ਦੁਨੀਆ ਦੇ ਸਭ ਤੋਂ ਅਮੀਰ ਵਿਅਕਤੀ ਅਤੇ ਟੇਸਲਾ ਦੇ ਸੀਈਓ ਐਲੋਨ ਮਸਕ ਨੇ ਇੱਕ ਐਲਾਨ ਕੀਤਾ ਹੈ। ਦਰਅਸਲ, ਐਲੋਨ ਮਸਕ ਨੇ ਇੱਕ ਨਵਾਂ ਪਰਫਿਊਮ ਲਾਂਚ ਕੀਤਾ ਹੈ। ਐਲੋਨ ਮਸਕ ਨੇ ਖੁਦ ਇਸ ਪੋਸਟ ਨੂੰ ਸੋਸ਼ਲ ਮੀਡੀਆ ‘ਤੇ ਸ਼ੇਅਰ ਕੀਤਾ ਹੈ। ਪੋਸਟ ਵਿੱਚ ਮਸਕ ਨੇ ਖੁਲਾਸਾ ਕੀਤਾ ਕਿ ਉਸਨੇ ਆਪਣੇ ਵੈਂਚਰ ‘ਦਿ ਬੋਰਿੰਗ ਕੰਪਨੀ’ ਦੁਆਰਾ ‘ਬਰਨਟ ਹੇਅਰ’ ਪਰਫਿਊਮ ਲਾਂਚ ਕੀਤਾ ਹੈ।
ਮਸਕ ਨੇ ਆਪਣੀ ਕੰਪਨੀ ਦੀ ਵੈੱਬਸਾਈਟ http://boringcompany.com/burnthair ਦਾ ਲਿੰਕ ਵੀ ਸਾਂਝਾ ਕੀਤਾ ਹੈ। ਤੁਸੀਂ ਇਸ ਵੈੱਬਸਾਈਟ ‘ਤੇ ਜਾ ਕੇ ਇਹ ਮਸਕ ਪਰਫਿਊਮ ਖਰੀਦ ਸਕਦੇ ਹੋ। ਪਰਫਿਊਮ ਦੀ ਵੈੱਬਸਾਈਟ ‘ਤੇ ਕੀਮਤ $100 ਹੈ। ਇਸ ਦੇ ਨਾਲ ਹੀ ਭਾਰਤੀ ਗਾਹਕਾਂ ਲਈ ਇਸ ਦੀ ਕੀਮਤ 8,400 ਰੁਪਏ ਰੱਖੀ ਗਈ ਹੈ, ਜਿਸ ‘ਤੇ ਅੰਤਰਰਾਸ਼ਟਰੀ ਸ਼ਿਪਿੰਗ ਚਾਰਜ (3000 ਰੁਪਏ) ਵੱਖਰੇ ਤੌਰ ‘ਤੇ ਵਸੂਲੇ ਜਾਣਗੇ। ਮਤਲਬ ਇਸ ਪਰਫਿਊਮ ਦੀ ਇੱਕ ਬੋਤਲ ਲਈ ਤੁਹਾਨੂੰ 11,400 ਰੁਪਏ ਖਰਚਣੇ ਪੈਣਗੇ।
ਦੱਸ ਦਈਏ ਕਿ ਇਸ ਉਤਪਾਦ ਦੇ ਲਾਂਚ ਦੇ ਨਾਲ ਮਸਕ ਨੇ ਆਪਣੇ ਟਵਿੱਟਰ ਬਾਇਓ ਨੂੰ ‘ਪਰਫਿਊਮ ਸੇਲਜ਼ਮੈਨ’ ਵਿੱਚ ਬਦਲ ਦਿੱਤਾ ਹੈ। ਇਕ ਪੋਸਟ ‘ਚ ਮਸਕ ਨੇ ‘ਬਰਨਟ ਹੇਅਰ’ ਪਰਫਿਊਮ ਦੀ ਬੋਤਲ ਦੀ ਫੋਟੋ ਸ਼ੇਅਰ ਕਰਦੇ ਹੋਏ ਲਿਖਿਆ, ‘ਧਰਤੀ ‘ਤੇ ਸਭ ਤੋਂ ਵਧੀਆ ਖੁਸ਼ਬੂ।’ ਫੋਟੋ ‘ਚ ਦੇਖਿਆ ਜਾ ਸਕਦਾ ਹੈ ਕਿ ਲਾਲ ਰੰਗ ਦੀ ਪਰਫਿਊਮ ਦੀ ਬੋਤਲ ‘ਤੇ ‘ਬਰਨਟ ਹੇਅਰ’ ਲਿਖਿਆ ਹੋਇਆ ਹੈ। ਐਲੋਨ ਮਸਕ ਨੇ ਇਕ ਹੋਰ ਪੋਸਟ ਸ਼ੇਅਰ ਕਰਦੇ ਹੋਏ ਕਿਹਾ ਹੈ ਕਿ ਹੁਣ ਤੱਕ ‘ਬਰਨਟ ਹੇਅਰ’ ਪਰਫਿਊਮ ਦੀਆਂ 10 ਹਜ਼ਾਰ ਤੋਂ ਵੱਧ ਬੋਤਲਾਂ ਵਿਕ ਚੁੱਕੀਆਂ ਹਨ। ਹਾਲਾਂਕਿ, ਇਹਨਾਂ ਬੋਤਲਾਂ ਦੀ ਸ਼ਿਪਿੰਗ 2023 ਦੀ ਪਹਿਲੀ ਤਿਮਾਹੀ (Q1) ਤੋਂ ਸ਼ੁਰੂ ਹੋਵੇਗੀ।