ਭਾਰਤ ਦੇ ਓਲੰਪਿਕ ਤਮਗਾ ਜੇਤੂ ਪਹਿਲਵਾਨ ਰਵੀ ਦਹੀਆ ਨੇ ਮੰਗੋਲੀਆ ਦੀ ਰਾਜਧਾਨੀ ਉਲਾਨਬਾਤਰ ਵਿੱਚ ਖੇਡੀ ਜਾ ਰਹੀ ਏਸ਼ਿਆਈ ਕੁਸ਼ਤੀ ਚੈਂਪੀਅਨਸ਼ਿਪ ਵਿੱਚ ਸੋਨ ਤਗ਼ਮਾ ਜਿੱਤ ਲਿਆ ਹੈ। ਰਵੀ ਨੇ ਇਹ ਤਮਗਾ 57 ਕਿਲੋ ਭਾਰ ਵਰਗ ਵਿੱਚ ਜਿੱਤਿਆ। ਰਵੀ ਦਹੀਆ ਨੇ ਇਸ ਤੋਂ ਪਹਿਲਾਂ ਟੋਕੀਓ ਓਲੰਪਿਕ ‘ਚ ਚਾਂਦੀ ਦਾ ਤਗਮਾ ਜਿੱਤਿਆ ਸੀ।
ਰਵੀ ਨੇ ਫਾਈਨਲ ਵਿੱਚ ਕਜ਼ਾਕਿਸਤਾਨ ਦੇ ਰਾਖਤ ਕਲਜਾਨ ਨੂੰ ਤਕਨੀਕੀ ਉੱਤਮਤਾ ਨਾਲ ਹਰਾਇਆ। ਰਵੀ ਨੇ ਤਕਨੀਕੀ ਉੱਤਮਤਾ ਦੇ ਆਧਾਰ ‘ਤੇ ਜਾਪਾਨ ਦੇ ਰਿਕੁਟੋ ਇਰੇਈ ਨੂੰ ਅਤੇ ਮੰਗੋਲੀਆ ਦੇ ਜੈਨਬਾਜ਼ਾਰ ਜੰਡਨਬੁੱਡ ਨੂੰ 12-5 ਨਾਲ ਹਰਾ ਕੇ ਸੋਨ ਤਗਮੇ ਦੀ ਸਫਲਤਾ ਹਾਸਲ ਕੀਤੀ। ਰਵੀ ਸ਼ੁਰੂ ਵਿੱਚ ਫਾਈਨਲ ਵਿੱਚ ਕਾਲਜਾਨ ਤੋਂ ਪਿੱਛੇ ਚੱਲ ਰਿਹਾ ਸੀ। ਇਸ ਤੋਂ ਬਾਅਦ ਉਸ ਨੇ ਲਗਾਤਾਰ ਛੇ ਦੋ ਅੰਕ ਹਾਸਲ ਕੀਤੇ।
ਰਵੀ ਹਰਿਆਣਾ ਰਾਜ ਦੇ ਸੋਨੀਪਤ ਦੇ ਨਾਹਾਰੀ ਪਿੰਡ ਦਾ ਰਹਿਣ ਵਾਲਾ ਹੈ। ਦੱਸ ਦਈਏ ਕਿ ਬਜਰੰਗ ਪੂਨੀਆ ਨੂੰ 65 ਕਿਲੋ ਵਰਗ ਵਿੱਚ ਚਾਂਦੀ ਦੇ ਤਗ਼ਮੇ ਨਾਲ ਸੰਤੋਸ਼ ਕਰਨਾ ਪਿਆ। ਬਜਰੰਗ ਫਾਈਨਲ ਵਿੱਚ ਈਰਾਨ ਦੇ ਰਹਿਮਾਨ ਮੂਸਾ ਤੋਂ 3-1 ਨਾਲ ਹਾਰ ਗਏ। ਨਵੀਨ ਨੇ 70 ਕਿਲੋ ਭਾਰ ਵਰਗ ਵਿੱਚ ਕਾਂਸੀ ਦਾ ਤਗ਼ਮਾ ਜਿੱਤਿਆ। ਉਸਨੇ ਕਾਂਸੀ ਦੇ ਤਗਮੇ ਦੇ ਮੁਕਾਬਲੇ ਵਿੱਚ ਮੰਗੋਲੀਆ ਦੇ ਪਹਿਲਵਾਨ ਨੂੰ ਹਰਾਇਆ।
ਰਵੀ ਪਿਛਲੇ ਸਾਲ ਟੋਕੀਓ ਓਲੰਪਿਕ ਦੇ ਫਾਈਨਲ ਵਿੱਚ ਰੂਸੀ ਪਹਿਲਵਾਨ ਜਵੁਰ ਯੁਗਾਏਵ ਤੋਂ ਹਾਰ ਗਿਆ ਸੀ। ਇਹ ਗੋਲਡ ਮੈਡਲ ਮੈਚ ਰੂਸੀ ਖਿਡਾਰੀ ਨੇ 7-4 ਨਾਲ ਜਿੱਤਿਆ ।