ਦੁਨੀਆ ਦੇ ਸਭ ਤੋਂ ਸ਼ਕਤੀਸ਼ਾਲੀ ਰਾਕੇਟ ਸਟਾਰਸ਼ਿਪ ਦਾ ਤੀਜਾ ਪ੍ਰੀਖਣ ਲਗਭਗ ਸਫਲ ਰਿਹਾ। ਇਸ ਨੂੰ ਬੋਕਾ ਚਿਕਾ, ਟੈਕਸਾਸ ਤੋਂ 14 ਮਾਰਚ ਨੂੰ ਸ਼ਾਮ 6:55 ਵਜੇ ਲਾਂਚ ਕੀਤਾ ਗਿਆ ਸੀ। ਸਟਾਰਸ਼ਿਪ ਨੂੰ ਪੁਲਾੜ ‘ਚ ਲਿਜਾਣ ਤੋਂ ਬਾਅਦ ਇਸ ਨੇ ਸ਼ਾਮ 7.59 ‘ਤੇ ਹਿੰਦ ਮਹਾਸਾਗਰ ‘ਚ ਉਤਰਨਾ ਸੀ ਪਰ ਧਰਤੀ ਦੇ ਵਾਯੂਮੰਡਲ ‘ਚ ਮੁੜ ਪ੍ਰਵੇਸ਼ ਕਰਨ ਤੋਂ ਬਾਅਦ ਜਦੋਂ ਰਾਕੇਟ 65 ਕਿਲੋਮੀਟਰ ਉਪਰ ਸੀ ਤਾਂ ਇਸ ਦਾ ਸੰਪਰਕ ਟੁੱਟ ਗਿਆ।
ਦੁਨੀਆ ਦੇ ਤੀਜੇ ਸਭ ਤੋਂ ਅਮੀਰ ਕਾਰੋਬਾਰੀ ਐਲੋਨ ਮਸਕ ਦੀ ਕੰਪਨੀ ਸਪੇਸਐਕਸ ਨੇ ਇਸ ਰਾਕੇਟ ਨੂੰ ਬਣਾਇਆ ਹੈ। ਸਟਾਰਸ਼ਿਪ ਪੁਲਾੜ ਯਾਨ ਅਤੇ ਸੁਪਰ ਹੈਵੀ ਰਾਕੇਟ ਨੂੰ ਸਮੂਹਿਕ ਤੌਰ ‘ਤੇ ‘ਸਟਾਰਸ਼ਿਪ’ ਕਿਹਾ ਜਾਂਦਾ ਹੈ। ਇਸ ਗੱਡੀ ਦੀ ਉਚਾਈ 397 ਫੁੱਟ ਹੈ। ਇਹ ਪੂਰੀ ਤਰ੍ਹਾਂ ਨਾਲ ਮੁੜ ਵਰਤੋਂ ਯੋਗ ਹੈ ਅਤੇ 150 ਮੀਟ੍ਰਿਕ ਟਨ ਭਾਰ ਚੁੱਕਣ ਦੇ ਸਮਰੱਥ ਹੈ। ਸਟਾਰਸ਼ਿਪ ਸਿਸਟਮ ਮੰਗਲ ਗ੍ਰਹਿ ‘ਤੇ ਇੱਕੋ ਸਮੇਂ 100 ਲੋਕਾਂ ਨੂੰ ਲਿਜਾ ਸਕੇਗਾ। ਸਪੇਸਐਕਸ ਨੇ ਕਿਹਾ ਕਿ ਸਟਾਰਸ਼ਿਪ ਪੁਨਰ-ਪ੍ਰਵੇਸ਼ ਤੋਂ ਨਹੀਂ ਬਚੀ, ਪਰ ਇਸ ਨੇ ਉਡਾਣ ਦੌਰਾਨ ਕਈ ਮਹੱਤਵਪੂਰਨ ਉਪਲਬਧੀਆਂ ਹਾਸਲ ਕੀਤੀਆਂ।
ਐਲੋਨ ਮਸਕ ਨੇ ਕਿਹਾ ਕਿ ਉਨ੍ਹਾਂ ਨੂੰ ਉਮੀਦ ਹੈ ਕਿ ਇਸ ਸਾਲ ਅੱਧੀ ਦਰਜਨ ਸਟਾਰਸ਼ਿਪਾਂ ਉੱਡਣਗੀਆਂ। ਸਟਾਰਸ਼ਿਪ ਨੇ ਔਰਬਿਟ ‘ਤੇ ਪਹੁੰਚਣ ਤੋਂ ਬਾਅਦ ਪੇਲੋਡ ਦਰਵਾਜ਼ਾ ਖੋਲ੍ਹਿਆ ਅਤੇ ਬੰਦ ਕਰ ਦਿੱਤਾ।ਰਾਕੇਟ ਦੇ ਅੰਦਰ ਦੋ ਟੈਂਕਾਂ ਵਿਚਕਾਰ ਕਈ ਟਨ ਤਰਲ ਆਕਸੀਜਨ ਭੇਜੀ ਗਈ। ਸਟਾਰਸ਼ਿਪ ਧਰਤੀ ਦੇ ਵਾਯੂਮੰਡਲ ਵਿੱਚ ਦੁਬਾਰਾ ਦਾਖਲ ਹੋ ਗਈ ਸੀ, ਪਰ ਸੰਪਰਕ ਟੁੱਟ ਗਿਆ ਸੀ।
