ਬਹਾਵਲਪੁਰ ਮਹਾਂਸੰਘ ਵੱਲੋਂ ਬਰਾਦਰੀ ਮਹਾਂ ਸੰਮੇਲਨ ਨੂੰ ਸਫ਼ਲ ਬਣਾਉਣ ਲਈ ਗੁਜਰਾਤ ਮਹਾਰਾਸ਼ਟਰ ਤੱਕ ਪਹੁੰਚ ਕੀਤੀ ਜਾ ਰਹੀ ਹੈ। ਬਹਾਵਲਪੁਰ ਵੈਲਫੇਅਰ ਮਹਾਂਸੰਘ ਦੀ ਟੀਮ ਦੇਸ਼ ਦੇ ਵੱਖ-ਵੱਖ ਸੂਬਿਆਂ ‘ਚ ਜਾ ਕੇ ਬਹਾਵਲਪੁਰ ਭਾਈਚਾਰੇ ਦੇ ਲੋਕਾਂ ਨੂੰ ਸੱਦਾ ਦੇ ਰਹੀ ਹੈ। ਗੁਜਰਾਤ ਦੇ ਸੂਰਤ ਪਹੁੰਚ ਕੇ ਟੀਮ ਨੇ ਬਹਾਵਲਪੁਰ ਭਾਈਚਾਰੇ ਨੂੰ ਸੱਦਾ ਦਿੱਤਾ ਹੈ। ਰਾਜਪੁਰਾ ਦੇ ਵਿੱਚ ਅਗਾਮੀ 24 ਮਈ ਨੂੰ ਰਾਜਪੁਰਾ ਦੇ ਸਥਾਨਕ ਅਭਿਨੰਦਨ ਪੈਲੇਸ ਵਿਖੇ ਬਰਾਦਰੀ ਦਾ ਮਹਾਂ ਸੰਮੇਲਨ ਕਰਵਾਇਆ ਜਾ ਰਿਹਾ ਹੈ। ਜਿਸ ਦੇ ਤਹਿਤ ਬਹਾਵਲਪੁਰ ਮਹਾਂਸੰਘ ਦੀ ਟੀਮ ਗੁਜਰਾਤ ਤੋਂ ਲੈ ਕੇ ਮਹਾਰਾਸ਼ਟਰ ਤੱਕ ਜਾ ਪਹੁੰਚੀ ਹੈ। ਸੰਘ ਦੇ ਪ੍ਰਮੁੱਖ ਆਗੂ ਕ੍ਰਿਸ਼ਨ ਕੁਮਾਰ ਕੁਕਰੇਜਾ ਸਮੇਤ ਸੁਸ਼ੀਲ ਕਾਲੜਾ, ਰਘੂਨਾਥ, ਗੁਲਸ਼ਨ ਚੋਪੜਾ, ਗੁਲਸ਼ਨ ਧਮੀਜਾ, ਰਮੇਸ਼ ਭਾਟੀਆ ਵੱਲੋਂ 24 ਮਈ ਦੇ ਪ੍ਰੋਗਰਾਮ ਬਾਰੇ ਦੱਸਦਿਆਂ ਸੂਰਤ ਦੇ ਬਹਾਵਲਪੁਰ ਭਾਈਚਾਰੇ ਨੂੰ ਸੱਦਾ ਪੱਤਰ ਦਿੱਤਾ ਗਿਆ।
ਤੁਹਾਨੂੰ ਦੱਸ ਦਈਏ ਕਿ ਬਹਾਵਲਪੁਰ ਮਹਾਂਸੰਘ ਦੇ ਇਸ ਸੰਮੇਲਨ ਨੂੰ ਕਰਵਾਉਣ ਦਾ ਮੁੱਖ ਮਕਸਦ ਸਾਰੇ ਸਮਾਜ ਨੂੰ ਇਕੱਠਾ ਕਰਨਾ ਹੈ। ਸੰਘ ਦੇ ਪ੍ਰਮੁੱਖ ਆਗੂ ਕ੍ਰਿਸ਼ਨ ਕੁਮਾਰ ਕੁਕਰੇਜਾ ਨੇ ਕੇਂਦਰ ਸਰਕਾਰ ਤੋਂ ਮੰਗ ਕੀਤੀ ਹੈ ਕਿ ਬਹਾਵਲਪੁਰ ਭਾਸ਼ਾ ਨੂੰ ਦੇਸ਼ ਦੇ ਵਿੱਚ ਮਾਨਤਾ ਦਿੱਤੀ ਜਾਵੇ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਆਪਣੇ ਗੁਜਰਾਤ ਦੇ ਸੂਰਤ ਦੌਰੇ ਬਾਰੇ ਵੀ ਦੱਸਿਆ ਤੇ ਕਿਹਾ ਕਿ ਉਨ੍ਹਾਂ ਦਾ ਸੂਰਤ ਦੌਰਾ ਬਹੁਤ ਵਧੀਆ ਰਿਹਾ। ਕਾਬੀਲੇਗੌਰ ਹੈ ਕਿ ਬਹਾਵਲਪੁਰੀ ਭਾਈਚਾਰੇ ਦੇ ਲੋਕ 1947 ‘ਚ ਵੰਡ ਸਮੇਂ ਭਾਰਤ ਵਿੱਚ ਆਏ ਸਨ। ਦੱਸ ਦਈਏ ਸੰਘ ਵੱਲੋਂ ਕਰਵਾਏ ਜਾ ਰਹੇ ਇਸ ਸੰਮੇਲਨ ਵਿੱਚ ਪੂਰੇ ਭਾਰਤ ਵਿੱਚੋਂ ਬਰਾਦਰੀ ਦੀਆਂ ਮਹਾਨ ਹਸਤੀਆਂ ਨੂੰ ਉਨ੍ਹਾਂ ਵੱਲੋਂ ਮੁੰਬਈ, ਦਿੱਲੀ ਅਤੇ ਹੋਰਨਾ ਸ਼ਹਿਰਾਂ ਵਿੱਚ ਜਾ ਕੇ ਸਮਾਗਮ ਵਿੱਚ ਪੁੱਜਣ ਲਈ ਸੱਦਾ ਦਿੱਤਾ ਜਾ ਰਿਹਾ ਹੈ।
ਸੰਘ ਵੱਲੋਂ ਕਰਵਾਏ ਜਾ ਰਹੇ ਬਰਾਦਰੀ ਮਹਾਂ ਸੰਮੇਲਨ ਸਮਾਗਮ ਵਿੱਚ ਬਰਾਦਰੀ ਨਾਲ ਸਬੰਧਿਤ ਫ਼ਿਲਮੀ ਕਲਾਕਾਰ, ਰਾਜਨੀਤੀ ਹਸਤੀਆਂ ਅਤੇ ਉੱਚ ਅਹੁਦਿਆਂ ਉੱਤੇ ਬੈਠੀਆਂ ਦੇਸ਼ ਦੀਆਂ ਮਹਾਨ ਹਸਤੀਆਂ ਵੱਲੋਂ ਰਾਜਪੁਰਾ ਪਹੁੰਚ ਕੇ ਇਸ ਸਮਾਗਮ ਦੀ ਸ਼ਾਨ ਵਧਾਈ ਜਾਵੇਗੀ। ਸੂਰਤ ਵਿਚ ਬਹਾਵਲਪੁਰ ਮਹਾਂਸੰਘ ਦੀ ਟੀਮ ਦਾ ਸਵਾਗਤ ਮੁਕੇਸ਼, ਮਦਨ ਲਾਲ, ਓਮ ਪ੍ਰਕਾਸ਼, ਭਗਵਤੀ, ਸੁਰੇਖਾ, ਰਾਜੇਸ਼, ਕਿਰਨ, ਜਯੋਤੀ, ਨੈਣਾ, ਸੰਗੀਤਾ ਵੱਲੋਂ ਕੀਤਾ ਗਿਆ।
ਹੁਣ ਬਹਾਵਲਪੁਰ ਮਹਾਂਸੰਘ ਦਾ ਸਾਰਾ ਕਾਫ਼ਲਾ ਮਹਾਰਾਸ਼ਟਰ ਪਹੁੰਚ ਚੁੱਕਾ ਹੈ ਜਿੱਥੇ ਧੁਲੀਆ ਸ਼ਹਿਰ ਦੇ ਧੌਲਪੁਰ ਭਵਨ ਪੰਚਾਇਤ ਵਿੱਚ ਬਹਾਵਲਪੁਰ ਨਾਲ ਬੈਠਕ ਹੋਈ ਤੇ ਮਹਾਂਸੰਘ ਦੇ 24 ਮਈ ਨੂੰ ਹੋਣ ਜਾ ਰਹੇ ਮਹਾਂ ਸੰਮੇਲਨ ਨੂੰ ਸਫ਼ਲ ਬਣਾਉਣ ਲਈ ਸੱਦਾ ਦਿੱਤਾ ਗਿਆ। ਤੁਹਾਨੂੰ ਦੱਸ ਦਈਏ ਕਿ ਇਸ ਮਹਾਂ ਸੰਮੇਲਨ ਵਿੱਚ ਕੇਂਦਰੀ ਮੰਤਰੀ ਅਨੁਰਾਗ ਠਾਕੁਰ, ਸਾਬਕਾ ਰਾਜਪਾਲ ਜਗਦੀਸ਼ ਮੁਖੀ, ਸਾਬਕਾ ਬਾਲੀਵੁੱਡ ਦੇ ਸਿਤਾਰੇ ਅਰੁਣ ਬਖਸ਼ੀ,ਗਿਰੀਜਾ ਸ਼ੰਕਰ ਵੀ ਪਹੁੰਚ ਰਹੇ ਹਨ।
