ਕੇਂਦਰੀ ਕੈਬਨਿਟ ਨੇ ਕਣਕ ਦੇ ਘੱਟੋ-ਘੱਟ ਸਮਰਥਨ ਮੁੱਲ (ਐੱਮ ਐੱਸ ਪੀ) ਵਿੱਚ 25 ਰੁਪਏ ਫ਼ੀ ਕੁਇੰਟਲ ਦੇ ਵਾਧੇ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ। ਕੇਂਦਰੀ ਸੂਚਨਾ ਤੇ ਪ੍ਰਸਾਰਨ ਮੰਤਰੀ ਅਸ਼ਵਨੀ ਵੈਸ਼ਨਵ ਨੇ ਬੁੱਧਵਾਰ ਨੂੰ ਕਿਹਾ ਕਿ ਇਸ ਵਾਧੇ ਨਾਲ 2027-28 ਹਾੜ੍ਹੀ ਮਾਰਕੀਟਿੰਗ ਸਾਲ ਵਿੱਚ ਕਣਕ ਦਾ ਭਾਅ 2,610 ਰੁਪਏ ਫ਼ੀ ਕੁਇੰਟਲ ਨੂੰ ਪਹੁੰਚ ਜਾਵੇਗਾ। ਮਾਰਕੀਟਿੰਗ ਸਾਲ 2026-27 (ਅਪਰੈਲ ਤੋਂ ਮਾਰਚ) ਲਈ ਕਣਕ ਦੀ ਐੱਮ ਐੱਸ ਪੀ 2,585 ਰੁਪਏ ਫ਼ੀ ਕੁਇੰਟਲ ਤੈਅ ਕੀਤੀ ਗਈ ਸੀ।
ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਗਵਾਈ ਵਿੱਚ ਹੋਈ ਕੇਂਦਰੀ ਕੈਬਨਿਟ ਦੀ ਬੈਠਕ ਦੌਰਾਨ ਖੇਤੀ ਮੰਤਰਾਲੇ ਵੱਲੋਂ ਕਣਕ ਤੇ ਹਾੜ੍ਹੀ ਦੀਆਂ ਪੰਜ ਹੋਰਨਾਂ ਫ਼ਸਲਾਂ ਲਈ ਐੱਮ ਐੱਸ ਪੀ ਸਬੰਧੀ ਤਜਵੀਜ਼ਾਂ ਨੂੰ ਮਨਜ਼ੂਰ ਕਰ ਲਿਆ ਗਿਆ। ਵੈਸ਼ਨਵ ਨੇ ਪੱਤਰਕਾਰਾਂ ਨੂੰ ਦੱਸਿਆ, ‘‘ਕਣਕ ਉੱਤੇ 1264 ਰੁਪਏ ਫ਼ੀ ਕੁਇੰਟਲ ਦਾ ਲਾਗਤ ਖ਼ਰਚਾ ਆਉਂਦਾ ਹੈ, ਪਰ 2027-28 ਲਈ ਘੱਟੋ ਘੱਟ ਸਮਰਥਨ ਮੁੱਲ ਨੂੰ ਦੁੱਗਣੇ ਤੋਂ ਵੱਧ ਰੱਖਿਆ ਗਿਆ ਹੈ।’’ ਇਸੇ ਤਰ੍ਹਾਂ ਜੌਂਅ ਦੇ ਭਾਅ ਨੂੰ 2027-28 ਹਾੜ੍ਹੀ ਮਾਰਕੀਟਿੰਗ ਸਾਲ ਲਈ ਵਧਾ ਕੇ 2,286 ਰੁਪਏ ਫ਼ੀ ਕੁਇੰਟਲ ਕਰ ਦਿੱਤਾ ਹੈ। ਪਹਿਲਾਂ ਇਹ 2150 ਰੁਪਏ ਫ਼ੀ ਕੁਇੰਟਲ ਸੀ।
ਦਾਲਾਂ ਵਿੱਚ ਛੋਲਿਆਂ ਦਾ ਸਮਰਥਨ ਮੁੱਲ 5,875 ਰੁਪਏ ਫ਼ੀ ਕੁਇੰਟਲ ਤੋਂ 83 ਰੁਪਏ ਦੇ ਵਾਧੇ ਨਾਲ 5,958 ਰੁਪਏ ਫ਼ੀ ਕੁਇੰਟਲ ਕੀਤਾ ਗਿਆ ਹੈ। ਇਸੇ ਅਰਸੇ ਦੌਰਾਨ ਮਸੂਰ ਦੀ ਐੱਮ ਐੈੱਸ ਪੀ 390 ਰੁਪਏ ਵਧਾ ਕੇ 7,390 ਫ਼ੀ ਕੁਇੰਟਲ ਕੀਤੀ ਗਈ ਹੈ। ਤੇਲ-ਬੀਜਾਂ ਦੇ ਮਾਮਲੇ ਵਿੱਚ, ਰੇਪਸੀਡ/ਸਰ੍ਹੋਂ ਦੇ ਬੀਜਾਂ ਦਾ ਸਮਰਥਨ ਮੁੱਲ 6,200 ਰੁਪਏ ਪ੍ਰਤੀ ਕੁਇੰਟਲ ਤੋਂ 413 ਰੁਪਏ ਵਧਾ ਕੇ 6,613 ਰੁਪਏ ਪ੍ਰਤੀ ਕੁਇੰਟਲ ਕਰ ਦਿੱਤਾ ਗਿਆ ਹੈ, ਜਦੋਂ ਕਿ ਕੁਸੁੰਭ ਦੀ ਦਰ ਪਿਛਲੇ ਸਾਲ ਦੇ 6,540 ਰੁਪਏ ਪ੍ਰਤੀ ਕੁਇੰਟਲ ਤੋਂ 675 ਰੁਪਏ ਵਧਾ ਕੇ 7,215 ਰੁਪਏ ਪ੍ਰਤੀ ਕੁਇੰਟਲ ਕਰ ਦਿੱਤੀ ਗਈ ਹੈ।
