ਅੰਮਿ੍ਤਸਰ : – ਜੇਕਰ ਤੁਸੀਂ ਗੁਰੂਨਗਰੀ ਦੇ ਹੈੱਡ ਕਾਂਸਟੇਬਲ ਜਗਦੀਪ ਸਿੰਘ ਨਾਲ ਸੈਲਫੀ ਲੈਣਾ ਚਾਹੁੰਦੇ ਹੋ ਤਾਂ ਤੁਹਾਨੂੰ ਸਟੂਲ ਜਾਂ ਕੁਰਸੀ ਲਿਆਉਣੀ ਪਵੇਗੀ। ਦਰਅਸਲ, ਜਗਦੀਪ ਦੁਨੀਆ ਦਾ ਸਭ ਤੋਂ ਲੰਬਾ ਸਿਪਾਹੀ ਹੈ। ਹਰ ਕੋਈ ਉਨ੍ਹਾਂ ਨੂੰ ਦੇਖ ਕੇ ਦੰਗ ਰਹਿ ਜਾਂਦਾ ਹੈ। ਉਨ੍ਹਾਂ ਦੀ ਵਿਸ਼ੇਸ਼ ਸ਼ਖਸੀਅਤ ਨੂੰ ਦੇਖ ਕੇ ਹੁਣ ਪੰਜਾਬ ਦੇ ਨਾਲ-ਨਾਲ ਦੇਸ਼-ਵਿਦੇਸ਼ ਦੇ ਲੋਕ ਵੀ ਹੈਰਾਨ ਹਨ।
7 ਫੁੱਟ 6 ਇੰਚ ਕੱਦ ਵਾਲੇ ਜਗਦੀਪ ਨੇ ਹਾਲ ਹੀ ਵਿੱਚ ਆਪਣੀ 18 ਮੈਂਬਰੀ ਟੀਮ ਸਮੇਤ ਇੱਕ ਨਿੱਜੀ ਟੈਲੀਵਿਜ਼ਨ ਚੈਨਲ ਦੇ ਟੈਲੇਂਟ ਸ਼ੋਅ ‘ਹੁਨਰਬਾਜ਼’ ਵਿੱਚ ਗੱਤਕੇ ਦੇ ਜੌਹਰ ਦਿਖਾਏ। ਉਸ ਨੂੰ ਸਟੇਜ ‘ਤੇ ਦੇਖ ਕੇ ਦਰਸ਼ਕ, ਸ਼ੋਅ ਦੇ ਹੋਸਟ ਭਾਰਤੀ ਅਤੇ ਹਰਸ਼ ਅਤੇ ਜੱਜ ਮਿਥੁਨ ਚੱਕਰਵਰਤੀ, ਪਰਿਣੀਤੀ ਚੋਪੜਾ ਅਤੇ ਕਰਨ ਜੌਹਰ ਵੀ ਦੰਗ ਰਹਿ ਗਏ।
ਦਿ ਗ੍ਰੇਟ ਖਲੀ (ਦਲੀਪ ਸਿੰਘ ਰਾਣਾ) ਵੀ ਜਗਦੀਪ ਦੇ ਵੱਡੇ ਕੱਦ ਦੇ ਸਾਹਮਣੇ ਛੋਟਾ ਹੋ ਜਾਂਦਾ ਹੈ। ਜਗਦੀਪ ਸਿੰਘ ਨੇ ਦੱਸਿਆ ਕਿ ਉਸ ਨੂੰ ਮਾਣ ਹੁੰਦਾ ਹੈ ਜਦੋਂ ਉਹ ਸੋਚਦਾ ਹੈ ਕਿ ਉਹ ਗ੍ਰੇਟ ਖਲੀ (ਉਚਾਈ 7 ਫੁੱਟ 3 ਇੰਚ) ਤੋਂ ਤਿੰਨ ਇੰਚ ਉੱਚਾ ਹੈ।