ਹਰਿਆਣਾ ‘ਚ ਇੰਨੀ ਦਿਨੀ ਇਕ ਚਿੱਠੀ ਚਰਚਾ ਦਾ ਵਿਸ਼ਾ ਬਣੀ ਹੋਈ ਹੈ। ਦਰਅਸਲ ਇਕ ਵਿਅਕਤੀ ਵੱਲੋ ਹਰਿਆਣਾ ਦੇ ਡਿਪਟੀ ਸੀ.ਐੱਮ ਦੁਸ਼ਯੰਤ ਚੌਟਾਲਾ ਨੂੰ ਇਕ ਚਿੱਠੀ ਲਿਖ ਕੇ ਅਜੀਬੋ ਗਰੀਬ ਮੰਗਾਂ ਕੀਤੀਆਂ ਗਈਆਂ ਹਨ। ਡਿਪਟੀ ਸੀਐਮ ਦੁਸ਼ਯੰਤ ਨੂੰ ਲਿਖੇ ਪੱਤਰ ਵਿੱਚ ਬੀਰੇਂਦਰ ਸਾਂਗਵਾਨ ਨਾਮ ਦੇ ਵਿਅਕਤੀ ਨੇ ਮੰਗ ਕੀਤੀ ਹੈ ਕਿ ਉਨ੍ਹਾਂ ਦੇ ਇਲਾਕੇ ਵਿੱਚ ਵਿਕਣ ਵਾਲੀ ਦੇਸੀ ਸ਼ਰਾਬ ਦੀ ਗੁਣਵੱਤਾ ਬਹੁਤ ਘਟੀਆ ਹੈ ਅਤੇ ਇਸ ਦੇ ਸੇਵਨ ਨਾਲ ਮੂੰਹ ਵਿੱਚੋਂ ਬਹੁਤ ਬਦਬੂ ਆਉਂਦੀ ਹੈ, ਜਿਸ ਕਾਰਨ ਉਨ੍ਹਾਂ ਦੀ ਪਤਨੀ ਵੀ ਨੇੜੇ ਨਹੀਂ ਬੈਠਦੀ ਅਤੇ ਪਤਨੀ ਵੱਲੋ ਅਕਸਰ ਹੀ ਕਿਹਾ ਜਾਂਦਾ ਹੈ ਕਿ ਦੇਸੀ ਸ਼ਰਾਬ ਪੀਣ ਕਾਰਨ ਤੁਹਾਡੇ ਮੂੰਹ ਚੋ ਬਦਬੂ ਆਉਂਦੀ ਹੈ। ਇੰਨਾ ਹੀ ਨਹੀਂ ਬੀਰੇਂਦਰ ਸਾਂਗਵਾਨ ਨੇ ਇਸ ਸਬੰਧੀ ਮੁਰਥਲ ਸਥਿਤ ਸ਼ਰਾਬ ਕੰਪਨੀ ਨੂੰ ਕਈ ਪੱਤਰ ਵੀ ਲਿਖੇ ਹਨ ਪਰ ਅਜੇ ਤੱਕ ਨਾ ਤਾਂ ਆਬਕਾਰੀ ਵਿਭਾਗ ਅਤੇ ਨਾ ਹੀ ਸ਼ਰਾਬ ਕੰਪਨੀ ਵੱਲੋਂ ਪੱਤਰ ਦਾ ਕੋਈ ਜਵਾਬ ਮਿਲਿਆ ਹੈ। ਬੀਰੇਂਦਰ ਨੇ ਦੱਸਿਆ ਕਿ ਉਸ ਨੇ ਇਹ ਪੱਤਰ ਮਾਰਚ 2022 ਵਿੱਚ ਲਿਖਿਆ ਸੀ ਪਰ ਹੁਣ ਅਚਾਨਕ ਇਹ ਵਾਇਰਲ ਹੋ ਗਿਆ ਹੈ।
ਦੱਸ ਦਈਏ ਕਿ ਪੱਤਰ ਵਿਚ ਵਿਅਕਤੀ ਨੇ ਬੇਨਤੀ ਹੈ ਕਿ ਅਸੀਂ ਇਹ ਗੱਲ ਤੁਹਾਡੇ ਧਿਆਨ ਵਿੱਚ ਲਿਆਉਣਾ ਚਾਹੁੰਦੇ ਹਾਂ ਕਿ ਅੱਜਕੱਲ੍ਹ ਦੇਸੀ ਸ਼ਰਾਬ ਕੰਪਨੀਆਂ ਵੱਲੋਂ ਜੋ ਸ਼ਰਾਬ ਬਣਾਈ ਜਾ ਰਹੀ ਹੈ, ਉਹ ਬਹੁਤ ਹੀ ਘਟੀਆ ਕੁਆਲਿਟੀ ਦੀ ਹੈ। ਅਸੀਂ ਗ਼ਰੀਬ ਹਾਂ ਤੇ ਸਿਰਫ਼ ਦੇਸੀ ਸ਼ਰਾਬ ਪੀਂਦੇ ਹਾਂ। ਪਰ ਜਦੋਂ ਅਸੀਂ ਇਸ ਦੇਸੀ ਸ਼ਰਾਬ ਪੀ ਕੇ ਕਿਸੇ ਦੇ ਕੋਲ ਬੈਠਦੇ ਹਾਂ ਤਾਂ ਸਾਡੇ ਮੂੰਹੋਂ ਇੰਨੀ ਬਦਬੂ ਆਉਂਦੀ ਹੈ ਕਿ ਕੋਈ ਸਾਨੂੰ ਨੇੜੇ ਨਹੀਂ ਬੈਠਣ ਦਿੰਦਾ। ਜੇਕਰ ਇਸ ਦਾ ਸਵਾਦ ਬਦਲ ਜਾਵੇ ਤਾਂ ਇਸ ਤੋਂ ਬਦਬੂ ਨਹੀਂ ਆਵੇਗੀ ਅਤੇ ਸਮਾਜ ਦੇ ਲੋਕ ਸਾਨੂੰ ਇੱਜ਼ਤ ਦੀ ਨਿਗ੍ਹਾ ਨਾਲ ਦੇਖਣਗੇ ਅਤੇ ਪਰਿਵਾਰ ਦੇ ਮੈਂਬਰ ਬਦਬੂ ਤੋਂ ਪਰੇਸ਼ਾਨ ਨਹੀਂ ਹੋਣਗੇ। ਜੇਕਰ ਅਸੀਂ ਸਰਕਾਰ ਦਾ ਮਾਲੀਆ ਵਧਾਉਂਦੇ ਹਾਂ ਤਾਂ ਸਾਡੀ ਵੀ ਥੋੜੀ ਸੁਣੀ ਜਾਵੇ। ਇਨ੍ਹਾਂ ਦੇਸੀ ਸ਼ਰਾਬ ਕੰਪਨੀਆਂ ਨੂੰ ਬਿਨਾਂ ਗੰਧ ਵਾਲੀ ਸ਼ਰਾਬ ਬਣਾਉਣ ਦੇ ਆਦੇਸ਼ ਦਿੱਤੇ ਜਾਣ। ਧੰਨਵਾਦ।
