ਜਲੰਧਰ : ਇਕੋ ਰਾਤ ਦੋ ਘਰਾਂ ਨੂੰ ਨਿਸ਼ਾਨਾਂ ਬਣਾਉਂਦਿਆਂ ਚੋਰਾਂ ਨੇ ਇਕ ਘਰ ‘ਚੋਂ ਮੋਬਾਇਲ ਅਤੇ ਨਕਦੀ ਚੋਰੀ ਕੀਤੀ ਤੇ ਬਾਅਦ ‘ਚ ਗੁਆਂਢੀਆਂ ਦੇ ਘਰ ਦਾਖ਼ਲ ਹੋ ਕੇ ਮੋਬਾਇਲ ਤੇ ਹਜ਼ਾਰਾਂ ਰੁਪਏ ਦੀ ਨਕਦੀ ‘ਤੇ ਹੱਥ ਸਾਫ਼ ਕੀਤਾ। ਉਕਤ ਸਾਰੀ ਘਟਨਾ ਘਰ ਵਿੱਚ ਲੱਗੇ ਸੀਸੀਟੀਵੀ ਕੈਮਰੇ ਵਿੱਚ ਕੈਦ ਹੋ ਗਈ।ਇਸ ਸੰਬੰਧੀ ਜਾਣਕਾਰੀ ਦਿੰਦੇ ਹੋਏ ਰਾਜੀਵ ਕੁਮਾਰ ਵਾਸੀ ਬਾਬਾ ਦੀਪ ਸਿੰਘ ਨਗਰ ਨੇ ਦੱਸਿਆ ਕਿ ਬੀਤੀ ਰਾਤ ਇਕ ਨੌਜਵਾਨ ਵੱਲੋਂ ਗੁਆਂਢੀਆਂ ਦੇ ਘਰੋਂ ਚਾਰ ਮੋਬਾਇਲ ਤੇ ਹਜ਼ਾਰਾਂ ਰੁਪਏ ਦੀ ਨਕਦੀ ਚੋਰੀ ਕੀਤੀ ਗਈ। ਇਸ ਤੋਂ ਬਾਅਦ ਉਸ ਨੇ ਗੁਆਂਢੀਆਂ ਦੀ ਪੌੜੀ ਉਨ੍ਹਾਂ ਦੇ ਘਰ ਦੇ ਪਿਛਲੇ ਪਾਸੇ ਲੱਗਦੇ ਕੁਆਰਟਰਾਂ ਵਿੱਚ ਲਾਈ ਤੇ ਉਨ੍ਹਾਂ ਦੀ ਛੱਤ ‘ਤੇ ਆ ਗਿਆ।
ਘਰ ਦੀ ਪਹਿਲੀ ਮੰਜ਼ਿਲ ‘ਤੇ ਬਣੇ ਕਮਰੇ ਵਿੱਚੋਂ ਇੱਕ ਮੋਬਾਇਲ, ਪਰਸ ਜਿਸ ਵਿਚ ਚਾਰ ਪੰਜ ਹਜ਼ਾਰ ਰੁਪਏ ਸਨ ਚੋਰੀ ਕਰ ਲਿਆ। ਇਸ ਤੋਂ ਬਾਅਦ ਹੇਠਾ ਉਤਰ ਕੇ ਦੁਕਾਨ ਦੀਆਂ ਚਾਬੀਆਂ ਲੱਭਣੀਆਂ ਸ਼ੁਰੂ ਕਰ ਦਿੱਤੀਆਂ। ਪਰ ਜਦ ਉਸ ਨੂੰ ਦੁਕਾਨ ਦੀਆਂ ਚਾਬੀਆਂ ਨਹੀਂ ਮਿਲੀਆਂ ਤਾਂ ਉਹ ਫਿਰ ਕਮਰਿਆਂ ਵਿੱਚ ਗਿਆ ਅਤੇ ਫਰਿੱਜ ਉੱਪਰ ਪਏ ਪੰਜ ਸੱਤ ਸੌ ਰੁਪਏ ਹੀ ਚੁੱਕ ਕੇ ਛੱਤ ਦੇ ਰਸਤੇ ਨੂੰ ਹੀ ਵਾਪਸ ਚਲਾ ਗਿਆ। ਸਵੇਰੇ ਜਦ ਉਨ੍ਹਾਂ ਨੇ ਘਰ ਵਿੱਚ ਲੱਗੇ ਸੀਸੀਟੀਵੀ ਕੈਮਰਿਆਂ ਦੀ ਫੁਟੇਜ ਚੈੱਕ ਕੀਤੀ ਤਾਂ ਉਕਤ ਨੌਜਵਾਨ ਕੈਮਰੇ ਵਿਚ ਕੈਦ ਹੋ ਚੁੱਕਿਆ ਸੀ। ਰਾਜੀਵ ਨੇ ਦੱਸਿਆ ਕਿ ਇਸ ਦੀ ਸ਼ਿਕਾਇਤ ਕਰਨ ਲਈ ਜਦ ਉਹ ਥਾਣਾ ਨੰਬਰ ਅੱਠ ਵਿੱਚ ਗਏ ਤਾਂ ਪੁਲਿਸ ਅਧਿਕਾਰੀ ਨੇ ਇਹ ਕਹਿ ਕੇ ਉਨ੍ਹਾਂ ਨੂੰ ਵਾਪਸ ਭੇਜ ਦਿੱਤਾ ਕਿ ਚੋਰੀ ਹੋਏ ਮੋਬਾਇਲਾਂ ਦੇ ਸਿਮ ਪਹਿਲਾਂ ਬੰਦ ਕਰਵਾਓ ਉਸ ਤੋਂ ਬਾਅਦ ਰਿਪੋਰਟ ਲਿਖਵਾਉਣ ਆਉਣਾ। ਜਿਸ ਕਾਰਨ ਉਹ ਬਿਨਾਂ ਰਿਪੋਰਟ ਲਿਖਵਾਏ ਹੀ ਥਾਣੇ ਤੋਂ ਵਾਪਸ ਆ ਗਏ। ਪੀੜਤ ਪਰਿਵਾਰਾਂ ਨੇ ਪੁਲਿਸ ਪ੍ਰਸ਼ਾਸਨ ਪਾਸੋਂ ਮੰਗ ਕਰਦਿਆਂ ਕਿਹਾ ਕਿ ਚੋਰਾਂ ਨੂੰ ਜਲਦ ਤੋਂ ਜਲਦ ਕਾਬੂ ਕੀਤਾ ਜਾਵੇ।
