ਅਗਨੀਪਥ ਯੋਜਨਾ ਦਾ ਦੇਸ਼ ਭਰ ‘ਚ ਵਿਰੋਧ ਜਾਰੀ ਹੈ। ਇਸ ਯੋਜਨਾ ਦੇ ਐਲਾਨ ਤੋਂ ਬਾਅਦ ਸਦਮੇ ‘ਚ ਆਏ ਰਾਜਸਥਾਨ ਦੇ ਭਰਤਪੁਰ ‘ਚ ਨੌਜਵਾਨ ਨੇ ਖੌਫਨਾਕ ਕਦਮ ਚੁੱਕਿਆ ਹੈ। ਮੀਡੀਆ ਰਿਪੋਰਟਾਂ ਮੁਤਾਬਕ ਭਰਤਪੁਰ ਜ਼ਿਲੇ ਦੇ ਚਿਕਸਾਨਾ ਥਾਣਾ ਖੇਤਰ ਦੇ ਬਿਲੋਠੀ ਪਿੰਡ ਨਿਵਾਸੀ ਕਨ੍ਹਈਆ ਗੁਰਜਰ (22) ਪੁੱਤਰ ਮਹਾਰਾਜ ਸਿੰਘ ਗੁਰਜਰ ਨੇ ਫਾਹਾ ਲੈ ਕੇ ਖੁਦਕੁਸ਼ੀ ਕਰ ਲਈ।
ਰਿਸ਼ਤੇਦਾਰਾਂ ਨੇ ਦੱਸਿਆ ਕਿ ਨੌਜਵਾਨ ਕਬੱਡੀ ਦਾ ਰਾਸ਼ਟਰੀ ਪੱਧਰ ਦਾ ਖਿਡਾਰੀ ਸੀ। ਇਸ ਦੇ ਨਾਲ ਹੀ ਉਹ 12ਵੀਂ ਤੋਂ ਫੌਜ ‘ਚ ਭਰਤੀ ਹੋਣ ਦੀ ਤਿਆਰੀ ਕਰ ਰਿਹਾ ਸੀ। ਪਰ ਜਦੋਂ ਤੋਂ ਅਗਨੀਪਥ ਸਕੀਮ ਦਾ ਐਲਾਨ ਹੋਇਆ ਹੈ, ਕਨ੍ਹਈਆ ਨੇ ਤਿਆਰੀ ਬੰਦ ਕਰ ਦਿੱਤੀ। ਉਸ ਦੇ ਪਰਿਵਾਰਕ ਮੈਂਬਰਾਂ ਦੇ ਵਾਰ-ਵਾਰ ਸਮਝਾਉਣ ਦੇ ਬਾਵਜੂਦ ਵੀ ਉਹ ਫੌਜ ਦੀ ਤਿਆਰੀ ਲਈ ਸਵੇਰੇ ਨਹੀਂ ਭੱਜ ਰਿਹਾ ਸੀ।
ਸੋਮਵਾਰ ਸਵੇਰੇ ਜਦੋਂ ਪਰਿਵਾਰ ਦੇ ਸਾਰੇ ਮੈਂਬਰ ਉੱਠੇ ਤਾਂ ਕਨ੍ਹਈਆ ਘਰ ‘ਚ ਨਹੀਂ ਸੀ। ਜਿਸ ਤੋਂ ਬਾਅਦ ਰਿਸ਼ਤੇਦਾਰਾਂ ਨੇ ਉਸ ਦੀ ਭਾਲ ਸ਼ੁਰੂ ਕੀਤੀ ਤਾਂ ਉਸ ਦੀ ਲਾਸ਼ ਪਿੰਡ ਦੇ ਬਾਹਰ ਖੇਤਾਂ ‘ਚ ਲਟਕਦੀ ਮਿਲੀ। ਮ੍ਰਿਤਕ ਦਾ ਪਿਤਾ ਕਿਸਾਨ ਅਤੇ ਭਰਾ ਮਜ਼ਦੂਰ ਹੈ। ਹਰ ਕਿਸੇ ਦਾ ਸੁਪਨਾ ਸੀ ਕਿ ਕਨ੍ਹਈਆ ਫੌਜ ‘ਚ ਭਰਤੀ ਹੋ ਕੇ ਦੇਸ਼ ਦੀ ਸੇਵਾ ਕਰੇ।