ਬੀਤੇ ਬੁੱਧਵਾਰ ਸ਼ਾਮ ਨੂੰ ਚੰਦਰਮਾ ਦੀ ਸਤ੍ਹਾ ‘ਤੇ ਉਤਰਨ ‘ਤੇ ਪੂਰੇ ਦੇਸ਼ ਨੇ ਖੁਸ਼ੀ ਮਨਾਈ ਹੈ। ਚੰਦਰਯਾਨ ਮਿਸ਼ਨ ਨੂੰ ਲੈ ਕੇ ਲੋਕ ਇੰਨੇ ਖੁਸ਼ ਸਨ ਕਿ ਓਡੀਸ਼ਾ ਦੇ ਕੁਝ ਲੋਕਾਂ ਨੇ ਬੁੱਧਵਾਰ ਨੂੰ ਪੈਦਾ ਹੋਏ ਆਪਣੇ ਬੱਚਿਆਂ ਦਾ ਨਾਂ ‘ਚੰਦਰਯਾਨ’ ਰੱਖਿਆ। ਓਡੀਸ਼ਾ ਦੇ ਕੇਂਦਰਪਾੜਾ ਜ਼ਿਲੇ ਦੇ ਹਸਪਤਾਲ ‘ਚ ਪੈਦਾ ਹੋਏ ਚਾਰ ਬੱਚਿਆਂ ਦਾ ਨਾਂ ਚੰਦਰਯਾਨ ਰੱਖਿਆ ਗਿਆ ਹੈ। ਇਨ੍ਹਾਂ ਵਿੱਚ ਤਿੰਨ ਲੜਕੇ ਅਤੇ ਇੱਕ ਲੜਕੀ ਸ਼ਾਮਲ ਹੈ।
ਦੱਸ ਦਈਏ ਕਿ ਇੱਕ ਬੱਚੇ ਦੇ ਪਿਤਾ ਪ੍ਰਵਤ ਮਲਿਕ ਨੇ ਕਿਹਾ ਕਿ ਇਹ ਦੋਹਰੀ ਖੁਸ਼ੀ ਦੀ ਗੱਲ ਹੈ ਕਿ ਇੱਕ ਪਾਸੇ ਚੰਦਰਯਾਨ-3 ਸਫਲਤਾਪੂਰਵਕ ਚੰਦਰਮਾ ਦੀ ਸਤ੍ਹਾ ‘ਤੇ ਉਤਰਿਆ ਅਤੇ ਇਸ ਤੋਂ ਕੁਝ ਮਿੰਟਾਂ ਬਾਅਦ ਸਾਡੇ ਬੱਚੇ ਦਾ ਜਨਮ ਹੋਇਆ। ਇਸ ਲਈ ਅਸੀਂ ਬੱਚੇ ਦਾ ਨਾਂ ਚੰਦਰਯਾਨ ਰੱਖਣ ਦਾ ਫੈਸਲਾ ਕੀਤਾ ਹੈ।
ਜ਼ਿਕਰਯੋਗ ਹੈ ਕਿ ਸਥਾਨਕ ਪੱਧਰ ‘ਤੇ ਬੱਚੇ ਦੇ ਜਨਮ ਤੋਂ ਬਾਅਦ 21ਵੇਂ ਦਿਨ ਉਸ ਦਾ ਨਾਂ ਰੱਖਣ ਦੀ ਪਰੰਪਰਾ ਰਹੀ ਹੈ। ਦੂਜੇ ਪਾਸੇ ਤਾਲਾਚੂਆ ਪਿੰਡ ਦੀ ਦੁਰਗਾ ਮੰਡਲ, ਨੀਲਕੰਠਪੁਰ ਦੀ ਜੋਸ਼ਨਿਆਰਾਣੀ ਬਾਲਾ ਅਤੇ ਅੰਗੂਲੇਈ ਪਿੰਡ ਦੀ ਬੇਬਿਨਾ ਸੇਠੀ ਨੇ ਵੀ ਬੁੱਧਵਾਰ ਸ਼ਾਮ ਨੂੰ ਬੱਚੇ ਨੂੰ ਜਨਮ ਦਿੱਤਾ ਹੈ। ਕੇਂਦਰਪਾੜਾ ਸਰਕਾਰੀ ਹਸਪਤਾਲ ਦੀ ਮੁੱਖ ਨਰਸ ਅੰਜਨਾ ਸਾਹੂ ਨੇ ਕਿਹਾ ਕਿ ਸਾਰੀਆਂ ਮਾਵਾਂ ਆਪਣੇ ਬੱਚਿਆਂ ਦਾ ਨਾਂ ਚੰਦਰਯਾਨ ਦੇ ਨਾਂ ‘ਤੇ ਰੱਖਣਾ ਚਾਹੁੰਦੀਆਂ ਹਨ। ਨਰਸ ਨੇ ਦੱਸਿਆ ਕਿ ਇਸ ਤੋਂ ਪਹਿਲਾਂ ਜਦੋਂ ਓਡੀਸ਼ਾ ‘ਚ ਚੱਕਰਵਾਤ ਆਇਆ ਸੀ ਤਾਂ ਕਈ ਲੋਕਾਂ ਨੇ ਆਪਣੇ ਬੱਚਿਆਂ ਦੇ ਨਾਂ ਚੱਕਰਵਾਤ ਦੇ ਨਾਂ ‘ਤੇ ਰੱਖੇ ਸਨ।
ਹਸਪਤਾਲ ਦੇ ਵਧੀਕ ਜ਼ਿਲ੍ਹਾ ਮੈਡੀਕਲ ਅਫ਼ਸਰ ਡਾ: ਪੀ.ਕੇ ਪ੍ਰਹਰਾਜ ਨੇ ਦੱਸਿਆ ਕਿ ਇਹ ਮਾਪੇ ਆਪਣੇ ਆਪ ਨੂੰ ਭਾਗਸ਼ਾਲੀ ਸਮਝ ਰਹੇ ਹਨ ਕਿਉਂਕਿ ਇਸ ਇਤਿਹਾਸਕ ਪਲ ‘ਤੇ ਉਨ੍ਹਾਂ ਦੇ ਬੱਚਿਆਂ ਦਾ ਜਨਮ ਹੋਇਆ ਹੈ | ਉਹ ਚੰਦਰਯਾਨ ਦੇ ਨਾਮ ‘ਤੇ ਬੱਚਿਆਂ ਦਾ ਨਾਮ ਰੱਖ ਕੇ ਚੰਦਰ ਮਿਸ਼ਨ ਦੀ ਪ੍ਰਾਪਤੀ ਦਾ ਜਸ਼ਨ ਮਨਾਉਣਾ ਚਾਹੁੰਦੇ ਹਨ।
