ਮੋਹਾਲੀ, 6 ਜਨਵਰੀ 2022 – 5 ਜਨਵਰੀ ਨੂੰ ਪ੍ਰਧਾਨ ਮੰਤਰੀ ਨੇ ਪੰਜਾਬ ਦੌਰੇ ‘ਤੇ ਆਏ ਸੀ। ਪਰ ਕੁਝ ਅਸੰਤੁਸ਼ਟ ਲੋਕਾਂ ਕਰਕੇ ਮਾਹੌਲ ਖ਼ਰਾਬ ਹੋਣ ਕਾਰਨ, ਪ੍ਰਧਾਨ ਮੰਤਰੀ ਨੂੰ ਵਾਪਸ ਜਾਣਾ ਪਿਆ। ਇਹ ਨਿੰਦਣਯੋਗ ਘਟਨਾ ਪਿੱਛੇ ‘ਸਿੱਖ ਫਾਰ ਜਸਟਿਸ’ ਦਾ ਹੱਥ ਹੈ, ਅਤੇ ਨਾਲ ਹੀ ਕਾਂਗਰਸ ਵੱਲੋਂ ਸੁਰੱਖਿਆ ਪ੍ਰਬੰਧਾਂ ਚ ਵੱਡੀ ਕੁਤਾਹੀ ਵੀ ਜ਼ਿੰਮੇਵਾਰ ਹੈ । ਇਹ ਸ਼ਬਦ ਭਾਜਪਾ ਦੇ ਬੁਲਾਰਾ ਬੀਬੀ ਅਮਨਜੋਤ ਕੌਰ ਰਾਮੂੰਵਾਲੀਆ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਦੌਰਾਨ ਕਹੇ।
ਬੀਬੀ ਜੀ ਨੇ ਦੱਸਿਆ ਕਿ ਖੁਫੀਆ ਏਜੰਸੀਆਂ ਦੇ ਸੂਤਰਾਂ ਦਿੱਤੀ ਰਿਪੋਰਟ ਅਨੁਸਾਰ ‘ਸਿੱਖ ਫਾਰ ਜਸਟਿਸ’ ਨੇ ਦੌਰੇ ਤੋਂ ਕੁਝ ਦਿਨ ਪਹਿਲਾਂ ਹੀ ਲੋਕਾਂ ਨੂੰ ਪ੍ਰਧਾਨ ਮੰਤਰੀ ਦੀ ਯਾਤਰਾ ਦਾ ਵਿਰੋਧ ਕਰਨ ਨੂੰ ਕਿਹਾ ਸੀ ।ਵੀਡੀਓ ਵਿੱਚ ਪੰਨੂੰ ਨੇ ਦੋਸ਼ ਲਗਾਇਆ ਕਿ ਪ੍ਰਧਾਨ ਮੰਤਰੀ 3700 ਤੋਂ ਵੱਧ ਕਿਸਾਨਾਂ ਦੀਆਂ ਮੌਤਾਂ ਦਾ ਜ਼ਿੰਮੇਵਾਰ ਹੈ। ਪਨੂੰ ਨੇ ਇਸ ਵਿਰੋਧ ਪ੍ਰਦਰਸ਼ਨ ਲਈ ਇਕ ਲੱਖ ਅਮਰੀਕੀ ਡਾਲਰ ਦੀ ਵੀ ਪੇਸ਼ਕਸ਼ ਕੀਤੀ। ਪੰਨੂ ਹਰ ਵਾਰ ਆਮ ਜਨਤਾ ਨੂੰ ਭੜਕਾ ਕੇ ਪੰਜਾਬ ਦਾ ਮਾਹੌਲ ਖ਼ਰਾਬ ਕਰਨ ਦੀ ਕੋਸ਼ਿਸ਼ ਕਰਦਾ ਹੈ ।
ਦੂਜੇ ਪਾਸੇ ਬੀਬੀ ਨੇ ਕਾਂਗਰਸ ਤੇ ਨਿਸ਼ਾਨਾ ਕੱਸਦੇ ਹੋਏ ਕਿਹਾ ਕਿ ਕਾਂਗਰਸ ਵੀ ਸਾਰੀ ਘਟਨਾ ਪਿੱਛੇ ਮੁੱਖ ਜ਼ਿੰਮੇਵਾਰ ਹੈ। ਕਾਂਗਰਸ ਦੀ ਨਾਕਾਮੀ ਕਰਕੇ ਪ੍ਰਧਾਨ ਮੰਤਰੀ ਜੀ ਦਾ ਰੂਟ ਪਲਾਨ ਲੀਕ ਹੋਇਆ ,ਅਤੇ ਨਾ ਹੀ ਮੁੱਖ ਮੰਤਰੀ ਚੰਨੀ ਸੰਵਿਧਾਨ ਅਨੁਸਾਰ ਪ੍ਰਧਾਨ ਮੰਤਰੀ ਜੀ ਨੂੰ ਏਅਰ ਪੋਰਟ ਤੇ ਸਵਾਗਤ ਕਰਨ ਪੁੱਜੇ। ਬਾਅਦ ਚੰਨੀ ਜੀ ਵੱਲੋਂ ਇਕ ਪ੍ਰੈੱਸ ਕਾਨਫਰੰਸ ਵਿੱਚ ਬਹਾਨਾ ਬਣਾਉਂਦੇ ਕਿਹਾ ਕਿ ਮੇਰੇ ਸਟਾਫ ਵਿਚ ਕੋਵਿਡ ਪੌਜ਼ੀਟਿਵ ਕੇਸ ਆਏ ਹਨ,ਜਿਸ ਕਾਰਨ ਮੈਂ ਪ੍ਰਧਾਨ ਮੰਤਰੀ ਨੂੰ ਮਿਲਣ ਨਹੀਂ ਜਾ ਸਕਦਾ ਸੀ । ਪਰ ਬੀਤੇ ਦਿਨ ਚਾਰ ਜਨਵਰੀ ਨੂੰ ਇਕ ਯੂਨੀਵਰਸਿਟੀ ਵਿੱਚ ਚੰਨੀ ਜੀ ਭੰਗੜਾ ਪਾ ਰਹੇ ਸੀ। ਅਤੇ ਅੱਜ ਵੀ ਉਨ੍ਹਾਂ ਨੇ ਇਕ ਪ੍ਰੈਸ ਕਾਨਫਰੰਸ ਨੂੰ ਸੰਬੋਧਨ ਕੀਤਾ ।ਕਿ ਅੱਜ ਉਨ੍ਹਾਂ ਦੇ ਸਟਾਫ ਵਿੱਚ ਕੋਵਿੱਡ ਨੈਗੇਟਿਵ ਆ ਗਿਆ ? ਕਾਂਗਰਸ ਵੱਲੋਂ ਸੁਰੱਖਿਆ ਪ੍ਰਬੰਧਾਂ ਚ ਵੱਡੀ ਕੁਤਾਹੀ ਵਰਤੀ ਗਈ, ਜਿਸ ਕਾਰਨ ਪ੍ਰਧਾਨ ਮੰਤਰੀ ਦੀ ਜਾਨ ਲਈ ਖਤਰਾ ਪੈਦਾ ਹੋ ਗਿਆ।
ਕੱਲ੍ਹ ਸਾਰੀ ਆਮ ਅਤੇ ਖ਼ਾਸ ਜਨਤਾ ਟੀਵੀ ਮੁਹਰੇ ਇੱਕ ਆਸ ਲਗਾ ਕੇ ਬੈਠੀ ਸੀ, ਕਿ ਮੋਦੀ ਜੀ ਆਉਣਗੇ ਅਤੇ ਪੰਜਾਬ ਨੂੰ ਕੁਝ ਦੇ ਕੇ ਜਾਣਗੇ,ਪਰ ਕਾਂਗਰਸ ਦੀ ਇਹ ਹਰਕਤ ਕਰਕੇ ਪੰਜਾਬ ਦੇ ਵਿਕਾਸ ਵਿਚ ਰੁਕਾਵਟ ਪਾਉਣ ਦੀ ਕੋਸ਼ਿਸ਼ ਕੀਤੀ ਹੈ।
