ਗੁਰੂਗ੍ਰਾਮ ‘ਚ ਜੀ-20 ਸੰਮੇਲਨ ਦੀਆਂ ਤਿਆਰੀਆਂ ਜਿਥੇ ਲੰਬੇ ਸਮੇਂ ਤੋਂ ਜ਼ੋਰਾਂ-ਸ਼ੋਰਾ ‘ਤੇ ਚੱਲ ਰਹੀਆਂ ਹਨ ਓਥੇ ਹੀ ਗੁਰੂਗ੍ਰਾਮ ‘ਚ ਅੱਜ 40 ਲੱਖ ਰੁਪਏ ਦੀ ਕਾਰ ‘ਚ ਆਏ ਚੋਰਾਂ ਨੇ ਚੌਰਾਹੇ ‘ਤੇ ਸਜਾਏ 400 ਰੁਪਏ ਦੇ ਪੌਦੇ ਚੋਰੀ ਕਰ ਲਏ। ਜੀ-20 ਸੰਮੇਲਨ ਲਈ ਸ਼ਹਿਰ ਨੂੰ ਸਜਾਉਣ ਲਈ ਇਨ੍ਹਾਂ ਪੌਦਿਆਂ ਦੇ ਗਮਲੇ ਰੱਖੇ ਗਏ ਸਨ। ਚੋਰਾਂ ਦੀ ਲਗਜ਼ਰੀ ਕਾਰ ਦਾ ਨੰਬਰ ਵੀ ਵੀ.ਆਈ.ਪੀ ਹੈ। ਚੋਰੀ ਦੀ ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਪ੍ਰਸ਼ਾਸਨ ਨੇ ਪੁਲਿਸ ਕੋਲ ਸ਼ਿਕਾਇਤ ਦਰਜ ਕਰਵਾਈ।
1 ਮਿੰਟ 7 ਸੈਕਿੰਡ ਦਾ ਵਾਇਰਲ ਵੀਡੀਓ ਗੁਰੂਗ੍ਰਾਮ ਦੇ ਸ਼ੰਕਰ ਚੌਕ ਦਾ ਦੱਸਿਆ ਜਾ ਰਿਹਾ ਹੈ। ਵੀਡੀਓ ‘ਚ ਦੇਖਿਆ ਗਿਆ ਹੈ ਕਿ ਇੱਕ ਕਾਰ ਆ ਕੇ ਰੁਕਦੀ ਹੈ। ਕਾਰ ਤੋਂ ਦੋ ਵਿਅਕਤੀ ਹੇਠਾਂ ਉਤਰਦੇ ਹਨ। ਚੌਰਾਹੇ ‘ਤੇ ਸਜਾਵਟ ਲਈ ਰੱਖੇ ਵਿਸ਼ੇਸ਼ ਕਿਸਮ ਦੇ ਬੂਟੇ ਚੁੱਕ ਕੇ ਕਾਰ ਦੀ ਡਿੱਗੀ ਵਿੱਚ ਰੱਖਦੇ ਹਨ। ਪੌਦਿਆਂ ਨੂੰ ਕਾਰ ਵਿੱਚ ਰੱਖ ਕੇ ਉਹ ਕਾਰ ਸਮੇਤ ਫ਼ਰਾਰ ਹੋ ਗਿਆ। ਵੀਡੀਓ ਵਿੱਚ ਕਾਰ ਦਾ ਵੀਆਈਪੀ ਨੰਬਰ ਵੀ ਸਾਫ਼ ਦਿਖਾਈ ਦੇ ਰਿਹਾ ਹੈ। ਦੱਸ ਦਈਏ ਕਿ ਹਰਿਆਣਾ ਭਾਜਪਾ ਦੇ ਬੁਲਾਰੇ ਰਮਨ ਮਲਿਕ ਨੇ ਇਸ ਵੀਡੀਓ ਨੂੰ ਸ਼ੇਅਰ ਕੀਤਾ ਹੈ। ਉਨ੍ਹਾਂ ਨੇ ਗੁਰੂਗ੍ਰਾਮ ਪੁਲਿਸ-ਪ੍ਰਸ਼ਾਸਨ ਅਤੇ ਹਰਿਆਣਾ ਦੇ ਮੁੱਖ ਮੰਤਰੀ ਦਫ਼ਤਰ ਨੂੰ ਕਾਰਵਾਈ ਕਰਨ ਦੀ ਅਪੀਲ ਕੀਤੀ ਹੈ।
