ਜਿੱਥੇ ਪੂਰੀ ਦੁਨੀਆ ਪਿਛਲੇ ਦੋ ਸਾਲਾਂ ਤੋਂ ਕੋਰੋਨਾ ਵਾਇਰਸ ਨਾਲ ਜੂਝ ਰਹੀ ਹੈ, ਉੱਥੇ ਹੀ ਹੁਣ ਵਿਗਿਆਨੀਆਂ ਨੇ ਦੁਨੀਆ ਦੇ ਸਾਰੇ ਸਮੁੰਦਰਾਂ ਵਿੱਚੋ 5,500 ਨਵੇਂ ਵਾਇਰਸਾਂ ਦੀ ਖੋਜ ਕੀਤੀ ਹੈ। ਅਮਰੀਕਾ ਦੀ ਓਹੀਓ ਸਟੇਟ ਯੂਨੀਵਰਸਿਟੀ ਦੇ ਖੋਜਕਰਤਾਵਾਂ ਦਾ ਕਹਿਣਾ ਹੈ ਕਿ ਕੋਰੋਨਾ ਦੀ ਤਰ੍ਹਾਂ ਇਹ ਵੀ ਆਰਐਨਏ ਵਾਇਰਸ ਹਨ। ਚਿੰਤਾ ਦੀ ਗੱਲ ਹੈ ਕਿ ਖੋਜਿਆ ਗਿਆ ਵਾਇਰਸ ਭਾਰਤ ਦੇ ਅਰਬ ਸਾਗਰ ਅਤੇ ਹਿੰਦ ਮਹਾਸਾਗਰ ਦੇ ਉੱਤਰ-ਪੱਛਮੀ ਖੇਤਰਾਂ ਵਿੱਚ ਵੀ ਮੌਜੂਦ ਹੈ।
ਦੱਸ ਦਈਏ ਕਿ ਵਾਇਰਸ ਦਾ ਪਤਾ ਲਗਾਉਣ ਲਈ ਵਿਗਿਆਨੀਆਂ ਨੇ ਦੁਨੀਆ ਦੇ ਸਾਰੇ ਸਮੁੰਦਰਾਂ ਦੇ 121 ਖੇਤਰਾਂ ਤੋਂ ਪਾਣੀ ਦੇ 35 ਹਜ਼ਾਰ ਨਮੂਨੇ ਲਏ ਹਨ। ਜਾਂਚ ਵਿੱਚ ਉਨ੍ਹਾਂ ਨੂੰ ਕਰੀਬ 5,500 ਨਵੇਂ ਆਰਐਨਏ ਵਾਇਰਸ ਮਿਲੇ ਹਨ। ਇਹ 5 ਮੌਜੂਦਾ ਅਤੇ 5 ਨਵੀਆਂ ਜਾਤੀਆਂ ਨਾਲ ਸਬੰਧਤ ਸਨ। ਖੋਜਕਰਤਾ ਮੈਥਿਊ ਸੁਲੀਵਾਨ ਦਾ ਕਹਿਣਾ ਹੈ ਕਿ ਨਮੂਨਿਆਂ ਦੇ ਮੁਤਾਬਕ ਨਵੇਂ ਵਾਇਰਸਾਂ ਦੀ ਗਿਣਤੀ ਬਹੁਤ ਘੱਟ ਹੈ। ਇਹ ਸੰਭਵ ਹੈ ਕਿ ਭਵਿੱਖ ਵਿੱਚ ਲੱਖਾਂ ਵਾਇਰਸ ਪਾਏ ਜਾਣਗੇ।
ਵਿਗਿਆਨੀਆਂ ਦਾ ਕਹਿਣਾ ਹੈ ਕਿ ਇਹ ਖੋਜ ਖਾਸ ਆਰਐਨਏ ਵਾਇਰਸਾਂ ਬਾਰੇ ਕੀਤੀ ਗਈ ਹੈ ਕਿਉਂਕਿ ਵਿਗਿਆਨੀਆਂ ਨੇ ਡੀਐਨਏ ਵਾਇਰਸਾਂ ਦੇ ਮੁਕਾਬਲੇ ਉਨ੍ਹਾਂ ‘ਤੇ ਘੱਟ ਅਧਿਐਨ ਕੀਤਾ ਹੈ। ਸੁਲੀਵਨ ਦੇ ਅਨੁਸਾਰ, ਅੱਜ ਅਸੀਂ ਸਿਰਫ ਉਨ੍ਹਾਂ ਆਰਐਨਏ ਵਾਇਰਸਾਂ ਬਾਰੇ ਜਾਣਦੇ ਹਾਂ ਜਿਨ੍ਹਾਂ ਨੇ ਦੁਨੀਆ ਨੂੰ ਮੌਤ ਦੇ ਖ਼ਤਰੇ ਵਿੱਚ ਪਾ ਦਿੱਤਾ ਹੈ। ਇਨ੍ਹਾਂ ਵਿੱਚ ਕੋਰੋਨਾ, ਫਲੂ ਅਤੇ ਇਬੋਲਾ ਵਾਇਰਸ ਸ਼ਾਮਲ ਹਨ। ਇਸ ਲਈ ਭਵਿੱਖ ਵਿੱਚ ਨਵੀਆਂ ਬਿਮਾਰੀਆਂ ਤੋਂ ਬਚਣ ਲਈ ਸਾਨੂੰ ਪਹਿਲਾਂ ਤੋਂ ਹੀ ਤਿਆਰ ਰਹਿਣਾ ਜ਼ਰੂਰੀ ਹੈ।