ਦੋ ਵਾਰ ਦੀ ਓਲੰਪਿਕ ਤਗ਼ਮਾ ਜੇਤੂ ਪੀਵੀ ਸਿੰਧੂ ਨੇ ਦੂਜੀ ਵਾਰ ਏਸ਼ਿਆਈ ਬੈਡਮਿੰਟਨ ਚੈਂਪੀਅਨਸ਼ਿਪ ਵਿੱਚ ਅੱਜ ਕਾਂਸੀ ਦਾ ਤਗ਼ਮਾ ਜਿੱਤਿਆ ਹੈ। ਪੀਵੀ ਸਿੰਧੂ ਨੂੰ ਸ਼ਨੀਵਾਰ ਨੂੰ ਖੇਡੇ ਗਏ ਸੈਮੀਫਾਈਨਲ ਮੈਚ ‘ਚ ਜਾਪਾਨ ਦੀ ਪਿਛਲੀ ਜੇਤੂ ਅਕਾਨੇ ਯਾਮਾਗੁਚੀ ਤੋਂ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਅਕਾਨੇ ਨੇ ਸਿੰਧੂ ਨੂੰ 21-13, 19-21 ਅਤੇ 16-21 ਨਾਲ ਹਰਾਇਆ। ਸਿੰਧੂ ਨੇ ਇਸ ਤੋਂ ਪਹਿਲਾਂ ਸਾਲ 2014 ਵਿੱਚ ਵੀ ਏਸ਼ਿਆਈ ਚੈਂਪੀਅਨਸ਼ਿਪ ਵਿੱਚ ਕਾਂਸੀ ਦਾ ਤਗ਼ਮਾ ਜਿੱਤਿਆ ਸੀ।
ਦੱਸ ਦਈਏ ਕਿ ਸਿੰਧੂ ਇਸ ਮੈਚ ‘ਚ ਸ਼ਾਨਦਾਰ ਫਾਰਮ ‘ਚ ਸੀ ਅਤੇ ਪਹਿਲਾ ਸੈੱਟ ਜਿੱਤਣ ਤੋਂ ਬਾਅਦ ਦੂਜੇ ਸੈੱਟ ‘ਚ ਵੀ ਬੜ੍ਹਤ ਬਣਾ ਰਹੀ ਸੀ ਪਰ ਸਰਵਿਸ ‘ਚ ਦੇਰੀ ਹੋਣ ਕਾਰਨ ਮੈਚ ਰੈਫਰੀ ਨੇ ਸਿੰਧੂ ਨੂੰ ਯਾਮਾਗੁਚੀ ਨੂੰ ਸ਼ਟਲ ਦੇਣ ਲਈ ਕਿਹਾ। ਸਿੰਧੂ ਨੇ ਕਿਹਾ ਕਿ ਉਹ ਸਰਵਿਸ ਲਈ ਤਿਆਰ ਸੀ, ਪਰ ਯਾਮਾਗੁਚੀ ਤਿਆਰ ਨਹੀਂ ਸੀ। ਪਰ ਰੈਫਰੀ ਨੇ ਸਿੰਧੂ ਦੀ ਗੱਲ ਨਹੀਂ ਸੁਣੀ ਅਤੇ ਉਸ ਤੋਂ ਸ਼ਟਲ ਯਾਮਾਗੁਚੀ ਨੂੰ ਦੇ ਦਿੱਤੀ ਗਈ। ਇਸ ਤੋਂ ਬਾਅਦ ਭਾਰਤੀ ਖਿਡਾਰਨ ਦੀ ਲੈਅ ਟੁੱਟ ਗਈ ਅਤੇ ਉਹ ਮੈਚ ਹਾਰ ਗਈ।
ਇਸ ਤੋਂ ਪਹਿਲਾ ਸਿੰਧੂ ਸ਼ੁੱਕਰਵਾਰ ਨੂੰ ਖੇਡੇ ਗਏ ਕੁਆਰਟਰ ਫਾਈਨਲ ਵਿੱਚ ਤੀਜਾ ਦਰਜਾ ਪ੍ਰਾਪਤ ਚੀਨ ਦੀ ਹੀ ਬਿੰਗ ਸ਼ਿਆਓ ਨੂੰ ਹਰਾ ਕੇ ਮਹਿਲਾ ਸਿੰਗਲਜ਼ ਦੇ ਸੈਮੀਫਾਈਨਲ ਵਿੱਚ ਪਹੁੰਚ ਗਈ ਸੀ। ਸਿੰਧੂ ਨੇ 1 ਘੰਟਾ 16 ਮਿੰਟ ਤੱਕ ਚੱਲੇ ਮੈਚ ਵਿੱਚ ਜ਼ਿਆਓ ਨੂੰ 21-9, 13-21, 21-19 ਨਾਲ ਹਰਾਇਆ ਸੀ।