ਦੇਸ਼ ‘ਚ ਹਰ ਰੋਜ਼ ਹੋ ਰਹੀ ਆਨਲਾਈਨ ਧੋਖਾਧੜੀ ਨੂੰ ਰੋਕਣ ਲਈ ਸਰਕਾਰ ਨੇ ਵੱਡਾ ਫੈਸਲਾ ਲਿਆ ਹੈ। ਦੂਰਸੰਚਾਰ ਵਿਭਾਗ ਨੇ ਸਾਰੀਆਂ ਦੂਰਸੰਚਾਰ ਕੰਪਨੀਆਂ ਨੂੰ USSD ਆਧਾਰਿਤ ਕਾਲ ਫਾਰਵਰਡਿੰਗ ਸੇਵਾ ਬੰਦ ਕਰਨ ਦਾ ਹੁਕਮ ਦਿੱਤਾ ਹੈ। 15 ਅਪ੍ਰੈਲ, 2024 ਤੋਂ ਬਾਅਦ ਦੇਸ਼ ਵਿੱਚ ਕਾਲ ਫਾਰਵਰਡਿੰਗ ਸੇਵਾ ਬੰਦ ਹੋ ਜਾਵੇਗੀ।
ਵਿਭਾਗ ਵੱਲੋਂ ਇਸ ਸਬੰਧ ਵਿੱਚ ਇੱਕ ਨੋਟਿਸ ਜਾਰੀ ਕੀਤਾ ਗਿਆ ਹੈ ਜਿਸ ਵਿੱਚ ਕਿਹਾ ਗਿਆ ਹੈ ਕਿ USSD ਅਧਾਰਤ ਕਾਲ ਫਾਰਵਰਡਿੰਗ ਲਈ ਸਾਰੇ ਲਾਇਸੈਂਸ 15 ਅਪ੍ਰੈਲ ਤੋਂ ਅਵੈਧ ਹੋ ਜਾਣਗੇ। ਵਿਭਾਗ ਵੱਲੋਂ ਇਹ ਫੈਸਲਾ ਆਨਲਾਈਨ ਧੋਖਾਧੜੀ ਨੂੰ ਰੋਕਣ ਲਈ ਲਿਆ ਗਿਆ ਹੈ।
ਦੱਸ ਦਈਏ ਕਿ USSD ਇੱਕ ਅਜਿਹਾ ਫੀਚਰ ਹੈ ਜੋ ਉਪਭੋਗਤਾਵਾਂ ਨੂੰ ਉਹਨਾਂ ਦੇ ਕੀਪੈਡ ‘ਤੇ ਖਾਸ ਕੋਡ ਡਾਇਲ ਕਰਕੇ ਕਈ ਫੋਨ ਸੇਵਾਵਾਂ ਤੱਕ ਪਹੁੰਚ ਕਰਨ ਦੀ ਆਗਿਆ ਦਿੰਦੀ ਹੈ। ਸਧਾਰਨ ਭਾਸ਼ਾ ਵਿੱਚ, ਫ਼ੋਨ ਵਿੱਚ ਪ੍ਰੀਪੇਡ ਬੈਲੇਂਸ ਚੈੱਕ ਕਰਨ ਲਈ ਅਸੀਂ ਜੋ ਨੰਬਰ ਡਾਇਲ ਕਰਦੇ ਹਾਂ, ਉਹ ਵੀ USSD ਰਾਹੀਂ ਕੀਤਾ ਜਾਂਦਾ ਹੈ। ਇਸ ਤੋਂ ਇਲਾਵਾ ਫੋਨ ਦਾ IMEI ਨੰਬਰ ਦੇਖਣ ਲਈ USSD ਕੋਡ ਦੀ ਮਦਦ ਵੀ ਲਈ ਜਾਂਦੀ ਹੈ।
USSD ਕੋਡ ਰਾਹੀਂ ਕਾਲ ਫਾਰਵਰਡਿੰਗ ਨੂੰ ਵੀ ਐਕਟੀਵੇਟ ਕੀਤਾ ਜਾ ਸਕਦਾ ਹੈ। ਕਾਲ ਫਾਰਵਰਡਿੰਗ ਦਾ ਮਤਲਬ ਹੈ ਕਿ ਜੇਕਰ ਤੁਸੀਂ ਆਪਣੇ ਨੰਬਰ ਤੋਂ ਕਿਸੇ ਹੋਰ ਨੰਬਰ ‘ਤੇ ਕਾਲਾਂ ਨੂੰ ਫਾਰਵਰਡ ਕੀਤਾ ਹੈ, ਤਾਂ ਤੁਹਾਡੇ ਨੰਬਰ ‘ਤੇ ਆਉਣ ਵਾਲੀਆਂ ਕਾਲਾਂ ਦੂਜੇ ਨੰਬਰ ‘ਤੇ ਜਾਣਗੀਆਂ। ਘੁਟਾਲੇਬਾਜ਼ ਇਸ ਸੇਵਾ ਦੀ ਵਰਤੋਂ ਗੈਰ-ਕਾਨੂੰਨੀ ਗਤੀਵਿਧੀਆਂ ਲਈ ਕਰ ਰਹੇ ਹਨ। ਇਹੀ ਕਾਰਨ ਹੈ ਕਿ ਦੂਰਸੰਚਾਰ ਵਿਭਾਗ ਵੱਲੋਂ ਇਹ ਕਾਰਵਾਈ ਕੀਤੀ ਜਾ ਰਹੀ ਹੈ।