ਕ੍ਰਿਕਟਰ ਮਹਿੰਦਰ ਸਿੰਘ ਧੋਨੀ ਨੂੰ ਡਰੋਨ ਸਟਾਰਟਅੱਪ ਗਰੁੜ ਏਰੋਸਪੇਸ ਦਾ ਬ੍ਰਾਂਡ ਅੰਬੈਸਡਰ ਨਿਯੁਕਤ ਕੀਤਾ ਗਿਆ ਹੈ। ਕੰਪਨੀ ਨੇ 6 ਜੂਨ ਨੂੰ ਇਸ ਦਾ ਐਲਾਨ ਕੀਤਾ। ਇਸ ਤੋਂ ਇਲਾਵਾ ਧੋਨੀ ਨੇ ਇਸ ਕੰਪਨੀ ‘ਚ ਨਿਵੇਸ਼ ਵੀ ਕੀਤਾ ਹੈ ਜਿਸ ਨਾਲ ਉਹ ਇਸ ਦੇ ਸ਼ੇਅਰ ਹੋਲਡਰ ਬਣ ਗਏ ਹਨ। ਚੇਨਈ ਸਥਿਤ ਗਰੁੜ ਏਰੋਸਪੇਸ ਨੇ ਹਾਲ ਹੀ ਵਿੱਚ ਖੇਤੀਬਾੜੀ ਨੂੰ ਸਮਰਥਨ ਦੇਣ ਲਈ ਆਪਣੀਆਂ ਯੋਜਨਾਵਾਂ ਦਾ ਐਲਾਨ ਕੀਤਾ ਹੈ। ਕੰਪਨੀ ਨੇ ਅਪ੍ਰੈਲ ‘ਚ ਕਿਹਾ ਸੀ ਕਿ ਉਹ ਪਿੰਡ ਪੱਧਰ ਦੇ ਉੱਦਮੀਆਂ ਜਾਂ ਕੀਟਨਾਸ਼ਕ ਅਤੇ ਖਾਦ ਦੇ ਰਿਟੇਲਰਾਂ ਨੂੰ ਡਰੋਨ ਵੇਚਣ ਦੇ ਮਾਡਲ ‘ਤੇ ਕੰਮ ਕਰ ਰਹੀ ਹੈ।
ਗਰੁੜ ਏਰੋਸਪੇਸ ਦੇ ਸੀਈਓ ਅਗੇਸ਼ਵਰ ਜੈ ਪ੍ਰਕਾਸ਼ ਨੇ ਕਿਹਾ ਕਿ ਉਹ ਧੋਨੀ ਦੇ ਬਹੁਤ ਵੱਡੇ ਫੈਨ ਹਨ। ਉਨ੍ਹਾਂ ਕਿਹਾ ਕਿ ”ਗਰੁੜ ਏਰੋਸਪੇਸ ਪਰਿਵਾਰ ‘ਚ ਧੋਨੀ ਦਾ ਹੋਣਾ ਇਕ ਸੁਪਨੇ ਦੇ ਸਾਕਾਰ ਹੋਣ ਵਰਗਾ ਹੈ। ਕੈਪਟਨ ਕੂਲ ਦਾ ਸਮਰਥਨ ਸਾਡੀ ਟੀਮ ਨੂੰ ਬਿਹਤਰ ਪ੍ਰਦਰਸ਼ਨ ਕਰਨ ਲਈ ਪ੍ਰੇਰਿਤ ਕਰੇਗਾ।
ਦੱਸ ਦਈਏ ਕਿ ਗਰੁੜ ਏਰੋਸਪੇਸ ਔਨਲਾਈਨ ਫੂਡ ਡਿਲੀਵਰੀ ਸੇਵਾ Swiggy ਦੁਆਰਾ ਆਪਣੀ ਕਰਿਆਨੇ ਦੀ ਸੇਵਾ Instamart ਲਈ ਇੱਕ ਪਾਇਲਟ ਪ੍ਰੋਜੈਕਟ ਲਈ ਚੁਣੇ ਗਏ ਚਾਰ ਡਰੋਨ ਸਟਾਰਟਅੱਪਾਂ ਵਿੱਚੋਂ ਇੱਕ ਹੈ। ਪਾਇਲਟ ਪ੍ਰੋਜੈਕਟ ਤਹਿਤ ਕਰਿਆਨੇ ਦੀ ਡਿਲੀਵਰੀ ਡਰੋਨ ਰਾਹੀਂ ਕੀਤੀ ਜਾਵੇਗੀ।