ਦੇਸ਼ ਦੇ ਮਸ਼ਹੂਰ ਪਹਿਲਵਾਨ ਮਹਾਬਲੀ ‘ਦਿ ਗ੍ਰੇਟ ਖਲੀ’ ਨੇ ਖਾਣੇ ਦਾ ਕਾਰੋਬਾਰ ਸ਼ੁਰੂ ਕਰਕੇ ਨਵੀਂ ਪਾਰੀ ਸ਼ੁਰੂ ਕੀਤੀ ਹੈ। ਖਲੀ ਇਨ੍ਹੀਂ ਦਿਨੀਂ ਅੰਬਾਲਾ ਦਿੱਲੀ ਹਾਈਵੇ ‘ਤੇ ਕਰਨਾਲ ਨੇੜੇ ਢਾਬਾ ਚਲਾ ਰਹੇ ਹਨ। ਖਲੀ ਦਾ ਮੁਰਥਲ ‘ਚ ਵੀ ਢਾਬਾ ਖੋਲ੍ਹਣ ਦਾ ਸੁਪਨਾ ਹੈ। ਉਨ੍ਹਾਂ ਕਿਹਾ ਕਿ ‘ਖਲੀ ਥਾਲੀ’ ਜਲਦ ਹੀ ਢਾਬੇ ‘ਤੇ ਉਪਲਬਧ ਹੋਵੇਗੀ। ਪਲੇਟ ਦੀ ਕੀਮਤ ਨੂੰ ਲੈ ਕੇ ਅਜੇ ਸੋਚ ਵਿਚਾਰ ਕੀਤਾ ਜਾ ਰਿਹਾ ਹੈ। ਰੇਟ ਤੈਅ ਹੋਣ ਤੋਂ ਬਾਅਦ ਇਸ ਨੂੰ ਸ਼ੁਰੂ ਕੀਤਾ ਜਾਵੇਗਾ। ‘ਦ ਗ੍ਰੇਟ ਖਲੀ’ ਉਰਫ਼ ਦਲੀਪ ਸਿੰਘ ਰਾਣਾ ਨੇ ਕਿਹਾ ਕਿ ਉਹ ਇਸ ਨਵੇਂ ਕਾਰੋਬਾਰ ਦਾ ਕਾਫੀ ਆਨੰਦ ਲੈ ਰਹੇ ਹਨ। ਇਹ ਉਨ੍ਹਾਂ ਨੂੰ ਪ੍ਰਸ਼ੰਸਕਾਂ ਨਾਲ ਸਿੱਧਾ ਜੁੜਨ ਦਾ ਮੌਕਾ ਵੀ ਦਿੰਦਾ ਹੈ।
ਦੱਸ ਦਈਏ ਕਿ ਖਲੀ ਨੇ ਕਰਨਾਲ ‘ਚ ਦਿੱਲੀ-ਅੰਬਾਲਾ ਹਾਈਵੇ ‘ਤੇ ਕਰੀਬ 8,000 ਵਰਗ ਮੀਟਰ ‘ਚ ਏਅਰ ਕੰਡੀਸ਼ਨਡ ਢਾਬਾ ਬਣਾਇਆ ਹੈ। ਢਾਬੇ ਦੀ ਵਿਸ਼ੇਸ਼ਤਾ ਇਹ ਹੈ ਕਿ ਵੀਕਐਂਡ ‘ਤੇ ਗਾਹਕਾਂ ਲਈ ਮੁਫ਼ਤ ਕੁਸ਼ਤੀ ਸ਼ੋਅ ਦਾ ਪ੍ਰਬੰਧ ਕੀਤਾ ਜਾਂਦਾ ਹੈ। ਜਲੰਧਰ, ਪੰਜਾਬ ਵਿੱਚ ਖਲੀ ਦੀ ਕੁਸ਼ਤੀ ਅਕੈਡਮੀ CWE ਵਿੱਚ ਸਿਖਲਾਈ ਪ੍ਰਾਪਤ ਪਹਿਲਵਾਨ ਖਾਸ ਤੌਰ ‘ਤੇ ਸ਼ਨੀਵਾਰ ਅਤੇ ਐਤਵਾਰ ਨੂੰ ਢਾਬੇ ‘ਤੇ ਪਹੁੰਚਦੇ ਹਨ। ਖਲੀ ਦੇ ਢਾਬੇ ‘ਚ ਖਾਣ-ਪੀਣ, ਜਿੰਮ ਅਤੇ ਰਾਤ ਰਹਿਣ ਦਾ ਵੀ ਪ੍ਰਬੰਧ ਹੈ। ਇਥੇ ਰਾਤ ਠਹਿਰਨ ਲਈ ਲਗਭਗ 2500 ਰੁਪਏ ਵਿੱਚ ਕਮਰਾ ਉਪਲਬਧ ਹੈ। ਇਸ ਦੇ ਨਾਲ ਹੀ ਢਾਬੇ ਵਿੱਚ ਖਾਣਾ 200 ਤੋਂ 500 ਰੁਪਏ ਵਿੱਚ ਮਿਲਦਾ ਹੈ।