ਕਾਂਗਰਸ ਦੀ ਭਾਰਤ ਜੋੜੋ ਯਾਤਰਾ ਅੱਜ ਸਵੇਰੇ ਜੰਮੂ ਦੇ ਨਗਰੋਟਾ ਸ਼ਹਿਰ ਤੋਂ ਕਾਂਗਰਸ ਆਗੂ ਰਾਹੁਲ ਗਾਂਧੀ ਦੀ ਅਗਵਾਈ ਵਿੱਚ ਮੁੜ ਸ਼ੁਰੂ ਕੀਤੀ ਗਈ। ਹੁਣ ਤੱਕ ਇਸ ਯਾਤਰਾ ‘ਚ ਕਈ ਸੈਲੇਬਸ ਸ਼ਾਮਲ ਹੋ ਚੁੱਕੇ ਹਨ। ਇਸ ਦੌਰਾਨ ਹੁਣ ਇੱਕ ਹੋਰ ਨਾਮ ਜੁੜ ਗਿਆ ਹੈ ਅਤੇ ਉਹ ਹੈ ਉਰਮਿਲਾ ਮਾਤੋਂਡਕਰ। ਜੀ ਹਾਂ, ਅਭਿਨੇਤਰੀ ਅਤੇ ਰਾਜਨੇਤਾ ਉਰਮਿਲਾ ਮਾਤੋਂਡਕਰ ਹਾਲ ਹੀ ‘ਚ ‘ਭਾਰਤ ਜੋੜੋ ਯਾਤਰਾ’ ‘ਚ ਸ਼ਾਮਲ ਹੋਈ ਹੈ।
ਦੱਸ ਦੇਈਏ ਕਿ ਉਰਮਿਲਾ ਅਤੇ ਰਾਹੁਲ ਗਾਂਧੀ ਦੀਆਂ ਤਸਵੀਰਾਂ ਸੋਸ਼ਲ ਮੀਡੀਆ ‘ਤੇ ਕਾਫੀ ਵਾਇਰਲ ਹੋ ਰਹੀਆਂ ਹਨ। ਇਸ ਦੌਰਾਨ ਕਾਂਗਰਸੀ ਵਰਕਰਾਂ ਤੇ ਸਮਰਥਕਾਂ ਨੇ ਉਨ੍ਹਾਂ ਦਾ ਸਵਾਗਤ ਕਰਨ ਲਈ ਸੜਕਾਂ ਕਿਨਾਰੇ ਕਤਾਰਾਂ ਲਾ ਦਿੱਤੀਆਂ। ਕਰੀਮ ਰੰਗ ਦੀ ਪਰੰਪਰਾਗਤ ਕਸ਼ਮੀਰੀ ਫੇਰਨ ਅਤੇ ਬੀਨੀ ਕੈਪ ‘ਚ ਮਾਤੋਂਡਕਰ ਮਾਰਚ ਦੌਰਾਨ ਰਾਹੁਲ ਗਾਂਧੀ ਨਾਲ ਗੱਲਬਾਤ ਕਰਦੀ ਹੋਈ ਦਿਖਾਈ ਦਿੱਤੀ।
