ਤਿੱਬਤੀ ਅਧਿਆਤਮਕ ਆਗੂ ਦਲਾਈ ਲਾਮਾ ਦਾ ਭਰੋਸੇਮੰਦ ਕੁੱਤਾ ਡੂਕਾ ਰਿਟਾਇਰ ਹੋਣ ਵਾਲਾ ਹੈ। ਦਲਾਈ ਲਾਮਾ ਦੀ ਸੁਰੱਖਿਆ ‘ਚ ਤਾਇਨਾਤ ਡੂਕਾ ਨਾਂ ਦਾ ਸੁੰਘਣ ਵਾਲਾ ਲੈਬਰਾਡੋਰ ਕੁੱਤਾ 12 ਸਾਲਾਂ ਦੀਆਂ ਸੇਵਾਵਾਂ ਤੋਂ ਬਾਅਦ ਸੇਵਾਮੁਕਤ ਹੋ ਰਿਹਾ ਹੈ। ਡੂਕਾ, ਸੁੰਘਣ ਦੀ ਆਪਣੀ ਜ਼ਬਰਦਸਤ ਯੋਗਤਾ ਲਈ ਜਾਣਿਆ ਜਾਂਦਾ ਹੈ ਅਤੇ ਵਿਸਫੋਟਕਾਂ ਦਾ ਪਤਾ ਲਗਾਉਣ ਵਿੱਚ ਮੁਹਾਰਤ ਰੱਖਦਾ ਹੈ।
ਪੁਲਸ ਵਿਭਾਗ ਮੈਕਲੋਡਗੰਜ ਪੁਲਸ ਲਾਈਨ ‘ਚ ਸ਼ਿਵ ਮੰਦਰ ਨੇੜੇ 7 ਫਰਵਰੀ ਨੂੰ ਇਸ ਦੀ ਨਿਲਾਮੀ ਕਰੇਗਾ। ਦਲਾਈਲਾਮਾ ਦੀ ਸੁਰੱਖਿਆ ‘ਚ ਤਾਇਨਾਤ ਡੀਐੱਸਪੀ ਨਿਤਿਨ ਚੌਹਾਨ ਨੇ ਦੱਸਿਆ ਕਿ ਡੁਕਾ ਦੀ ਸਭ ਤੋਂ ਵੱਡੀ ਖਾਸੀਅਤ ਪੁਲਿਸ ਨੂੰ ਵਿਸਫੋਟਕਾਂ ਬਾਰੇ ਚੇਤਾਵਨੀ ਦੇਣਾ ਹੈ। ਉਹ ਦਲਾਈ ਲਾਮਾ ਦੇ ਪ੍ਰੋਗਰਾਮਾਂ ਤੋਂ ਪਹਿਲਾਂ ਸਮਾਗਮ ਵਾਲੀ ਥਾਂ ‘ਤੇ ਰੇਕੀ ਕਰਦਾ ਹੈ।
ਡੀਐਸਪੀ ਨੇ ਦੱਸਿਆ ਕਿ ਡੂਕਾ ਦੀ ਰੇਕੀ ਤੋਂ ਬਾਅਦ ਹੀ ਪ੍ਰੋਗਰਾਮ ਵਾਲੀ ਥਾਂ ਨੂੰ ਸੁਰੱਖਿਅਤ ਮੰਨਿਆ ਜਾਂਦਾ ਹੈ। ਸਾਲ 2010 ਵਿੱਚ ਇਸ ਨੂੰ ਇੱਕ ਲੱਖ 23 ਹਜ਼ਾਰ ਰੁਪਏ ਦੇ ਕੇ ਆਰਮੀ ਟਰੇਨਿੰਗ ਸੈਂਟਰ ਮੇਰਠ ਤੋਂ ਲਿਆਂਦਾ ਗਿਆ ਸੀ। ਉਸ ਸਮੇਂ ਇਹ 7 ਮਹੀਨੇ ਦਾ ਸੀ। ਉਸ ਦੀ ਕੁਝ ਸਿਖਲਾਈ ਇੱਥੇ ਹੋਈ। ਉਸ ਤੋਂ ਬਾਅਦ ਉਹ ਲਗਾਤਾਰ ਸਿਪਾਹੀ ਵਜੋਂ ਸੇਵਾ ਨਿਭਾ ਰਿਹਾ ਸੀ। ਦੱਸ ਦਈਏ ਕਿ ਆਮ ਤੌਰ ‘ਤੇ, ਲੈਬਰਾਡੋਰ ਕੁੱਤੇ ਦੀ ਕੀਮਤ 10 ਤੋਂ 25 ਹਜ਼ਾਰ ਤੱਕ ਹੁੰਦੀ ਹੈ, ਪਰ ਡੂਕਾ ਵਰਗੇ ਸੁੰਘਣ ਵਾਲੇ ਆਪਣੀ ਸਿਖਲਾਈ ਦੇ ਕਾਰਨ ਵਧੇਰੇ ਕੀਮਤੀ ਮੰਨੇ ਜਾਂਦੇ ਹਨ।