ਭਾਰਤੀ ਰੇਲਵੇ ਦੁਆਰਾ 21 ਜੂਨ ਤੋਂ ਵਿਸ਼ੇਸ਼ ਟੂਰਿਸਟ ਟਰੇਨ ਨਵੀਂ ਦਿੱਲੀ ਤੋਂ ਰਵਾਨਾ ਹੋਵੇਗੀ। ਸਫਦਰਜੰਗ ਰੇਲਵੇ ਸਟੇਸ਼ਨ ਤੋਂ ਚੱਲਣ ਵਾਲੀ ਇਹ ਟੂਰਿਸਟ ਟਰੇਨ ਸ਼੍ਰੀ ਰਾਮਾਇਣ ਯਾਤਰਾ ਸਰਕਟ ‘ਤੇ ਭਾਰਤ ਅਤੇ ਨੇਪਾਲ ਵਿਚਾਲੇ ਲਗਭਗ 8,000 ਕਿਲੋਮੀਟਰ ਦੀ ਦੂਰੀ ਤੈਅ ਕਰੇਗੀ। ਇਹ ਟਰੇਨ ‘ਸਵਦੇਸ਼ ਦਰਸ਼ਨ’ ਯੋਜਨਾ ਦੇ ਤਹਿਤ ਚਲਾਈ ਜਾਵੇਗੀ, ਜਿਸ ਨਾਲ ਯਾਤਰੀ ਭਗਵਾਨ ਸ਼੍ਰੀ ਰਾਮ ਦੇ ਜੀਵਨ ਨਾਲ ਸਬੰਧਤ ਸਾਰੇ ਪ੍ਰਮੁੱਖ ਸਥਾਨਾਂ ਦੇ ਦਰਸ਼ਨ ਕਰ ਸਕਣਗੇ। ਇਸ ਦੇ ਨਾਲ ਹੀ ਇਹ ਟਰੇਨ ਨੇਪਾਲ ਦੇ ਜਨਕਪੁਰ ਸ਼ਹਿਰ ਦੇ ਰਾਮ ਜਾਨਕੀ ਮੰਦਰ ਤੱਕ ਵੀ ਜਾਵੇਗੀ।
ਇਸ ਯਾਤਰਾ ‘ਤੇ ਹੋਣ ਵਾਲੇ ਖਰਚੇ ਦੀ ਗੱਲ ਕਰੀਏ ਤਾਂ ਯਾਤਰਾ ‘ਤੇ ਪ੍ਰਤੀ ਵਿਅਕਤੀ ਲਗਭਗ 65,000 ਰੁਪਏ ਖਰਚ ਆਵੇਗਾ। ਇਹ ਯਾਤਰਾ ਉੱਤਰ ਪ੍ਰਦੇਸ਼, ਬਿਹਾਰ, ਮੱਧ ਪ੍ਰਦੇਸ਼, ਮਹਾਰਾਸ਼ਟਰ, ਕਰਨਾਟਕ, ਤਾਮਿਲਨਾਡੂ, ਆਂਧਰਾ ਪ੍ਰਦੇਸ਼ ਅਤੇ ਤੇਲੰਗਾਨਾ ਸਮੇਤ ਰਾਜਾਂ ਨੂੰ ਕਵਰ ਕਰੇਗੀ। ਆਈਆਰਸੀਟੀਸੀ ਵੱਲੋਂ ਕਿਹਾ ਗਿਆ ਹੈ ਕਿ ਇਸ ਯਾਤਰਾ ਨਾਲ ਯਾਤਰੀਆਂ ਨੂੰ ਵੱਖਰਾ ਅਨੁਭਵ ਮਿਲੇਗਾ ਅਤੇ ਉਨ੍ਹਾਂ ਦੀ ਸੁਰੱਖਿਆ ਲਈ ਢੁਕਵੇਂ ਪ੍ਰਬੰਧ ਕੀਤੇ ਜਾਣਗੇ।
ਆਈਆਰਸੀਟੀਸੀ ਦੇ ਅਨੁਸਾਰ, 600 ਵਿਅਕਤੀਆਂ ਦੀ ਸਮਰੱਥਾ ਵਾਲੀ ਟਰੇਨ ਅਯੁੱਧਿਆ, ਬਕਸਰ, ਜਨਕਪੁਰ, ਸੀਤਾਮੜੀ, ਕਾਸ਼ੀ, ਪ੍ਰਯਾਗ, ਚਿਤਰਕੂਟ, ਨਾਸਿਕ, ਹੰਪੀ, ਰਾਮੇਸ਼ਵਰਮ, ਕਾਂਚੀਪੁਰਮ ਅਤੇ ਭਦਰਚਲਮ ਸਮੇਤ ਪ੍ਰਮੁੱਖ ਸਥਾਨਾਂ ਤੋਂ ਲੰਘੇਗੀ। ਕੇਂਦਰ ਸਰਕਾਰ ਦੀ ਪਹਿਲਕਦਮੀ ਨਾਲ ਚਲਾਈ ਜਾ ਰਹੀ ਇਸ ਟਰੇਨ ਦਾ ਨਾਂ ‘ਦੇਖੋ ਆਪਣਾ ਦੇਸ਼’ ਹੈ। ਇਸ ਦਾ ਉਦੇਸ਼ ਘਰੇਲੂ ਸੈਰ-ਸਪਾਟੇ ਨੂੰ ਉਤਸ਼ਾਹਿਤ ਕਰਨਾ ਹੈ।