ਮਹਾਰਾਸ਼ਟਰ ਵਿੱਚ ਊਧਵ ਸਰਕਾਰ ਦਾ ਡਿੱਗਣਾ ਹੁਣ ਲਗਭਗ ਤੈਅ ਹੈ। ਗੁਹਾਟੀ ‘ਚ ਏਕਨਾਥ ਸ਼ਿੰਦੇ ਨੇ ਸ਼ਿਵ ਸੈਨਾ ਦੇ 42 ਅਤੇ 7 ਆਜ਼ਾਦ ਵਿਧਾਇਕਾਂ ਨਾਲ ਤਸਵੀਰ ਜਾਰੀ ਕੀਤੀ ਹੈ। ਦੱਸ ਦਈਏ ਕਿ ਸ਼ਿੰਦੇ ਨੂੰ ਊਧਵ ਸਰਕਾਰ ਨੂੰ ਡੇਗਣ ਲਈ ਸਿਰਫ਼ 37 ਸ਼ਿਵ ਸੈਨਾ ਵਿਧਾਇਕਾਂ ਦੀ ਲੋੜ ਸੀ।
ਸੂਤਰਾਂ ਮੁਤਾਬਕ ਮਹਾਰਾਸ਼ਟਰ ਭਾਜਪਾ ‘ਚ ਵੀ ਸਰਕਾਰ ਬਣਾਉਣ ਅਤੇ ਅਗਲੀ ਪ੍ਰਕਿਰਿਆ ਨੂੰ ਲੈ ਕੇ ਮੀਟਿੰਗ ਸ਼ੁਰੂ ਹੋ ਗਈ ਹੈ। ਬੀਜੇਪੀ ਨੇ ਸ਼ਿੰਦੇ ਨੂੰ ਮਹਾਰਾਸ਼ਟਰ ਕੈਬਨਿਟ ਵਿੱਚ 8 ਕੈਬਨਿਟ ਰੈਂਕ ਅਤੇ 5 ਰਾਜ ਮੰਤਰੀ ਰੈਂਕ ਦੀ ਪੇਸ਼ਕਸ਼ ਕੀਤੀ ਹੈ। ਇਸ ਦੇ ਨਾਲ ਹੀ ਕੇਂਦਰ ਵਿੱਚ ਦੋ ਮੰਤਰੀ ਅਹੁਦੇ ਦੀ ਪੇਸ਼ਕਸ਼ ਵੀ ਕੀਤੀ ਗਈ ਹੈ।
ਦੱਸ ਦਈਏ ਸ਼ਿਵ ਸੈਨਾ ਦੇ ਬਾਗੀ ਵਿਧਾਇਕਾਂ ਨੇ ਅੱਜ ਪਹਿਲੀ ਵਾਰ ਮਹਾਰਾਸ਼ਟਰ ਦੇ ਮੁੱਖ ਮੰਤਰੀ ਊਧਵ ਠਾਕਰੇ ਨੂੰ ਚਿੱਠੀ ਲਿਖੀ ਹੈ। ਇਸ ‘ਚ ਵਿਧਾਇਕਾਂ ਨੇ ਉਨ੍ਹਾਂ ‘ਤੇ ਕਈ ਵੱਡੇ ਦੋਸ਼ ਲਗਾਏ ਹਨ। ਇਹ ਚਿੱਠੀ ਬਾਗੀ ਨੇਤਾ ਏਕਨਾਥ ਸ਼ਿੰਦੇ ਨੇ ਸਾਂਝੀ ਕੀਤੀ ਹੈ। ਇਹ ਚਿੱਠੀ ਸੰਜੇ ਸ਼ਿਰਸਤ ਵੱਲੋਂ ਲਿਖੀ ਗਈ ਹੈ, ਪਰ ਇਸ ਵਿੱਚ ਸਾਰੇ ਵਿਧਾਇਕਾਂ ਦੀਆਂ ਭਾਵਨਾਵਾਂ ਦੱਸੀਆਂ ਗਈਆਂ ਹਨ। ਚਿੱਠੀ ‘ਚ ਊਧਵ ਠਾਕਰੇ ਲਈ ਲਿਖਿਆ ਹੈ ਕਿ ਸ਼ਿਵ ਸੈਨਾ ਦੇ ਵਿਧਾਇਕਾਂ ਲਈ ਤੁਹਾਡਾ ਦਰਵਾਜ਼ਾ ਹਮੇਸ਼ਾ ਬੰਦ ਸੀ। ਤੁਸੀਂ ਵਿਧਾਇਕਾਂ ਦੀ ਕਦੇ ਗੱਲ ਨਹੀਂ ਸੁਣੀ। ਦੂਜੇ ਪਾਸੇ ਸ਼ਿੰਦੇ ਨੇ ਹਮੇਸ਼ਾ ਵਿਧਾਇਕਾਂ ਦੀ ਗੱਲ ਸੁਣੀ ਅਤੇ ਅੱਗੇ ਵੀ ਸੁਣਨਗੇ।