ਟੀਮ ਇੰਡੀਆ ਟੀ-20 ਵਿਸ਼ਵ ਕੱਪ ਦੇ ਦੂਜੇ ਸੈਮੀਫਾਈਨਲ ‘ਚ ਭਲਕੇ ਯਾਨੀ ਵੀਰਵਾਰ 10 ਨਵੰਬਰ ਨੂੰ ਐਡੀਲੇਡ ‘ਚ ਇੰਗਲੈਂਡ ਨਾਲ ਭਿੜੇਗੀ। ਅੱਜ ਬੁੱਧਵਾਰ ਨੂੰ ਅਭਿਆਸ ਸੈਸ਼ਨ ਦੌਰਾਨ ਵਿਰਾਟ ਜ਼ਖਮੀ ਹੋ ਗਏ। ਹਾਲਾਂਕਿ, ਚਿੰਤਾ ਕਰਨ ਦੀ ਕੋਈ ਲੋੜ ਨਹੀਂ ਹੈ ਕਿਉਂਕਿ ਕੁਝ ਮਿੰਟਾਂ ਬਾਅਦ ਉਹ ਫਿਰ ਨੈੱਟ ‘ਤੇ ਵਾਪਿਸ ਪਰਤੇ ਅਤੇ ਅਭਿਆਸ ਜਾਰੀ ਰੱਖਿਆ।
ਦੱਸ ਦਈਏ ਕਿ ਕੋਹਲੀ ਨੂੰ ਜਿਵੇਂ ਹੀ ਹਰਸ਼ਲ ਦੀ ਗੇਂਦ ਲੱਗੀ ਤਾਂ ਉਨ੍ਹਾਂ ਨੇ ਨੈੱਟ ਛੱਡ ਦਿੱਤਾ ਅਤੇ ਪਿੱਛੇ ਵੱਲ ਚਲੇ ਗਏ। ਕੁਝ ਮਿੰਟਾਂ ਬਾਅਦ, ਕਿੰਗ ਕੋਹਲੀ ਫਿਰ ਨੈੱਟ ‘ਤੇ ਦਿਖਾਈ ਦਿੱਤੇ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਕਈ ਲੰਬੇ ਸਟਰੋਕ ਖੇਡੇ। ਟੀਮ ਮੈਨੇਜਮੈਂਟ ਵੱਲੋਂ ਵਿਰਾਟ ਦੀ ਇਸ ਸੱਟ ਬਾਰੇ ਕੋਈ ਜਾਣਕਾਰੀ ਨਹੀਂ ਦਿੱਤੀ ਗਈ ਹੈ।
ਜ਼ਿਕਰਯੋਗ ਹੈ ਕਿ ਇਸ ਤੋਂ ਪਹਿਲਾਂ ਮੰਗਲਵਾਰ ਨੂੰ ਕਪਤਾਨ ਰੋਹਿਤ ਸ਼ਰਮਾ ਨੂੰ ਵੀ ਥ੍ਰੋ ਆਰਮ ਗੇਂਦ ਨਾਲ ਗੁੱਟ ‘ਤੇ ਸੱਟ ਲੱਗ ਗਈ ਸੀ ਅਤੇ ਉਹ ਨੈੱਟ ਛੱਡ ਕੇ ਚਲੇ ਗਏ ਸਨ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਵੀ ਵਾਪਸ ਆ ਕੇ ਅਭਿਆਸ ਕੀਤਾ। ਫਿਲਹਾਲ ਟੀਮ ਇੰਡੀਆ ਦੇ ਇਹ ਦੋ ਟਾਪ ਆਰਡਰ ਬੱਲੇਬਾਜ਼ ਫਿੱਟ ਹਨ ਅਤੇ ਇੰਗਲੈਂਡ ਖਿਲਾਫ ਮੈਦਾਨ ‘ਚ ਉਤਰਨ ਲਈ ਤਿਆਰ ਹਨ।