ਚੰਡੀਗੜ, 18 ਅਪ੍ਰੈਲ 2022 : ਪੰਜਾਬ ਸਰਕਾਰ ਪੰਜਾਬ ਦੇ ਕਿਸਾਨਾਂ ਨੂੰ ਸਬਜੀਆਂ ਅਤੇ ਫਲਾਂ ‘ਤੇ ਐਮ. ਐਸ. ਪੀ. ਮਿਥ ਕੇ ਇਨ੍ਹਾਂ ਦੀ ਖਰੀਦ ਕਰੇ ਅਤੇ ਸਰਕਾਰੀ ਹਸਪਤਾਲਾਂ, ਥਾਣੇ, ਜੇਲਾਂ, ਮਿਡ ਡੇ ਮੀਲ ਅਤੇ ਹਰ ਸਰਕਾਰੀ ਕੰਨਟੀਨ ਨੂੰ ਸਪਲਾਈ ਕਰੇ। ਇਹ ਗੱਲ ਅੱਜ ਇਥੇ ਜਾਰੀ ਕੀਤੇ ਇਕ ਪ੍ਰੈਸ ਬਿਆਨ ਵਿਚ ਭਾਰਤੀ ਕਿਸਾਨ ਯੂਨੀਅਨ (ਰਾਜੇਵਾਲ) ਦੇ ਪ੍ਰਧਾਨ ਬਲਬੀਰ ਸਿੰਘ ਰਾਜੇਵਾਲ ਨੇ ਕਹੀ। ਉਨ੍ਹਾਂ ਕਿਹਾ ਕਿ ਇਸ ਪ੍ਰਕਿਰਆ ਨੂੰ ਸਮਝਣ ਲਈ ਪੰਜਾਬ ਸਰਕਾਰ ਅਧਿਕਾਰੀਆਂ ਦੀ ਇਕ ਟੀਮ ਕੇਰਲਾ ਭੇਜੇ।
ਉਨ੍ਹਾਂ ਮੰਗ ਕੀਤੀ ਕਿ ਪੰਜਾਬ ਦੇਸ਼ ਲਈ ਸਭ ਤੋਂ ਵੱਧ ਅਨਾਜ ਅਤੇ ਖੁਰਾਕ ਪੈਦਾ ਕਰਦਾ ਹੈ, ਪਰ ਪੰਜਾਬੀ ਕਿਸਾਨਾਂ ਨੂੰ ਕੋਈ ਵੀ ਬੰਦਰਗਾਹ ਨੇੜੇ ਨਾ ਹੋਣ ਕਾਰਨ ਕੌਮਾਂਤਰੀ ਮੰਡੀ ਦਾ ਲਾਭ ਨਹੀਂ ਮਿਲਦਾ। ਉਨ੍ਹਾਂ ਕਿਹਾ ਕਿ ਪੰਜਾਬ ਦੇ ਕਿਸਾਨ ਕੌਮਾਂਤਰੀ ਮੰਡੀ ‘ਚ ਵਧੀ ਮੰਗ ਕਾਰਨ ਵਧੇ ਰੇਟਾਂ ਦਾ ਲਾਭ ਨਹੀਂ ਲੈ ਸਕਦੇ। ਉਨ੍ਹਾਂ ਕਿਹਾ ਕਿ ਮੁਖ ਮੰਤਰੀ ਪੰਜਾਬ ਨੂੰ ਚਾਹੀਦਾ ਹੈ ਕਿ ਉਹ ਪ੍ਰਧਾਨ ਮੰਤਰੀ ਮੋਦੀ ਕੋਲ ਪਾਕਿਸਤਾਨ ਰਾਹੀਂ ਦੂਜੇ ਦੇਸ਼ਾਂ ਨਾਲ ਵਪਾਰ ਕਰਨ ਲਈ ਬਾਰਡਰ ਖੋਲਣ ਦਾ ਮੁਦਾ ਉਠਾਉਣ। ਉਂਝ ਵੀ ਇਸ ਵੇਲੇ ਦੇ ਪਾਕਿਸਤਾਨੀ ਪ੍ਰਧਾਨ ਮੰਤਰੀ ਵੀ ਮੋਦੀ ਦੇ ਦੋਸਤਾਂ ‘ਚ ਗਿਣੇ ਜਾਂਦੇ ਹਨ ਜਿਨ੍ਹਾਂ ਦੇ ਵਿਆਹ ਸਮਾਗਮ ‘ਚ ਸ਼ਾਮਲ ਹੋਣ ਲਈ ਸਾਡੇ ਪ੍ਰਧਾਨ ਮੰਤਰੀ ਮੋਦੀ ਗਏ ਸਨ। ਇਸ ਲਈ ਇਹ ਦੋਨਾਂ ਦੇਸ਼ਾਂ ਦੇ ਹਿੱਤ ‘ਚ ਹੋਵੇਗਾ ਕਿ ਵਪਾਰਕ ਵਾਧੇ ਲਈ ਬਾਰਡਰ ਖੋਲ੍ਹੇ ਜਾਣ।
ਅੱਜ ਜਲਾਲਾਬਾਦ ‘ਚ ਸਹਿਕਾਰੀ ਖੇਤੀਬਾੜੀ ਵਿਕਾਸ ਬੈਂਕ ਵਾਲੇ ਇਕ ਕਿਸਾਨ ਦੀ ਗ੍ਰਿਫਤਾਰੀ ਕਰਨ ਨੂੰ ਰਾਜੇਵਾਲ ਨੇ ਮੰਦਭਾਗਾ ਕਿਹਾ। ਉਨ੍ਹਾਂ ਕਿਹਾ ਕਿ ਸਹਿਕਾਰੀ ਵਿਭਾਗ ਦੇ ਕਰਮਚਾਰੀਆਂ ਨੂੰ ਡਿਫਾਲਟਰ ਕਿਸਾਨਾਂ ਤੋਂ ਵਸੂਲੀ ਕਰਨ ਸਮੇਂ ਧਾਰਾ 67 ਏ ਮਿਲੇ ਅਧਿਕਾਰ ਬਰਨਾਲਾ ਸਰਕਾਰ ਵੇਲੇ ਸਸਪੈਂਡ ਕਰ ਦਿਤੇ ਗਏ ਸਨ। ਇਸ ਲਈ ਇਹ ਹੋਰ ਵੀ ਦੁਖਦਾਈ ਹੈ ਕਿ ਕਿਸਾਨ ਪਰਿਵਾਰ ‘ਚ ਹੋਣ ਵਾਲਾ ਮੁਖ ਮੰਤਰੀ ਆਪਣੇ ਅਧਿਕਾਰੀਆਂ ਨੂੰ ਇਸ ਧਾਰਾ ਹੇਠ ਗ੍ਰਿਫਤਾਰੀ ਦੀ ਆਗਿਆ ਦੇਵੇ। ਉਨ੍ਹਾਂ ਕਿਹਾ ਕਿ ਇਸ ਦੇਸ਼ ‘ਚ ਆਮ ਲੋਕਾਂ ਅਤੇ ਸਰਮਾਏਦਾਰਾਂ ਲਈ ਕਾਨੂੰਨ ਵੱਖੋ ਵੱਖਰੇ ਹਨ। ਜੇਕਰ ਕੋਈ ਕਾਰਪੋਰੇਟ ਘਰਾਣਾ ਹਜ਼ਾਰਾਂ ਕਰੋੜਾਂ ਦਾ ਕਰਜਾ ਲੈ ਕੇ ਡਕਾਰ ਮਾਰ ਜਾਵੇ ਤਾਂ ਸਰਕਾਰ ਉਨ੍ਹਾਂ ਨੂੰ ਕਦੀ ਗ੍ਰਿਫਤਾਰ ਨਹੀਂ ਕਰਦੀ। ਇਸਦੀ ਮਿਸਾਲ ਅਨੇਕਾਂ ਖਾਸਕਰ ਗੁਜਰਾਤੀ ਵਪਾਰੀਆਂ ਦੀਆਂ ਮਿਲਦੀਆਂ ਹਨ ਜੋ ਦੇਸ਼ ਦੀਆਂ ਬੈਂਕਾਂ ਦਾ ਹਜ਼ਾਰਾਂ ਕਰੋੜਾਂ ਲੁੱਟ ਕੇ ਸਰਕਾਰ ਦੀ ਮਿਲੀਭਗਤ ਨਾਲ ਵਿਕਸਤ ਦੇਸ਼ਾਂ ‘ਚ ਮੌਜਾਂ ਉਡਾ ਰਹੇ ਹਨ। ਉਨ੍ਹਾਂ ਮੰਗ ਕੀਤੀ ਕਿ ਸਰਕਾਰ ਆਪਣਾ ਰੋਲ ਸਪਸ਼ਟ ਕਰੇ ਅਤੇ ਕਿਸਾਨ ਨੂੰ ਗ੍ਰਿਫਤਾਰ ਕਰਨ ਵਾਲੇ ਕਰਮਚਾਰੀਆਂ ਵਿਰੁੱਧ ਸਖਤ ਕਾਰਵਾਈ ਕਰੇ।