ਚੇਨਈ ਸੁਪਰ ਕਿੰਗਜ਼ ਦੇ ਕਪਤਾਨ ਮਹਿੰਦਰ ਸਿੰਘ ਧੋਨੀ ਦੇ ਗੋਡੇ ਦੀ ਸਰਜਰੀ ਅੱਜ ਵੀਰਵਾਰ (1 ਜੂਨ) ਨੂੰ ਹੋ ਸਕਦੀ ਹੈ। ਉਹ ਆਈਪੀਐਲ ਦੇ 16ਵੇਂ ਸੀਜ਼ਨ ਵਿੱਚ ਗੋਡਿਆਂ ਦੀ ਸਮੱਸਿਆ ਨਾਲ ਜੂਝਦੇ ਦੇਖੇ ਗਏ ਸਨ। ਆਈਪੀਐਲ ਜਿੱਤਣ ਦੇ 48 ਘੰਟਿਆਂ ਦੇ ਅੰਦਰ, ਉਨ੍ਹਾਂ ਨੇ ਮੁੰਬਈ ਵਿੱਚ ਇੱਕ ਡਾਕਟਰ ਨਾਲ ਸਲਾਹ ਕੀਤੀ। ਧੋਨੀ ਨੇ ਉਸੇ ਡਾਕਟਰ ਦੀ ਸਲਾਹ ਲਈ ਹੈ ਜਿਸ ਨੇ ਵਿਕਟਕੀਪਰ ਬੱਲੇਬਾਜ਼ ਰਿਸ਼ਭ ਪੰਤ ਦਾ ਇਲਾਜ ਕੀਤਾ ਸੀ।
ਮੀਡੀਆ ਰਿਪੋਰਟਾਂ ਮੁਤਾਬਕ ਧੋਨੀ ਬੁੱਧਵਾਰ (31 ਮਈ) ਨੂੰ ਮੁੰਬਈ ਦੇ ਕੋਕਿਲਾਬੇਨ ਧੀਰੂਭਾਈ ਅੰਬਾਨੀ ਹਸਪਤਾਲ ਅਤੇ ਮੈਡੀਕਲ ਰਿਸਰਚ ਇੰਸਟੀਚਿਊਟ ‘ਚ ਆਪਣੇ ਗੋਡੇ ਦੇ ਇਲਾਜ ਲਈ ਗਏ ਸਨ। ਹੁਣ ਵੀਰਵਾਰ ਨੂੰ ਉਨ੍ਹਾਂ ਦੀ ਸਰਜਰੀ ਹੋ ਸਕਦੀ ਹੈ। ਚੇਨਈ ਸੁਪਰ ਕਿੰਗਜ਼ ਦੇ ਕਪਤਾਨ ਨੇ ਡਾਕਟਰ ਦਿਨਸ਼ਾਵ ਪਾਰਦੀਵਾਲਾ ਨਾਲ ਮੁਲਾਕਾਤ ਕੀਤੀ ਹੈ। ਦਿਨਸ਼ਾ ਸਪੋਰਟਸ ਆਰਥੋਪੀਡਿਕਸ ਦੇ ਮਾਹਿਰ ਹੋਣ ਦੇ ਨਾਲ-ਨਾਲ ਹਸਪਤਾਲ ਵਿੱਚ ਸਪੋਰਟਸ ਮੈਡੀਸਨ ਦੇ ਡਾਇਰੈਕਟਰ ਹਨ। ਉਹ ਦਿੱਲੀ ਕੈਪੀਟਲਜ਼ ਦੇ ਕਪਤਾਨ ਪੰਤ ਦਾ ਵੀ ਇਲਾਜ ਕਰ ਰਹੇ ਹਨ। ਦੱਸ ਦਈਏ ਕਿ ਬੁੱਧਵਾਰ ਨੂੰ ਚੇਨਈ ਸੁਪਰ ਕਿੰਗਜ਼ ਦੇ ਸੀਈਓ ਕਾਸ਼ੀ ਵਿਸ਼ਵਨਾਥਨ ਨੇ ਧੋਨੀ ਦੀ ਸੱਟ ਦੀ ਜਾਣਕਾਰੀ ਦਿੱਤੀ। ਧੋਨੀ ਨੂੰ IPL ਦੌਰਾਨ ਖੱਬੇ ਗੋਡੇ ਦੀ ਸੱਟ ਤੋਂ ਪਰੇਸ਼ਾਨ ਦੇਖਿਆ ਗਿਆ ਸੀ। ਉਹ ਹਰ ਮੈਚ ਵਿੱਚ ਖਾਸ ਪੱਟੀ ਬੰਨ੍ਹ ਕੇ ਮੈਦਾਨ ਵਿੱਚ ਉੱਤਰੇ ਸਨ। ਵਿਸ਼ਵਨਾਥਨ ਨੇ ਕਿਹਾ, ”ਹਾਂ, ਇਹ ਸੱਚ ਹੈ ਕਿ ਧੋਨੀ ਆਪਣੇ ਖੱਬੇ ਗੋਡੇ ਦੀ ਸੱਟ ਲਈ ਡਾਕਟਰੀ ਸਲਾਹ ਲੈਣਗੇ ਅਤੇ ਉਸ ਮੁਤਾਬਕ ਫੈਸਲਾ ਲੈਣਗੇ।”