ਅਸੀਂ ਸਰਕਾਰੀ ਸਕੂਲਾਂ ਦੀ ਬਦਹਾਲੀ, ਅਧਿਆਪਕਾਂ ਦੀ ਲਾਪਰਵਾਹੀ, ਵਿਦਿਆਰਥੀਆਂ ਦੀ ਗੈਰਹਾਜ਼ਰੀ ਬਾਰੇ ਬਹੁਤ ਸਾਰੀਆਂ ਖ਼ਬਰਾਂ ਪੜ੍ਹੀਆਂ -ਸੁਣੀਆਂ ਹੋਣਗੀਆਂ। ਪਰ ਦੇਸ਼ ਚ ਇੱਕ ਅਜਿਹਾ ਸਕੂਲ ਵੀ ਹੈ ਜਿੱਥੇ ਸਿਰਫ਼ ਇੱਕ ਵਿਦਿਆਰਥੀ ਅਤੇ ਇੱਕ ਅਧਿਆਪਕ ਹੈ- ਕਿਸ਼ੋਰ ਮਾਨਕਰ। ਇਹ ਮਹਾਰਾਸ਼ਟਰ ਦੇ ਵਾਸ਼ਿਮ ਜ਼ਿਲ੍ਹੇ ਦੇ ਗਣੇਸ਼ਪੁਰ ਪਿੰਡ ਵਿੱਚ ਇੱਕ ਸਰਕਾਰੀ ਜ਼ਿਲ੍ਹਾ ਸਕੂਲ ਹੈ। ਸਕੂਲ ਦਾ ਨਾਂ ਜ਼ਿਲ੍ਹਾ ਪ੍ਰੀਸ਼ਦ ਪ੍ਰਾਇਮਰੀ ਮਰਾਠੀ ਸਕੂਲ ਹੈ।
ਦੱਸ ਦਈਏ ਕਿ ਇਸ ਸਕੂਲ ਵਿੱਚ ਇਕ ਹੀ ਬੱਚਾ ਪੜ੍ਹਦਾ ਹੈ ਜਿਸ ਦਾ ਨਾਮ ਕਾਰਤਿਕ ਸ਼ਿਗਾਓਕਰ ਹੈ। ਹੁਣ ਉਹ ਤੀਜੀ ਜਮਾਤ ਵਿੱਚ ਹੈ। ਕਾਰਤਿਕ ਇਸ ਸਕੂਲ ਵਿਚ ਪਿਛਲੇ ਦੋ ਸਾਲਾਂ ਤੋਂ ਪੜ੍ਹ ਰਿਹਾ ਇਕਲੌਤਾ ਵਿਦਿਆਰਥੀ ਹੈ। ਦੋਵੇਂ(ਅਧਿਆਪਕ ਅਤੇ ਵਿਦਿਆਰਥੀ) ਰੋਜ਼ ਸਕੂਲ ਜਾਂਦੇ ਹਨ। ਅਧਿਆਪਕ ਕਿਸ਼ੋਰ ਦਾ ਕਹਿਣਾ ਹੈ ਕਿ ਉਹ ਹਰ ਰੋਜ਼ ਕਰੀਬ 12 ਕਿਲੋਮੀਟਰ ਦੀ ਦੂਰੀ ਤੈਅ ਕਰਕੇ ਸਕੂਲ ਪੜਾਉਣ ਆਉਂਦੇ ਹਨ। ਦੋਵੇਂ ਸਵੇਰ ਦੀ ਪ੍ਰਾਰਥਨਾ ਕਰਦੇ ਹਨ। ਰਾਸ਼ਟਰੀ ਗੀਤ ਗਾਉਂਦੇ ਹਨ। ਫਿਰ ਕਲਾਸ ਸ਼ੁਰੂ ਹੁੰਦੀ ਹੈ। ਕਿਸ਼ੋਰ ਹੀ ਕਾਰਤਿਕ ਨੂੰ ਹਰ ਵਿਸ਼ਾ ਪੜਾਉਂਦੇ ਹਨ
ਕਿਸ਼ੋਰ ਨੇ ਦੱਸਿਆ ਕਿ ਕਾਰਤਿਕ ਤੋਂ ਇਲਾਵਾ ਸਕੂਲ ਵਿੱਚ ਕਿਸੇ ਹੋਰ ਬੱਚੇ ਦਾ ਦਾਖਲਾ ਨਹੀਂ ਹੈ। ਪਰ ਇਸ ਨਾਲ ਉਸਦੀ ਪੜ੍ਹਾਈ ਨਹੀਂ ਰੁਕੇਗੀ। ਸਕੂਲ ਪ੍ਰਸ਼ਾਸਨ ਸਕੂਲ ਨੂੰ ਜਾਰੀ ਰੱਖਣਾ ਚਾਹੁੰਦਾ ਹੈ। ਭਾਵੇਂ ਉੱਥੇ ਇੱਕ ਹੀ ਵਿਦਿਆਰਥੀ ਕਿਉ ਨਾ ਹੋਵੇ। ਉਸ ਇੱਕ ਬੱਚੇ ਲਈ ਮਿਡ ਡੇ ਮੀਲ ਵੀ ਤਿਆਰ ਕਰਕੇ ਦਿੱਤਾ ਜਾਂਦਾ ਹੈ। ਸਰਕਾਰ ਵੱਲੋਂ ਸਾਰੀਆਂ ਸਹੂਲਤਾਂ ਦਿੱਤੀਆਂ ਜਾ ਰਹੀਆਂ ਹਨ।