ਪੰਜਾਬ ਪੁਲਿਸ ਨੇ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਬਾਰੇ ਵਿਵਾਦਿਤ ਟਿੱਪਣੀ ਕਰਨ ਲਈ ਭਾਜਪਾ ਦੇ ਬੁਲਾਰੇ ਤੇਜੇਂਦਰ ਪਾਲ ਸਿੰਘ ਬੱਗਾ ਖ਼ਿਲਾਫ਼ ਐਫਆਈਆਰ ਦਰਜ ਕੀਤੀ ਹੈ। ਸੀਨੀਅਰ ਵਕੀਲ ਅਤੇ ‘ਆਪ’ ਕਾਰਕੁਨ ਰਾਮ ਕੁਮਾਰ ਝਾਅ ਨੇ ਟਵੀਟ ਕਰਕੇ ਇਹ ਜਾਣਕਾਰੀ ਦਿੱਤੀ ਹੈ। ਤੇਜੇਂਦਰ ਪਾਲ ਬੱਗਾ ਨੇ ਦਿੱਲੀ ‘ਚ ਫਿਲਮ ‘ਦਿ ਕਸ਼ਮੀਰ ਫਾਈਲਜ਼’ ਨੂੰ ਟੈਕਸ ਫ੍ਰੀ ਕਰਨ ਬਾਰੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਦੇ ਬਿਆਨ ‘ਤੇ ਵਿਵਾਦਿਤ ਟਿੱਪਣੀ ਕੀਤੀ ਸੀ ਜਿਸ ਤੋਂ ਬਾਅਦ ਇਸ ਟਿੱਪਣੀ ਨੂੰ ਲੈ ਕੇ ਤੇਜੇਂਦਰ ਪਾਲ ਬੱਗਾ ਖਿਲਾਫ ਐੱਫ.ਆਈ.ਆਰ ਦਰਜ ਕੀਤੀ ਗਈ ਹੈ।
ਤਜਿੰਦਰ ਪਾਲ ਬੱਗਾ ਨੇ ਆਪਣੇ ਖਿਲਾਫ FIR ਦਰਜ ਹੋਣ ਤੋਂ ਬਾਅਦ ਖੁਦ ਟਵਿੱਟਰ ‘ਤੇ ਪ੍ਰਤੀਕਿਰਿਆ ਦਿੱਤੀ ਹੈ। ਤੇਜੇਂਦਰ ਬੱਗਾ ਨੇ ਲਿਖਿਆ- ਇੱਕ ਨਹੀਂ 100 ਐਫਆਈਆਰ ਕਰੋ ਪਰ ਜੇਕਰ ਕੇਜਰੀਵਾਲ ਕਸ਼ਮੀਰੀ ਹਿੰਦੂਆਂ ਦੀ ਨਸਲਕੁਸ਼ੀ ਨੂੰ ਝੂਠਾ ਦੱਸਦੇ ਹਨ, ਤਾਂ ਮੈਂ ਬੋਲਾਂਗਾ, ਜੇ ਕੇਜਰੀਵਾਲ ਕਸ਼ਮੀਰੀ ਹਿੰਦੂਆਂ ਦੀ ਨਸਲਕੁਸ਼ੀ ‘ਤੇ ਹੱਸਦਾ ਹੈ, ਤਾਂ ਮੈਂ ਬੋਲਾਂਗਾ, ਮੈਂ ਨਤੀਜੇ ਭੁਗਤਣ ਲਈ ਤਿਆਰ ਹਾਂ। ਪਰ ਕੇਜਰੀਵਾਲ ਨੂੰ ਨਹੀਂ ਛੱਡਾਂਗਾ।
