ਜੇਕਰ ਤੁਸੀਂ ਵੀ ਅਕਸਰ ਟਰੇਨ ‘ਚ ਸਫਰ ਕਰਦੇ ਹੋ ਤਾਂ ਇਹ ਖਬਰ ਸੁਣ ਕੇ ਤੁਹਾਨੂੰ ਜਰੂਰ ਖੁਸ਼ੀ ਹੋਵੇਗੀ। ਜੀ ਹਾਂ, ਭਾਰਤੀ ਰੇਲਵੇ ਨੇ ਕਿਰਾਏ ‘ਚ 25 ਫੀਸਦੀ ਤੱਕ ਦੀ ਕਟੌਤੀ ਕਰਨ ਦਾ ਐਲਾਨ ਕੀਤਾ ਹੈ। ਇਸ ਨਾਲ ਰੇਲ ਯਾਤਰਾ ਕਰਨ ਵਾਲਿਆਂ ਨੂੰ ਵੱਡੀ ਰਾਹਤ ਮਿਲੇਗੀ। ਇਹ ਕਟੌਤੀ ਏਸੀ ਚੇਅਰ ਕਾਰ ਅਤੇ ਸਾਰੀਆਂ ਟਰੇਨਾਂ ਦੇ ਐਗਜ਼ੀਕਿਊਟਿਵ ਕਲਾਸ ਦੇ ਕਿਰਾਏ ‘ਤੇ ਲਾਗੂ ਹੋਵੇਗੀ।
ਰੇਲਵੇ ਬੋਰਡ ਵੱਲੋਂ ਦਿੱਤੇ ਹੁਕਮਾਂ ‘ਚ ਰੇਲਵੇ ਦੇ ਉਨ੍ਹਾਂ ਜ਼ੋਨਾਂ ਦੀਆਂ ਟਰੇਨਾਂ ‘ਚ ਰਿਆਇਤੀ ਕਿਰਾਏ ਦੀ ਯੋਜਨਾ ਸ਼ੁਰੂ ਕਰਨ ਲਈ ਕਿਹਾ ਗਿਆ ਹੈ, ਜਿਨ੍ਹਾਂ ‘ਚ ਪਿਛਲੇ 30 ਦਿਨਾਂ ਦੌਰਾਨ 50 ਫੀਸਦੀ ਤੋਂ ਘੱਟ ਸੀਟਾਂ ਭਰੀਆਂ ਗਈਆਂ ਸਨ। ਰੇਲਵੇ ਬੋਰਡ ਨੇ ਇਹ ਫੈਸਲਾ ਉਸ ਸਮੇਂ ਲਿਆ ਹੈ ਜਦੋਂ ਪਿਛਲੇ ਦਿਨਾਂ ‘ਚ ਕੁਝ ਰੂਟਾਂ ‘ਤੇ ਵੰਦੇ ਭਾਰਤ ਟਰੇਨਾਂ ‘ਚ ਸੀਟਾਂ ਖਾਲੀ ਰਹਿਣ ਦੀਆਂ ਖਬਰਾਂ ਸਾਹਮਣੇ ਆਈਆਂ ਸਨ। ਰਿਪੋਰਟ ਵਿੱਚ ਕਿਹਾ ਗਿਆ ਸੀ ਕਿ ਘੱਟ ਦੂਰੀ ਵਾਲੀਆਂ ਵੰਦੇ ਭਾਰਤ ਟਰੇਨਾਂ ਵਿੱਚ ਸੀਟਾਂ ਪੂਰੀ ਤਰ੍ਹਾਂ ਨਹੀਂ ਭਰੀਆਂ ਜਾ ਰਹੀਆਂ ਹਨ।
ਇਸ ਦੇ ਮੱਦੇਨਜ਼ਰ ਹੀ ਰੇਲਵੇ ਨੇ ਸਾਰੀਆਂ ਟਰੇਨਾਂ ਦੇ ਏਸੀ ਚੇਅਰ ਕਾਰ ਅਤੇ ਐਗਜ਼ੀਕਿਊਟਿਵ ਕਲਾਸ ਦੇ ਕਿਰਾਏ ‘ਚ 25 ਫੀਸਦੀ ਤੱਕ ਕਟੌਤੀ ਕਰਨ ਦਾ ਐਲਾਨ ਕੀਤਾ ਹੈ। ਹਾਲ ਹੀ ਵਿੱਚ ਇਹ ਜਾਣਕਾਰੀ ਵੀ ਸਾਹਮਣੇ ਆਈ ਸੀ ਕਿ ਇੰਦੌਰ-ਭੋਪਾਲ, ਭੋਪਾਲ-ਜਬਲਪੁਰ ਅਤੇ ਨਾਗਪੁਰ-ਬਿਲਾਸਪੁਰ ਵਰਗੀਆਂ ਵੰਦੇ ਭਾਰਤ ਟਰੇਨਾਂ ਦੇ ਕਿਰਾਏ ਦੀ ਸਮੀਖਿਆ ਕੀਤੀ ਜਾ ਰਹੀ ਹੈ। ਇਨ੍ਹਾਂ ਟਰੇਨਾਂ ਦੀਆਂ ਸੀਟਾਂ ਕਾਫੀ ਹੱਦ ਤੱਕ ਖਾਲੀ ਚੱਲ ਰਹੀਆਂ ਹਨ।