ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਟੈਕਨਾਲੋਜੀ ਦੀ ਵਧਦੀ ਵਰਤੋਂ ਨੂੰ ਦੇਖਦੇ ਹੋਏ ਤਕਨੀਕੀ ਕੰਪਨੀ ਮਾਈਕ੍ਰੋਸਾਫਟ ਨੇ ਕੀਬੋਰਡ ‘ਚ AI ਬਟਨ ਦੀ ਵਿਵਸਥਾ ਕੀਤੀ ਹੈ। ਇਹ ਮਾਈਕ੍ਰੋਸਾਫਟ ਦੇ ਆਪਰੇਟਿੰਗ ਸਿਸਟਮ ਵਿੰਡੋਜ਼ ‘ਤੇ ਚੱਲ ਰਹੇ ਸਾਰੇ ਨਵੇਂ ਨਿੱਜੀ ਕੰਪਿਊਟਰਾਂ ‘ਚ ਮੁਹੱਈਆ ਕਰਵਾਇਆ ਜਾਵੇਗਾ। ਕੰਪਿਊਟਰ ਬਣਾਉਣ ਵਾਲੀਆਂ ਕੰਪਨੀਆਂ ਨੂੰ ਆਪਣੇ ਕੀ-ਬੋਰਡ ‘ਚ ਇਹ ਬਟਨ ਦੇਣ ਲਈ ਕਿਹਾ ਗਿਆ ਹੈ।
ਦੱਸ ਦਈਏ ਕਿ ਕੰਪਨੀ ਨੇ ਲਗਭਗ ਤਿੰਨ ਦਹਾਕਿਆਂ ਤੋਂ ਵਿੰਡੋਜ਼ ਆਧਾਰਿਤ ਕੀਬੋਰਡ ਵਿੱਚ ਕੋਈ ਵੱਡਾ ਬਦਲਾਅ ਨਹੀਂ ਕੀਤਾ ਹੈ। ਪਰ ਹੁਣ ਸੱਜੇ ਹੱਥ ‘ਤੇ ਮੌਜੂਦ ਕੰਟਰੋਲ ਬਟਨ (CTRL) ਦੀ ਥਾਂ ‘ਤੇ ਨਵਾਂ AI ਚੈਟਬੋਟ ਬਟਨ ਦਿੱਤਾ ਜਾਵੇਗਾ। ਕੀਬੋਰਡ ‘ਚ ਇਸ ਨੂੰ ਸਭ ਤੋਂ ਵੱਡਾ ਬਦਲਾਅ ਮੰਨਿਆ ਜਾ ਰਿਹਾ ਹੈ। ਇਸ ਬਟਨ ਨੂੰ ਕੋ-ਪਾਇਲਟ ਕਿਹਾ ਜਾ ਰਿਹਾ ਹੈ, ਜੋ ਕੰਪਨੀ ਦੀ AI ਤਕਨੀਕ ‘ਤੇ ਆਧਾਰਿਤ ਚੈਟਬੋਟ ਦੀ ਵਰਤੋਂ ਕਰਨ ਦੀ ਇਜਾਜ਼ਤ ਦੇਵੇਗਾ। ਇਸ ਪਹਿਲ ਦੇ ਜ਼ਰੀਏ ਮਾਈਕ੍ਰੋਸਾਫਟ ਵੀ ਓਪਨਏਆਈ ਤੋਂ ਅੱਗੇ ਨਿਕਲਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ, ਜੋ ਕਾਫੀ ਮਸ਼ਹੂਰ ਹੋ ਰਿਹਾ ਹੈ।