨਿਲ ਕੁਮਾਰ ਨੂੰ ਪਾਕਿਸਤਾਨ ਆਰਮੀ ਪ੍ਰਮੋਸ਼ਨ ਬੋਰਡ ਵੱਲੋਂ ਪ੍ਰਮੋਸ਼ਨ ਨੂੰ ਹਰੀ ਝੰਡੀ ਦਿੱਤੇ ਜਾਣ ਤੋਂ ਬਾਅਦ ਲੈਫਟੀਨੈਂਟ ਕਰਨਲ ਦੇ ਅਹੁਦੇ ਉੱਤੇ ਤਰੱਕੀ ਦਿੱਤੀ ਗਈ ਹੈ। ਪਾਕਿਸਤਾਨ ਦੇ ਸਰਕਾਰੀ ਮੀਡੀਆ ਨੇ ਇਹ ਜਾਣਕਾਰੀ ਸਾਂਝੀ ਕੀਤੀ ਹੈ।
ਵੀਰਵਾਰ ਨੂੰ ਸਰਕਾਰੀ ਪਾਕਿਸਤਾਨ ਟੈਲੀਵਿਜ਼ਨ ਨੇ ਕੈਲਾਸ਼ ਕੁਮਾਰ ਦੀ ਤਰੱਕੀ ਹੋਣ ਬਾਰੇ ਟਵੀਟ ਕੀਤਾ। ਪੀਟੀਵੀ ਨੇ ਟਵੀਟ ਕੀਤਾ ਕਿ ਕੈਲਾਸ਼ ਕੁਮਾਰ ਲੈਫਟੀਨੈਂਟ ਕਰਨਲ ਵਜੋਂ ਤਰੱਕੀ ਪ੍ਰਾਪਤ ਕਰਨ ਵਾਲੇ ਪਹਿਲੇ ਹਿੰਦੂ ਅਧਿਕਾਰੀ ਬਣ ਗਏ ਹਨ।
ਦਸ ਦਈਏ ਕਿ ਮੇਜਰ ਡਾਕਟਰ ਕੈਲਾਸ਼ ਕੁਮਾਰ ਜਮਸ਼ੋਰੋ ਦੀ ਲਿਆਕਤ ਯੂਨੀਵਰਸਿਟੀ ਆਫ਼ ਮੈਡੀਕਲ ਹੈਲਥ ਐਂਡ ਸਾਇੰਸਿਜ਼ ਤੋਂ ਐਮਬੀਬੀਐਸ ਕਰਨ ਤੋਂ ਬਾਅਦ 2008 ਵਿੱਚ ਇੱਕ ਕੈਪਟਨ ਵਜੋਂ ਪਾਕਿਸਤਾਨੀ ਫੌਜ ਵਿੱਚ ਭਰਤੀ ਹੋਏ ਸਨ। ਕੈਲਾਸ਼ ਕੁਮਾਰ ਸਿੰਧ ਸੂਬੇ ਦੇ ਥਾਰਪਰਕਰ ਜ਼ਿਲ੍ਹੇ ਦੇ ਰਹਿਣ ਵਾਲੇ ਹਨ ਜੋ ਕਿ 2019 ਵਿੱਚ ਹਿੰਦੂ ਭਾਈਚਾਰੇ ਵਿੱਚੋਂ ਦੇਸ਼ ਦੇ ਪਹਿਲੇ ਮੇਜਰ ਬਣੇ ਸਨ। ਅਨਿਲ ਕੁਮਾਰ ਸਿੰਧ ਸੂਬੇ ਦੇ ਬਦੀਨ ਦੇ ਰਹਿਣ ਵਾਲੇ ਹਨ। ਖਬਰਾਂ ਮੁਤਾਬਕ ਉਹ 2007 ‘ਚ ਪਾਕਿਸਤਾਨੀ ਫੌਜ ‘ਚ ਭਰਤੀ ਸਨ।
